El sieglu XX

La lliteratura escrita en llingua asturiana vive nos últimos 30 años un resurdimientu que ye paralelu al de la propia llingua en tolos ámbitos. L’Academia de la Llingua Asturiana foi la pionera n’entamar concursos lliterarios con continuidá y n’iguar les sos propies coleiciones lliteraries. Anguaño pue dicise qu’esiste un mercáu, inda que seya pequeñu, qu’espoxiga pasu ente pasu y hai delles editoriales de calter priváu estabilizaes. Munchos de los llibros espublizaos benefíciense de les ayudes concedíes pola Conseyería d’Educación y Cultura, que tien una partida específica pa esti capítulu.

El Día del Llibru Asturianu celébrase tolos años na Selmana de les Lletres Asturianes (primer selmana de mayu), coincidiendo col Día de les Lletres Asturianes. Esti día los llibros n’asturianu lleven descuentos y a los compradores apúrrese-yos un regalu, que suel ser la espublización temática editada con motivu de la Selmana de les Lletres.
 

No que toca a la producción, obsérvase como nos primeros años del Surdimientu (nome col que se define dende los años 70 el movimientu de creadores lliterarios n’asturianu) tendíase a la poesía o la lliteratura infantil mentres qu’ente últimos de los años 80 y mediaos de los 90 garraron mayor pesu la narrativa o la traducción d’obres n’otres llingües. Dende los últimos años del sieglu XX, dellos autores de narrativa n’asturianu, los más d’ellos pertenecientes a la segunda xeneración del Surdimientu, protagonizaron tamién el procesu a la inversa, llogrando que les sos obres n’asturianu s’asoleyaren en castellanu.
 

Dende l’entamu del sieglu XXI, el relevu xeneracional de la lliteratura n’asturianu ta aseguráu gracies a la entrada n’escena de la que se conoz como ‘tercer xeneración del Surdimientu’, con autores nacios de 1975 p’alantre y que, en munchos casos, participaron yá de la escolarización del asturianu. La poesía y la narrativa, especialmente’l xéneru del cuentu y el rellatu curtiu, son los dos xéneros más trabayaos por esta xeneración, que ye, amás, mui numberosa n’autores. Anguaño, la lliteratura asturianu entama a salir fuera de les nueses llendes y a ser traducida a otros idiomes.
Historia de la Lliteratura Asturiana en Google Books

Dalgunos autores

Sieglu XX (entamaron a escribir enantes del Surdimientu y enllazaron con él):
Manfer de la Llera (1918-2005) Garrapiellu lliterariu asturianu, Cabalgando sol tiempu. María Josefa Canellada (1912-1995) Montesín (primer llibru de la lliteratura infantil n’asturianu). Nené Losada (1921-2009) Cantares Valdesanos, Ente Apigarzos. Eva González (1918-2007) Poesias ya cuentos na nuesa Tsingua, Xentiquina.
 

Primer Surdimientu:
Manuel Asur, Cancíos y poemes pa un riscar (primer obra lliteraria del surdimientu), Xuan Xosé Sánchez Vicente, Camín de señardaes, Cuentos de llingua afilada, La muerte amiya de nueche, Miguel Solis Santos, Les llamuergues doraes (primer novela del Surdimientu), El trunfu prietu, Andrés Solar, Obres completes, Carlos Rubiera, Ñublu de mar y distancia, Roberto González-Quevedo, Pol Sendeiru la nueite.
 

Segundu Surdimientu:
Antón García, El viaxe, Díes de muncho, Berta Piñán, Al abellu les besties, Lourdes Álvarez, Aldabes del olvidu, Xuan Bello, Historia universal de Panicerios, Nel cuartu mariellu, Llibru de les cenices, Mª Teresa González, Heliocentru, Adolfu Camilo Díaz, Añada pa un gueyu muertu, Pequeña lloba enllena d’amor, Miguel Rojo, Histories d’un seductor. Memories d’un babayu, Alfonso Velázquez, L’arume l’escaezu, Xosé Nel Riesgo, El cai nunca duerme, Parque Temáticu, Ismael González Arias, El cuartu negociu, Buscando a Xovellanos, Pablo Antón Marín Estrada, La ciudá encarnada, Xulio Viejo, Les falcatrues del demoniu, Xandru Fernández, Les Ruines, El suañu de los paxaros de sable, La banda sonora del Paraísu.
 

Tercer Surdimientu (o post-surdimientu):
Quique Faes, Malena fecha de sol y de fresa, L’agobiante imperfección de les coses, Pablo Rodríguez Medina, L’Arna de San Atanás, Aires de mudanzar, Les vueltes, toles vueltes, Pablo Rodriguez Medina, Onde seca l’agua, La danza de la yedra, La Cama, Pablo Texón, Toles siendes, Naciu Varillas, Carretera ensin barru.