Abre en Xixón la primera residencia lliteraria d’Asturies

Una de les paradoxes de la vida de les y los escritores ye la que toca al so agospiu: l‘escritor vive, si tien suerte, nuna alternancia esquizoide ente los hoteles (mui dignos) a los que va cuando participa nun eventu lliterariu y el so domiciliu, que, masque consiga vivir de la redolada de la lliteratura, nun suel ser tan dignu.

Ye nesti esquema dual de la vida lliteraria, que tresllada al escritor d’un papel públicu mui empodenderáu a una realidá privada muncho más ruina, qu’encaxen les residencies artístiques y lliteraries.

Anque mui conocíes d’hai tiempu pa los artistes plásticos y d’otres disciplines, nos últimos años tán ocupando un llugar progresivamente mayor na trayectoria de los escritores: al cabu y al fin, tener aseguráu’l caltenimientu demientres un periodu de tiempu permíte-yos a munchos autores poder afondar en proyectos que, d’otra manera, tendríen guardaos en caxón y, sobre manera, asegurase delles selmanes o meses fuera del ritmu aforfugante de la industria editorial.

Los autores asturianos tienen esperiencia dende hai cuantayá nel mundu de les residencies: por exemplu, el novelista Ricardo Menéndez Salmón foi ún de los escoyíos en 2014 pa pasar 11 meses en Villa Concordia (na ciudá alemana de Bamverg) trabayando nun proyectu narrativu; Xuan Bello tuvo en 2021 en Villa Waldberta gracies al Institutu Cervantes de Munich, y los «obradoiros internacionales de traducción poética» de la Illa de San Simón en Galicia, que coordina la poeta Yolanda Castaño, tienen acoyío a autores asturianos como Pablo Texón o Miguel Rodríguez Monteavaro dende la so creación.

De la mesma manera, n’Asturies existen delles iniciatives de residencies artístiques, como les de LLABoral – Centru d’arte, y hai otres que tán en preparación, como la del Faro de Tapia de Casariego o l’antiguu albergue de pelegrinos de La Peña (Mieres). Sicasí, nenguna d’elles nun taba específicamente dedicada al arte lliterariu.

Ye precisamente un proyectu de la gallega Yolanda Castaño, la Residencia 1863 n’A Coruña, la que ta acabante d’inspirar la primera residencia lliteraria d’Asturies, nomada Xixón. Residencia lliteraria. Esti proyectu, que dirixe l’escritor, profesor y activista polos drechos llingüísticos Inaciu Galán xunta la productora Cuatro Gotes, ta empobináu a facilitar a escritores la posibilidá d’agospiase y trabayar nun pisu nel barriu de L’Arena (Xixón), pa poder escribir y tamién participar de les redes de sociabilidá lliteraries de la ciudá y de país.

Acordies colos impulsores d’esta residencia lliteraria, Xixón ye especialmente afayadiza pa esti llabor pola so llarga tradición lliteraria, que pasa per festivales como la Selmana Negra, el festival de poesía POEX o la Feria del Llibru de Xixón (FeLIX), amás de la so rede de biblioteques y llibreríes. Tou ello fai que pueda ser un espaciu bien atopadizu pa la proyección de la lliteratura asturiana al esterior y la creación de redes con otres residencies.

El pisu que conforma la sede de la residencia tien parte de la biblioteca particular del director, Inaciu Galán, que «ta a disposición de los y les residentes que pasen una temporada escribiendo na agora Residencia Lliteraria Xixón» y que «permite conocer a fondu la lliteratura asturiana contemporánea». La intención del proyectu, poro, ye la d’atrayer talentu lliterariu a Asturies y convertir la ciudá nun centru de referencia cultural, pente medies de la organización d’eventos colos residentes «fuera del espaciu pa dar a conocer a los y les autores residentes en Xixón y n’Asturies», y entamar «en cada visita presentaciones llibros, charres col autor o autora y otres actividaes pa les que se cunta col texíu públicu y priváu de Xixón».

La residencia, asina, ta inspirada nel proyectu yá mencionáu de Yolanda Castaño, asina como d’otros como La Casa de Belmonte (Aragón) y Vil·la Joana (Barcelona). Cuenta coles instalaciones precises pal trabayu creativu y ye’l frutu de los esfuercios conxuntos de l’Asociación Ñeru Cultural y la empresa cultural Cuatro Gotes Producciones.