Van contar con 300 places caún

Les pruebes de certificación de Llingua Asturiana adaptaes al Marcu Común Européu de Referencia pa les Llingües pa esti 2021, de nivel avanzáu y intermediu, van tener llugar a partir del sábadu 9 d’ochobre, fecha de celebración del bloque escritu nun llugar entovía por confirmar. La matrícula d’inscripción ábrese’l 5 d’abril en centros d’Uviéu, Xixón, Avilés y Mieres.

Confírmase la celebración del C1, amás del B2, na convocatoria del 2021 de les pruebes de certificación de Llingua Asturiana adaptaes al Marcu Común Européu de Referencia pa les Llingües, con 300 places pa cada esame. Pendiente entovía de la espublización nel BOPA, Educastur yá avanzó les feches de matrícula y celebración.

Del 5 d’abril al 16 d’abril les persones que quieran aspirar a estos títulos oficiales de conocimientu del idioma nel C1 –avanzáu y máximu nivel esistente– y el B2 –intermediu– han de presentar les solicitúes d’almisión. La primer llista definitiva va espublizase’l día 27, teniendo preferencia nel casu de muncha demanda, tres el sortéu públicu fechu’l 22 de mayu pasáu pa tolos procesos docentes del cursu presente, les persones con apellíu qu’entame por ‘DS’ nel sentíu del alfabetu.

La convocatoria pasada, la primer de la historia, contó con munchos más solicitúes que places, cerca de 800 pa 500, polo que quedó fuera xente abondo. Pa esti añu la Comisión Permanente Educación-Cultura cifra en 300 les places pa cada prueba.

Les persones d’esta primer llista van tener que formalizar darréu la so matrícula, previu pagu de les tases correspondientes, ente’l 5 y el 18 de mayu nel mesmu centru nel que fixo’l primer trámite. Éstos son los mesmos que l’añu pasáu: l’IES Aramo d’Uviéu, l’IES Calderón de la Barca de Xixón, l’IES Carreño Miranda d’Avilés y l’IES Bernaldo Quirós de Mieres.

El bloque escritu, el 9 d’ochobre

L’esame va tener llugar otra vuelta n’ochobre, anque entovía nun se confirmó’l llugar. La trés pruebes comunes a tolos aspirantes, la del bloque escritu, van celebrase’l sábadu 9 d’ochobre pela mañana, mentes que les dos del bloque oral va facese, nesti casu de manera individual, a partir del 18.

Adxuntu Tamañu
PDF icon Convocatoria d’esámenes oficiales de Llingua Asturiana 2021 394.62 KB
PDF icon Fueya d’inscripción esámenes oficiales de Llingua Asturiana 2021 229.18 KB
PDF icon Solicitú d’adaptació d’accesu pa discapacidaes y/o TDAH pa esámenes oficiales de Llingua Asturiana 2021 174.45 KB
Educación convoca les pruebes de certificación de los niveles B2 y C1 d’asturianu pal 2021
La Conseyería d’Educación publicó’l pasáu 4 de marzu la convocatoria de les pruebes pa sacar los certificaos de competencia llingüística n’asturianu del presente añu 2021. Anguaño vuelve a convocase la prueba del nivel B2, que se ficiera l’añu pasáu per primer vez, y incorpórase tamién la del nivel C1.
Estes pruebes son una manera d’acreditar la competencia comunicativa en llingua asturiana y tan afayaos a les pautes del Marcu Común Européu de Referencia, un instrumentu que dexa plantear equivalencies ente les distintes enseñances y esámenes d’idiomes. Según esti, el nivel B2 correspuende a un nivel intermediu, en cuantes que’l C1 correspuende a un nivel avanzáu.
Cada prueba almite un máximu de 300 aspirantes. Si hai más solicitúes, les places van axudicase d’alcuerdu con un sistema d’orde alfabéticu que tien como puntu de partida les lletres del primer apellíu a partir de DS (resultáu d’un sortéu públicu). Va haber un primer plazu d’almisión, del 5 al 16 d’abril, nel que s’axudiquen les places del cupu; y un segundu plazu d’inscripción onde se formalice la inscripción y se paguen los precios públicos correspondientes. Namás s’almite la solicitú d’almisión nuna de les pruebes por persona.
Les pruebes de les destreces de comprensión de testos orales, comprensión de testos escritos y producción y coproducción de testos escritos van facese’l sábadu 9 d’ochobre, mientres que les pruebes de producción y coproducción de testos orales van facese a partir del día 18 d’ochobre.