La obra ganadora ye una reflexón “sobro la ciencia que consumimos al falar de lengua”. El filólogu Ramón d’Andrés, cola obra titulada “La ciencia ensin enfotu”, ganó la ventiavu séptima edición del Premiu Máximu Fuertes Acevedo d’ensayu en llingua asturiana que concede la Conseyería de Cultura, Política Llingüística y Turismu.

Los miembros del xuráu destacaron que del trabayu de Ramón d’ Andrés, profesor titular de Filoloxía Española y Asturiana na Univesidad d’Uviéu, “ye un manual básicu p’abrir los güeyos de cualesquier, filólogu o non, sobro la ciencia y la non-ciencia que consumimos, asimilamos y creemos al falar de llingües nel día ente día”. Tamién valoraron el trabayu pola investigación y reflexón” que reflexa la obra.

Nesta edición del Máximu Fuertes Acevedo, y so la presidencia del director xeneral de Política Llingüística, Antón García, el xuráu tuvo integráu poles filólogues y los profesores Marta López y María Cueto; la escritora y tamién filóloga Beatriz Quintana; el filólogu Jorge Arturo Sierra, y el músicu, comunicador y ganador de la pasada edición del galardón, Xune Elipe. Lourdes Álvarez, filóloga del serviciu de la dirección xeneral, actuó como secretaria. El premiu ta dotáu con 6.000 euros.

Ramón d’Andrés (Madrid, 1959), ye profesor titular de Filoloxía Española y Asturiana na Univesidad d’Uviéu. La so trayectoria investigadora ta venceyá a delles temátiques rellacionaes col asturianu. Foi redactor de les Normes Ortográfiques y del Diccionariu de la Llingua Asturiana, obra de l’Academia de la Llingua Asturiana de la que ye miembru de númberu.

Ente la so estensa obra publicada figuren títulos como “Diccionariu temáticu de la Llingua asturiana” (1991), “Encuesta sociollingüística nuna parroquia asturiana” (Deva-Xixón) (1993), “Gramática práctica del asturianu” (1997), “Llingua y xuiciu” (ganadora del Máximu Fuertes Acevedo en 1997), “Cuestiones d’asturianu normativu” (2001-2003), “Xuicios sobro la llingua asturiana. Delles cuestiones básiques avera del alderique llingüísticu n’Asturies (2002)”.