Los finaos Xosé Bolado y José Herrero van recibir tamién una mención especial de l’Asociación d’Escritores d’Asturies.

La xunta direutiva d’esti coleutivu decidió conceder el XVI Premiu de les Lletres d’Asturies por unanimidá a Amelia Valcárcel. La filósofa y escritora ye la merecedora esti añu d’esti reconocimientu a escritores asturianos o residentes nel país «polos sos méritos y trayeutoria nel campu de les lletres, y de la lliteratura nos distintos xéneros».

Les persones encargaes d’escoyer la persona merecedora d’esti gallardón argumentaron la so decisión en que Valcárcel ye «autora de numberoses espublizaciones de prestixu tornaes a dellos idiomes, además d’una rellumante trayeutoria académica» y rescamplaron los sos «munchos y altos nomamientos, la so valentía y la so actitú combativa, rompedora siempre y comprometida, ensin tregua, col feminismu de la igualdá y tolos sos derechos; un feminismu nunca entendíu como inquisitorial, sinón como tradición de llucha pacífica».

D’igual forma reconz que «tanto’l so nome, el so pensamientu y la so dialéutica direuta y ensin tabús, trespasan fronteres y xeneraciones. Figura clave de la Cultura y de les Humanidaes, a la par que reivindicativa, apuesta, dende un entamu, pola paz, la integración, la tolerancia y la postmodernidá y defende que nengún individuu de la especie humana ha ser escluyíu de cualquier bien y de nengún derechu por mor del so sexu, yá que ser feminista ye otra cosa: ye pensar normativamente como si’l sexu nun esistiera».

Caderalga emérita de Filosofía Moral y Política de la UNED, Valcárcel foi fundadora de Conceyu Bable xunto con Xuan Xosé Sánchez Vicente, Xosé Lluis García Arias y Lluis Xabel Álvarez, y llegó a ser presidenta d’esta asociación. Nel añu 1979 publica ‘El nacionalismo asturiano‘ en collaboración con Ramón Cavanilles, onde propón un nacionalismu basáu na reivindicación cultural y na llingua asturiana, y tien escrito ensayos filosóficos y testos lliterarios, amás de feches traducciones.

Del 1993 al 1995 foi conseyera d’Educación, Cultura, Deportes y Mocedá col socialista Antonio Trevín. Anguaño Valcárcel, qu’asocede nel Premiu de les Lletres Asturianes a Carmen Ruiz-Tilve, ye conseyera eleutiva del Conseyu d’Estáu.

Xunto colos Premios de la Crítica

Nel mesmu aconceyamientu, la xunta direutiva tamién decidió dar una mención especial a los escritores-socios finaos esti añu, Bolado y Herrero. Estos reconocimientos danse nun actu al empar que los Premios de la Crítica, que viven la so ventena primer edición.