«Tradición, provocación, mundu rural y xéneru»

Tradición, provocación, mundu rural y xéneru; claves del Premiu “Ojo Crítico” de RNE a Rodrigo Cuevas

Dende la publicación del so trabayu de 2019 ‘Manual de Cortejo‘ y l’entamu del so espectáculu Trópico de Covandoga, Rodrigo Cuevas nun apara de recibir nuevos reconocimientos: Premiu Camaretá al Meyor Cantar en Llingua Asturiana con “Rambalín”; “Mejor Artista Revelación” y “Mejor Álbum de Fusión y Músicas del Mundo” nos Premios MIN de la Música Independiente; finalista nos Premios Odeón na estaya de “Artista Odeón Revelación Alternativo“; y agora, premiu “El Ojo Crítico” de Radio Nacional d’España na categoría de Música Moderna.

«Por ser un carismáticu artista multidisciplinar qu’apostó por traer al sieglu XXI la tradición y el folclore asturianu dende la provocación y el riesgu estéticu», reconoz el fallu del xuráu que, ente otres cuestiones, tamién pon en valor que Cuevas represente «a una xeneración d’artistes que nos últimos años apostó pola recuperación del folclore», faciéndolo amás dende «un posicionamientu de xéneru» y trabayando «dende’l mediu rural asturianu nel que vive y onde collabora en crear comunidá dende l’arte».

Los premios “El Ojo Crítico” fueron creaos en 1990 por Radio Nacional d’España pa reconocer y promocionar el trabayu d’artistes nes estayes de música clásica, narrativa, poesía, cine, teatru, música moderna, artes plásticas y danza. Nesta edición de 2021, ye la primer vez qu’un músicu asturianu algama esti gallardón que tamién tien premiáu a otros artistes que trabayen coles músiques populares y/o en llingües minorizaes como Manel (2011), Belako (2015), Rosalía (2017), Maria Arnal y Marcel Bagès (2018) y C. Tangana (2020).

“Rambalín”, XII Premiu Camaretá al Meyor Cantar en Llingua Asturiana