Fancín Al Son: L’orixe del periodismu musical asturianu

El primer intentu d’una publicación dedicada dafechu a la música d’espresión asturiana tuvo a un fancín, de nome Al Son, como referencia. Editáu en 1990, centrábase nel mundu de la música folk y tradicional. Dende L’AMCA recuperamos y dixitalizamos los 2 númberos asoleyaos y los conteníos de la tercer entrega inédita.

// Calca equí pa lleer na Hemeroteca los númberos del fancín Al Son //

Anguaño tamos avezaos a lleer n’asturianu noticies, cróniques o crítiques que tienen al panorama musical del país como protagonista. Pero hebo un tiempu en qu’esto nun yera asina, yeren díes nos que la falta de medios y espacios dedicaos a la nuestra música facía de l’autoxestión la única respuesta posible a aquella situación. Güei son dellos los periodistes qu’a esta formación añaden una conocencia afechisca de la llingua asturiana y ufierten conteníos musicales nesti idioma. L’amateurismu d’aquellos primeros momentos de «periodismu musical» sustituyóse agora pol profesionalismu, en cabeceres bibliográfiques o dixitales de calidá -l’Anuariu de la Música Asturiana o esti mesmu portal son bona muestra d’ello-.

El primer intentu d’una publicación dedicada dafechu a la música d’espresión asturiana tuvo a un fancín, de nome Al Son, como referencia. Editáu pol colectivu avilesín L’Esperteyu, centrábase nel mundu de la música folk y tradicional que se facía n’Asturies. Namás llegaríen a ponese en circulación dos númberos nel añu 1990 -el 0 (xunu) y el 1 (payares)-; asoleyando nel ‘Entamu’ de la primer entrega’l porqué d’un proyectu d’esti calter: «…el movimientu folki asturianu tenía de too (festivales, alcuentros, programes, grupos, chigres, discográfiques…) menos una publicación qu’espeyare la demanda qu’a la nuestra parecencia hai na nuestra tierra sobre esta mena de música». Pente les sos páxines podemos alcontrar entrevistes, cróniques de conciertos, crítiques de discos, reportaxes y delles secciones más. Tampoco faltaron los artículos sobre otres realidaes musicales, casu de la Nueva Canción occitana o’l folk escocés. Na nómina de collaboradores figuraben nomes bien conocíos de la escena musical asturiana como Ignaciu Llope, Antón Barquero (Balandrán), Xune Elipe (Dixebra) o Vítor Álvarez (Xéliba).

Nel AMCA recuperamos y dixitalizamos los dos númberos d’Al Son distribuíos y tamién los conteníos de la so tercer entrega (xunto con delles ilustraciones que diben formar parte d’ella) que nun llegaría a asoleyase. Ponemos esti material históricu y mui difícil d’alcontrar a disposición de tolos aficionaos y investigadores del fechu musical asturianu, nun exerciciu d’arqueoloxía folk que puede valir pa conocer l’empiezu del periodismu musical en llingua asturiana.