Xilberto Llano gana’l Premiu «María Josefa Canellada» de Lliteratura Infantil y Xuvenil cola obra «Boliescritu de primavera».

La obra Boliescritu de primavera, de Xilberto Llano Caelles, foi gallardonada col Premiu «María Josefa Canellada» de Lliteratura Infantil y Xuvenil n’asturianu na so decimocuarta edición.

El xuráu quixo destacar del trabayu de Llano Caelles «el tratamientu del tema del confinamientu de 2020 dende una perspectiva orixinal y ensin cayer en tópicos», amás de la so «alta calidá lliteraria y el bon usu de la llingua asturiana». L’acta del xuráu resalta tamién «el nivel xeneral de calidá de les obres presentaes y la diversidá de perspectives qu’aborden».

Nesta edición, y baxo la presidencia del director xeneral de Política Llingüística, Antón García, el xuráu tuvo integráu pol alcalde de Cabranes, Gerardo Fabián; Alonso Zamora Canellada, familiar de María Josefa Canellada; les escritores Alba Carballo y Iris Díaz Trancho; Penélope Miranda, responsable del  Serviciu de Normalización Llingüística del conceyu de L.lena, y Inaciu Galán, profesor y escritor, coautor de la obra ganadora de la pasada edición. Actuó como secretaria Laura Marcos, filóloga de la Dirección Xeneral de Política Llingüística.

Xilberto Llano Caelles (Arroes, Villaviciosa, 1965) ye llicenciáu en Filoloxía Hispánica pola Universidá d’Uviéu y profesional de biblioteconomía. En 1987 llogró’l Premiu «Xosefa Xovellanos» cola novela De Corinto, de Grecia. En 1988 publica la so segunda novela, Sencia. En 1995 llogra’l Premiu «Xuan María Acebal» de Poesía col llibru Silabariu (1996). Ye tamién autor de les traducciones al asturianu de les  obres: Alicia nel país de les maravíes (1989) y L’otru llau del espeyu y lo qu’Alicia atopó ellí (1992) de Lewis Carroll, xunto con El relatu d’Arthur Gordon Pym d’Edgar Allan Poe.