La repercusión de la producción madreñera na economía rural d’Asturies foi enorme en dómines pasaes. La vienta de madreñes dexó a munches families cuntar con unos modestos ingresos, seique los únicos.


Lo común yera la vienta nos mercaos de los conceyos y en menor midida en comercios especializaos, anque tamién se practicaba’l serviciu a casa”, nel que’l madreñeru, calteníu y agospiáu, aprovía de madreñes al grupu familiar para una bona temporada.

La madreña representa l’últimu estadiu evolutivu de la familia del calzáu de madera, que s’estiende per amplies zones de la Europa llatina y xermánica.

La diversidá tipolóxica paez confirmar que’l cordal Ástur-cantábrica foi’l núcleu d’espardimientu d’esti calzáu. Les frecuentes agües que favorecen les «caleyes» enllamorgaes/embarraes nel mediu rural, la esistencia de «lames» o praos anubiertos y una serrapatosa orografía, con bayura de montes, que suministren la madera necesario pa la so fabricación, son factores, que xuníos a la tradición cultural influyeron na estraordinaria acoyida qu’atopó la madreña n’Asturies.

Pa enllargar la vida de la madreña aplíquense barnices o pintures, pero fai entá cincuenta años yera habitual un tratamientu d’afumáu, que demostró ser una escelente protección contra’l mugor y los insectos xilófagos, facilitando tamién la decoración.

Mientres en Quirós y L.lena l’afumáu llévase a cabu con felechos secos que producíen una coloración acoloratada, nel restu afumase con corteces d’abeduriu y escobes de monte, resultando nesti casu d’un color negru mate, que realzaba la guapura de la madreña.»