Oríxen:

Los oríxenes del ciclu de Fiestes del Antroxu n’Asturies súmense na nueche de los tiempos, y pa desplicalos ye mester afondar nel tiempu y na hestoria d’unes práctiques, ente relixoses y festives, que s’espardíen per bona parte del continente européu dende muncho enantes del Cristianismu.

Los anicios de les Mazcaraes d’Iviernu presenten munches semeyances n’europa, un espaciu nel que se xuntaben les vieyes cultures indoeuropees y mediterránees, cuyos calandarios festivos, sociales y relixosos coincidíen nun especial apegu a los plenilunios y toles etapes vitales de la Naturaleza y los sos períodos.

Les vieyes relixones indoeuropees, sobremanera la céltica, consideraben que l’añu taba dixebráu en dos metades. Del ún de Mayu (Fiesta de Beltaine cristianizada na Cruz de Mayu) hasta l´ún de payares considerábase la metada de “La Vida”, primavera y branu, meses de la lluz, onde la xuventú y lo nuevo ye lo protagonista. La segunda metada, los meses que nel nuesu calandariu van de payares a mayu (1 de payares, fiesta del Samaín cristianizada en Tolos Santos) representaben la metada de “La Muerte”, meses d’iviernu, de recoyimientu , de fríu, de tiniebles, y escuridá, onde la xente mayor facíase la protagonista. Yera entós cuando toos se xuntaben delantre del llume del llar a senti-yos desplicar les vieyes tradiciones, saberes y lleendes.

Dientro d’estos periodos había dos momentos perimportantes: los solsticios, cuando se talantaba que tenía llugar un cambiu natural perimportante. El solsticiu de branu o San Xuan simbolizaba’l momentu de más puxu del sol (el día más llargu y la nueche más curtia), y nel solsticiu d’Iviernu, o Navidá (xustamente seis mes depués. La diferencia 24 de Xunu/ 25 d’Avientu, d’un solu día, ye por mor d’un erru de los antiguos calandarios) simbolizábase’l mayor puxu de les tiniebles; el día más curtiu y la nueche más llarga. Dende Navidá, los díes van allargando y les nueches mengüen, ye’l primer triunfu de la lluz, del sol, sobre les escuridaes, y por ello nun ye d’estrañar que’l Cristianismu garrare esta fecha tan simbólica pa conmemorar el nacimientu de Cristu (vencedor de la muerte y la escuridá).

Nun ye d’estrañar entós que les antigües cultures indoeuropees, orixen de civilizaciones tan determinantes pa la humanidá como la céltica, la griega, la romana, y la indú, ente otres munches, que dieron llugar col tiempu a dalgunes creencies y relixones de les más estendíes agora nel mundu, talantaren que nesti momemtu tan importante acontecíen una retafila de prodixos. Pensábase que nesti tiempu, abríase una puerta al Otru Mundu, al Inframundu de los difuntos, y diben acontecer fechos tremendamente máxicos y sobrenaturales.

Si pel solstíciu de branu apaecíense seres tan positivos comu les xanes y les sos riqueces, y acontecíen portentos sobrenaturales, pel solsticiu d’iviernu acontecía otru tantu… apaecíense seres del Otru Mundu, pero seres más relacionáos coles tiniebles y la muerte… principalmente difuntos y demonios. La so llegada simbolizábase coles antigues dances de mázcares, buscando asina venerar los poderes d’estos seres… mázcares representatives de dioses y demonios, munches veces simbolizaos por animales o mostros, mázcares que buscabenq atrayer, en positivu, la maxa d’estos visitantes .

Les ánimes de los difuntos tamién podíen visitar los sos antiguos llares per esti tiempu. Por ello yera mester dexa-yos alimentu na casa nes nueches nes que se pensaba que veníen a visitar les que fueren les sos moraes. Nun comíen l’alimentu material que se-yos dexaba, alimentábense, dicíase, de la “esencia”, ye dicir “el golor”. Restu d’esta antiquísima veneración a les ánimes, son les tradiciones de la Nueche de Reis, onde hasta la mesma “Cabalgata” nun ye más qu’un vieyu Baille de Mázcares cristianizáu.

Evolución del Antroxu y de les máscares d’inviernu:

El Cristianismu nun pudo, nun fue a desaniciar fiestes de tan fondu raigañu popular, polo que, comu siempre acontez nestos casos, dempués de condergales, entemecióles cola so propia relixón y liturxa. Ún de los másimos sancionadores de les vieyes mazcaraes medievales fue’l perconocíu teólogu astur Beatu de Liébana, de toles maneres, al dir entemeciéndose, o meyor dicho barnizandose, con una capa de Cristianismu, les mazcaraes d’iviernu fueron bendicíes, nun siempre del too, pola autoridá eclesiástica.

Un casu mui significativu de la cristianización ye, n´Asturies, la célebre “Reisada”, baille de mázcares que se representaba n’Ibias al rodiu del Día Reis. Los mázcaros, que representen dellos estamentos sociales del llugar, depúes de pasar dellos díes percorriendo´l conceyu, xúntense´l Día Reis a la puerta misa, faen una estrueldosa “función”, un a modu de Baille de Mázcares, y el públicu canta un romance mientres-yos da l’aguilandu. El romance, fai referencia al nacimientu de Cristu y l’Adoración de los Magos, pero hai un datu mui a destacar: A Reisada nun puede, enxamás, y baxo nengún conceptu, entrar na ilesia, ye más, consideraríase un sacrilexu y casi que blasfemia que lo fixera. Espera al públicu fuera pa, n’acabando la misa, entamar toos la función.

El Guirria ye otra de les supervivencies del Antroxu Navidiegu astur. Entamase nel llugar de San Xuan de Beleño, capital del conceyu de Ponga, el dia de San Silvestre, “la postrer fiesta del añu”. Esi día faise un “Sortéu de Mozos”, derivación de los antiguos “Sorteos de Devotos” que se facíen pel mesmu día n’Asturies pa empareyar, al debalu, mozos y moces con un sortéu que se facía sacando papelinos colos nomes de los rapazos y les rapaces d`unos saquinos o filoxes.

Al día siguiente, añu Nuevu, los rapazos del sexu masculín que nun pasen de dieciocho años, percorren tola redolada montaos a caballu, pidiendo l`aguilandu, y con ellos va El Guirria. Esti ye l`únicu que va enmazcaritáu y vistíu comu los vieyos guirrios asturianos; con una levita de llargues sayes y un gorru llargu y picudu. Toos canten coples relatives al Añu Nuevu y l`Aguilandu, mientres el Guirria tírase a escorrer les moces qu’alcuentra pel pueblu.

Talu como tamos comprobando, l’antroxu asturianu entamaba yá nes feches navidiegues ( “Antroxu yá´l día de Navidá”), precisamente cuando empezaba esti vieyu ciclu precristianu, y yera entós cuando salíen los primeros mázcaros a pidir l’Agilandu (obsequies y regalos en metálicu o n’especia) per pueblos, villes, y llugares, una costume que casi que desapaeció tres de la Guerra Civil per tres importantes custiones: les llaceries de la mesma guerra y posguerra, la prohibición oficial d’esti tipu de celebraciones y l’ésodu rural.

Estos factores acompañaos de les prohibiciones y del dispreciu qu’entamó pa cola cultura popular y autóctono, (salvo unos rasgos más folklorizantes, acordies cola política “oficial”), fixeron cásique desapaecer el vieyu y llargu Antroxu Astur, reduciéndolu, cuando s’entamó a recuperar la fiesta, al Xueves de Comadres, Domingu’l Gordu, Llunes y Martes d’Antroxu. Sicasí, en dellos llugares queden entá raigaños de les Mazcaraes de la Navidá, una d’elles ye A Reisada, y otra El Guirria del Conceyu de Ponga.

Un estudiu seriu y pormenorizáu de la nuestra cultura podría ser a achisbar otros raigaños n’otros llugares. Sábese que’n dayuri tentóse de siguir Antroxando, sobre too pela parte de los más rapazos del pueblu o del barriu que nun poques veces foron escorríos o hasta multáos pola “autoridá”.

Romanización y Cristianización:

N`Asturies la conquista Romana dexó tamién el so posu cultural, anque por mor de la correspondencia de munchos vezos astures colos romanos (non en vanu hai unos anicios comunes indoeuropeos en munches custiones) nun sabemos satamente cual ye`l calter deriváu de la romanización y cual l`anterior. Tamién n`antigua Roma esistíen famoses festividaes de mázcares, basaes nun cultu a los dioses Manes, espíritus de los muertos, y nes mazcares de muertos y animales. Les Saturnalies, les Lupercales, Les Matronalies, y delles más, teníen llugar nel mesmu tiempu.

Toles fiestes mentaes tán fondamente rellacionaes con veneraciones de les ánimes o seres del inframundu. Por ello ye mester tamién saber preservase d`aquellos entes que vienen a la tierra col enfotu de facer el mal. Por ello ye mester facer munchu roídu, armar xaréu y espolín, que ye lo que les espanta. Esta costume tamién tien equivalencies en casi que toles cultures del mundu, por ello munchos personaxes del Antroxu son quiciás tan folixeros, enllenos de campanes y lloqueros, glayando al altu la lleva, y comportándose enlloquecidamente. Hai qu’armar xaréu. Agora nun sabemos sátamente por qué, “Porque ye Antroxu” diz la xente.

Hai 2.000 años los antepasaos de los nuesos Guirrios, Zamarrones, Sidros, Vexigueros, Bardancos, Zarrapastros, y otros milenta seres y personaxes del Antroxu yá lo facíen. Les campanes de les ilesies cristianes son un restu d’aquella costume. Nun siempre que se picaba la campana yera pa llamar a misa o a Conceyu, sinón pa espantar Güesties (ánimes en pena), Nuberos, (xenios de les nubes), bruxes y otros milenta seres del “Inframundu” que hasta hai bien poco dábennos miéu y llercia. ¿O Dánmosla entovía?

Seya como fuere, el cristianismu tuvo que pasar per estes fiestes paganes. Ye más, pintáron-y perbién pa tentar de substituíles pol so equivalente cristianu, anque nun siempre col resultáu apetecíu… Mázcares, dances, bailes, glayíos, y otres costumes, son nun solo una veneración d’iviernu, son una lliberación de les sensaciones y los sentimientos, son otra puerta abierto a lo que les autoridaes dieron siempre en llamar “escesos”, escesos de la carne (los sexuales y gastronómicos), y escesos nel tratu a quien deben respetu. Unos díes pa que la xente pueda ponese lloco y esconxurar los mieos de tol añu y metese coles más sagraes instituciones d’un mou llegal y permitíu.

Ún de los másimos esponentes d’ello fue’l de L’Obispín, una burlla consentida a les másimes instituciones que se cellebró dende la Edá Media hasta’l sieglu XVIII. L’Obispín fue una mazcarada que se celebró na Catedral d’Uviéu, netu que n’otres grandes catedrales europees, y tenía llugar los díes ente’l 18 d’Avientu y los Santos Inocentes. Estos díes los obispos y capellanes cedíen el so puestu a los molacinos, novicios, neños cantores y estudiantes nos seminarios que se vistíen coles ropes de la liturxa y facíen mofa y xirigoncia pública de los ritos cristianos.

Ún d’ellos yera l’Obispín, que yera’l centru d’atención, vistíu con tol boatu y acompañáu d’un públicu gayasperu que, faciendo de fieles, reíen les ocurrencies de los nuevos eclesiásticos Y nun faltaben los coros desafinaos a propiu intentu, canciones de risión… hasta l’organista tocaba les pieces litúrxiques a mala manera pa dar tovía más aquel al actu. Mesmamente, entamábense salides y “visites oficiales” del Obispín y el so séquitu per ilesies y monesterios, col enfotu puestu n’esparder las folixa d’esos díes per tolos llaos. La costume fue prohibida pola Ilesia Católica nel entamu del s. XIX y enxamás tornó a facese.

El Xueves de Comadres:

Anque dellos autores afirmen que pue tener un orixen distintu al Antroxu, el Xueves de Comadres ye una tradición fondamente asturiana perfechamente enxertada dientru d’esti ciclu festivu. Nesti día les muyeres son les protagonistes, xúntense, faen conceyu, y celebren tamién un pocu un día de “Lliberación”. Nun escaezamos que’l papel de la muyer nes sociedaes patriarcales tuvo siempre relegáu al de los homes, inclusu en cultures que presumíen de da-yos un tratu más humanu, igualitariu, y lliberal.

Depués de munchos años d’escayencia, el Xueves de Comadres vuelve a recobrar esplendor, anque más adaptáu a les nueves sociedaes urbanes, especialmente en Xixón y La Pola Siero. En Xixón caltuvieren munchos años esta costume les famoses Cigarreres de Cimadevilla, les trabayadores de la fábrica tabaco, a les que se xuntaben les sos afiaes, y otres muyeres coles que subien a Ia Providencia, nes afueres de Xixón, a pasar la tarde de plática y merendar les casadielles y les “teresites” (llambionaes típicamante asturianes).

En La Pola Siero les muyeres subíen al llamáu Prau Malatu o Prau Picón a merendar bollos preñaos, sidra, y casadielles, ente otres coses. Sábese de la esistencia d’un Xueves de Compadres, dedicáu a los homes, qu’en dalgunos llugares treslladose al domingu siguiente (“Domingu’l Gordu”), costume desapaecida n’actualidá.

L’Antroxu Asturianu de güei:

Al recuperase ente los años 70-80 la fiesta del Antroxu, bona parte de la tradición astur taba desapaecida o sumida nel escaezu. Por eso, al “reponer” la fiesta fíxose munches veces ensin tener en cuenta les caracteristiques de les Mazcaraes asturianes. Amás, bona parte de la población asturiana naciere y creciere dientro de les cuatru décades de dictadura que torgaron esta festividá. La tradición astur, salvu en dellos casos, taba prauticamente desaniciada.

Por eso, cuando dellos Conceyos quixeron entamala colos actos del Antroxu ellaboraron un programa que yera, más qu’un Antroxu Astur, un calcu del Carnaval de Río de Janeiro nel qu’hasta les murgues y comparses danzaben al son del ritmu brasileiru. A fin de cuentes nun se facía otrotro qu’imitar lo que se vía pela televisión. De toles maneres en munchos llugares fue recuperándose l’Antroxu típicu del llugar, anque siempre reducíu a los cuatru díes clásicos ente’l Domingu’l Gordu y el Martes d’An troxu. Inclusu en delles localidaes allarguen o treslladen les Mazcaraes más allá del Miercoles de Ceniza, pero enxamás se-yos ocurre recuperar l’Antroxu ya’l Díi de Ñavidá, comu se facía antañu.

Agora conviven nel Antroxu les tradiciones asturianes coles tradiciones del “Carnaval” d’otros llugares, nuna mistura asemeyada a la que se ta dando en toa Europa. De toes formes el creciente puxu recuperador del Antroxu Astur, rellacionáu con toles demás muestres de la nuestra cultura, va a más, gracies al enfotu creciente de munchos organizadores.

Los finxos enrriba espuestos nun son más qu’un averamientu a delles costumes y carauterísitiques del Antroxu asturianu, y a los sos anicios. Hai bonos y estensos eatudios que pormenoricen muncho más tolo espuesto. De toes manerea ye entá muncho lo que ye mester estudiar y analizar. Futuros trabayos d’etnologos, folkloristes, o hestoríadores puén dar a conocer munchos datos agora desconocios, o facer nueves y distintes llectures de delles de les investigaciones feches hasta agora. Faise necesario atopar más datos sobre les fiestes del Antroxu y lea Mázcares per tola xeografia astur, pues bona parte d’elles puén perdese pa siempres, Nun momentu nel que munchos ayuntamientos y organizaciones tan enfotaos en recuperar, dafechu, el típicu Antroxu Astur talu y comu se facía nos sos pueblos, ye urxente asoleyar nuevos datos sobre estes celebraciones, asina comu que los sos promotores de les mazcaraes sepan asesorase a la hora d’entamar los actos del Antroxu.

Semeyes ya illustraciones:

1ª.-  Rueda l’Añu o tamién nomáu Calendariu Celta. Fonte: Living and Learning.com

2ª.- Astures transmontanos celebrando’l Solsticiu d’Iviernu. Autor: Estorbín

3ª.- La Güestia o procesión d’ánimes. Fonte: Tradiciones y mitos.com

4ª.- Comentarios al Apocalipsis, Xuiciu Final, obra del Beato de Liébana nel sieglu X. Fonte: Universidá de Valladolid.

5ª.- Un Guirria nel conceyu de Ponga – Asturies. Autor: J. Arturo Suárez Prendes

6.- Un Zamarrón de Retruyés nel conceyu L.Lena – Asturies. Autor: Gausón Fernande

7ª.- Sidros de Valdesoto – Sieru – Asturies. Fonte: El Cencerru

8ª.- Os Reises de Tormaleo n’Ibias – Asturies. Fonte: Tormaleo.blogspot.com

9ª.- Dulce tradicional asturianu nomáu “Teresitas”, propiu del Xuves de Comadres. Autora: Cova.  Fonte: comoju.com

10ª.- Antroxu d’Avilés. Fonte: Asturiasbyme.com

11.- Antroxu de Xixón. Fonte: batukadalosplayos.com