Por cuenta de la celebración del Día Internacional de la Llingua Materna, dende la Conseyería de Cultura, Política Llingüística y Turismu y en collaboración cola Conseyería d’Educación, anímase a toles comunidaes educatives del Principáu d’Asturies a participar nos díes 22 y 23 de febreru del 2021 na llectura y reflexón del manifiestu que s’acompaña.

El cuidáu y la responsabilidá de caltener una llingua materna como la nuestra ye un llabor de toes y toos y un apueste de futuru.

Fomentar el multilingüismu pa la inclusión na educación y la sociedá

Con esta edición del Día Internacional de la Llingua Materna 2021, que tien por lema Fomentar el multilingüismu pa la inclusión na educación y la sociedá, la UNESCO busca reconocer el papel de les llingües y el multillingüismu nel fomentu de la inclusión, y nel cumplimientu de los Oxetivos de Desenvolvimientu Sostenible, que se centren en nun dexar p’atrás a naide.

El reconocimientu y respetu pola diversidá llingüística y cultural contribuyen a fortalecer la unidá y la cohesión de les sociedaes. Estes son les bases pa una paz más duradera, tanto dientro como ente les sociedaes, que llevaron a la UNESCO a tomar la decisión de celebrar el Día Internacional de la Llingua Materna anualmente.

Manifiestu pola Llingua materna (pdf)

Píldores educatives pa trabayar nel aula:

Presentación con motivo de la efeméride (Genially)
Conseyería de Cultura, Política Llingüística y Turismu
Realizada por: Claudia Gutiérrez Lueje del IES Avelina Cerra (Ribadesella)

 

 

Güei ye’l Día Internacional de la Llingua Materna y nun mundu cada vez más globalizáu nel que según la UNESCO, cada mes sumen 2 llingües y de les 6.000 qu’esisten, la metá atopense en peligru d’estinción, reivindicamos la llingua de les nueses güeles y les nueses madres.

La tema del Día Internacional de la llingua materna 2021 “Fomentar el multillingüismu para la inclusión na educación y la sociedá” reconoz que les llingües y el multillingüismu pueden fomentar la inclusión, y que los Oxetivos de Desenvolvimientu Sostenible centrense en nun dexar a naide tras.

La UNESCO considera que la educación, basada na primer llingua o la llingua materna, tien d´empezar dende los primeros años d’escolaridá, una y bones l’atención y l’educación de la primer infancia son el fundamentu del aprendizaxe.

La idea de celebrar el Día Internacional de la Llingua Materna foi una iniciativa de Bangladesh. Foi aprobáu na Conferencia Xeneral de la UNESCO de 1999 y reparóse en tol mundu dende l’añu 2000.

La UNESCO cree na importancia de la diversidá cultural y llingüístico para les sociedaes sostenibles. Nel marcu del so mandatu en pro de la paz, trabaya para caltener les diferencies de cultures ya idiomes que fomenten la tolerancia y el respetu de los demás.