OS REISES D’EL VALLEDOR.

Os Reises del Valledor, ancestral mazcarada que permanez viva n´ El Valledor (Ayande)

  • Facebook
  • http://fontetadelvalledor.com/
  • @osreisesdelvalledor 

Celébrase na parroquia de San Salvador d’El Valledor (Asturies) y recupérase en 2009 dempués de más de 50 años ensin celebrase. Celebrábase en redol a Reyes y na actualidá, el sábadu más cercanu a dicha festividá. Foi recuperada gracies al enfotu de Xosé Antón Ambás y el colectivu Vezos Ástures.

Na actualidá, son los vecinos del pueblu quién coyeron el relevu y percuerren los pueblos de Villalaín, San Salvador y Fonteta.

LOS PERSONAXES:
«Davos roupa ría» (Os feos): El Choqueiro, qu’abre la comparsa; a Cardadora; a Basoira; el Rodalo y el Maragatu (que siempres lleva una romana) y a Maragata, que se pon de partu y pare. Os feos son los que faen trastaes y nun falen por que naide reconoce.

«Davos roupa boa» (Os guapos): El Soldao, el Valencianu y as Madamas. Estos son los que van casa per casa pidiendo’l guinaldo y pallo son los que canten. Van con ropa bono, de blancu y mazcaritos guapos.

Mientres Os Guapos canten, Os Feos encarguense de barrer pa dientro de casa, entrar na corte y sacar el ganáu, desordenar les coses….

Es descortesía
y es desobediencia
A puertas de un hombre
cantar sin licencia
Licencia pedimos
Pra Reises cantar
Antes de las doce a Belén llegar.

𝗣𝗥𝗜𝗠𝗘𝗥 𝗣𝗥𝗘𝗠𝗜𝗢 para «𝘾𝙝𝙚𝙜𝙖𝙣 𝙊𝙨 𝙍𝙚𝙞𝙨𝙚𝙨» de Lorena Francos, 2020 LORENA FRANCOS FOTOGRAFA


Dende va una década, hai un día al añu nel que’l silenciu d’El Valledor ruémpese pa recibir a la mazcarada de ‘Os Reises’.  La tradición recuperóse en 2009 y dende entós, llueva o ñeve, nun faltaron a la cita’l fin de selmana más cerca de la festividá de Reis. Foi l’asociación Conceyu de Cultura Tradicional Vezos Astures la que s’encargó de recoyer de la tradición oral tola información sobre esta comparsa, que llevaba mediu sieglu ensin facese, y l’Asociación Cultural Amigos de Fonteta tomó dempués el testigu tratando de recrear lo que se facía antiguamente.

Son 11 personaxes en total, dixebraos ente los guapos y los feos, ‘os de a roupa boa’ y ‘os de a roupa ruía’.

Los feos encabecen la comitiva. Al frente siempre ‘el choqueiro’, que da anuncia de la llegada de ‘Os Reises’ y ye l’encargáu de protexer la comparsa, pa que naide-yos quite les sos mázcares. El más traviesu y revoltosu ye ‘el rodalo’. Armáu col tradicional preséu que s’usaba pa sacar la brasa del fornu pan, nun dexa d’arrodalar a toos y a tolo que s’alcuentra al so pasu. Xunto a él ‘a cardadoira’ que, amás de cardar la llana, preocúpase de despioyar a tolos presentes. Completen el llistáu de los feos, ‘los maragatos’.

Nel grupu de los guapos, ‘el militar’ y ‘el valenciano’ y les sos respectives madames, precedíos pol únicu a cara descubierta: ‘la gocha’. La so misión, sacu en mano pa recoyer l’aguilandu, ye llegar a les puertes y entrugar si se pue cantar.

Asina percuerren cada añu los pueblos de Vilalaín, Fonteta y San Salvador, contaxando’l so bon humor y entusiasmu a tol que s’atopen pel camín. Dende’l primer momentu los vecinos volcáronse col proyectu y xunto a ellos l’abondosu públicu que, cada vegada más, llega dende dellos puntos de toa España pa vivir esi día.

Fieles a la cita, ‘Os Reises’ volverán a percorrer El Valledor el 4 de xineru viniente cantando, baillando y pidiendo l’aguilandu.


Os Reises del Valledor: recuperando les raices nes fiestes d’iviernu

Os Reises del Valledor, una ancestral mazcarada que cumple diez años dende la so recuperación y toma más fuerza cada edición,ufierten la posibilidá de celebrar estes feches al estilu más puramente asturianu, al marxe de fiestes navidiegues y campañes comerciales

Os Reises son una de les amueses más antigües de les mazcaraes d’iviernu, que vienen venceyaes a celebraciones precristianes d’entamu del añu y enredaes nos ritos naturales d’eres bien antigües. Yera costume que se celebraren tolos años, unos díes antes del 6 de xineru, día en que se xuntaben les comparses de moces pidiendo l’aguilandu amazcaraos, unos con pieles, representando lo vieyo y la naturaleza (“los tolos”) y otros con ropa bono”, representando la modernidá.

El Choqueiro, la Basoira, el Rodalo, la Cardaora, la Gocha, el soldáu y la so madama, el valencianu, la valenciana y los Maragatos son los once personaxes que van percorrer esti sábadu los pueblos de Villalaín, San Salvador y Fonteta -nesi orde- nel conceyu d´Ayande, fieles a la so cita y dispuestos a ufiertar cantares, bailles y munches trastaes.

Anguaño celébrase amás un concursu de fotografíes de Os Reises, dotáu con un premiu de 250€ pa la meyor imaxe y de 150 pa la segunda. La fiesta, como nun puede ser d’otra manera, va rematar con una comida popular pa tolos asistentes.

Esta costume recuperóse dempués de mediu sieglu gracies a los testimonios de los vecinos del Valledor y al so enfotu na recuperación de les sos señes d’identidá cultural, según pol sofitu necesariu del Conceyu d´Ayande, asociaciones de vecinos ya investigadores del folclor que desinteresadamente collaboraron nesta tradición, empuesta nel marcu y contestu onde verdaderu sentíu: nos llugares que lu han calteníu viva y dientro d’esi universu que dende fai miles d’años vien construyendo la tradición.