Los Guilandeiros constitúin una comparsa con dellos personaxes: la dama y el galán, la xitana, el ciegu, el cura, el médicu, el limpiabotas, l’osu, los xamasqueiros, el xastre, el diañu, los negrinos… que s’axunten na villa de Tinéu para, darréu, percorrer dellos pueblos del conceyu acompañaos d’una banda tradicional, onde, amás representen una pequena obra. Anguaño tuvieron en La Preda, Pousada y El Faedal.

En 2020 el grupu incorpora la figura de ‘los guapos’ y a los neños de la escuelina.

Esta tradición foi recuperada en 2012, por Rosa Fernández Delgado, directora de la Escuela de Música de Tinéu, y Elías Vega, dempués de 70 años nel olvidu. Aurelio del Llanu, en 1921, documenta per primer vegada un aguilandu que se celebró n´Obona (Tinéu): «los mozos piden l’aguilandu vistíos de personaxes d’una comedia que representaríen d’antiguo. Formen la compañía un galán, una adomadura, un soldáu, un ciegu col so criáu, un médicu, dos chamasqueiros, unu que lleva una bixiga…».  Fonte documental: «Los Guilandeiros de Tinéu» de Elías Vega

Asturies.com

Guilandeiros, Mazcaraos, Zamarrones, Os Colmelos y Mazcaritos tornen más tradicional l’Antroxu 2020

Dellos llugares del país entamen les sos mazcaraes y ritos mientres estos díes.

Los Guilandeiros de Tinéu van salir mañana y van percorrer Naraval y Navelgas, pela mañana, y Zardaín pela tarde. La ruta va principar a les 10.45 hores, con llegada prevista a Naraval pa les 13 hores, mentes que pela tarde los xamasqueiros, el vixirigueiru, el ceniceiru, la dama ya’l galán, el diablu, el cura, la preñada, l’osu, el zapateiru, el médicu, el ciegu col criáu, el xastre, los Guapos y el chapeiru, ente otros personaxes, van siguir pidiendo l’aguilandu dende les 17 hores.

En Rozaes, Villaviciosa, la folixa céntrase nel Domingu’l Gordu. Los Mazcaraos van salir a les 15 hores de Sampedrin pa pasar per Sopeñes, Fabares, Morvís, Triás, Sanzornín, Villanueva y Piñera.

Los Zamarrones, de Ḷḷena, van dexase ver dos vegaes. La primera va ser mañana en Campumanes a les 20 hores, na vuelta d’esta mazcarada a la zona rural del conceyu depués de munchos años, y la segunda’l Martes d’Antroxu cola tradicional Cencerrá per La Pola sobre les 20 hores.

Mañana va correse l’entrorio en Tormaleo, Ibias. La tradición d’Os Colmelos va entamase ente los pueblos de Luiña, Buso y Vilares dende les 19 hores.

Una axenda amplia van tener estos díes los Mazcaritos d’Uviéu, que yá salieron ayeri, Xueves de Comadres. Van dexase ver pel cascu antiguu’l sábadu (17 a 22 hores), el Domingu’l Gordu (de 12 a 15 hores), el Llunes d’Antroxu (de 17 a 20 hores) y el Martes d’Antroxu col Entierru la Sardina (a partir de les 20 hores).