Son mui significatives les declaraciones del ganaderu José Manuel Villabrille a «El Campo de Asturias». Ta al frente de la so ganadería familiar de Bartuelu de Santuyanu, nel conceyu d’Ayande. Nesti momentu, metanes l’iviernu, tríen con 85 vaques, 3 toros y 13 xatos, concretamentre de raza carreñana, conocía comercialmente como «asturiana de les valles».

Tamién cría unos cuantos gochos y, notru plan, pal disfrute de los neños, una yegua y dos ponis. Ta pasando actualmente a esplotación ecolóxica y va poder acoyese a la certificación en pocos menses. Y ye significativo lo que cuenta porque desplica que la transición ye fácile, barata y rápida pol simple fechu de que dende siempres el ganáu se remana de forma «sostenible»: namás abonos de casa, nada de sulfatao, vaques que sólo tan en corte nos díes previos al partu y cuatru o cincu menses colos xatos, dependiendo de la época.

Esa ye, precisamente, como tamién desplica Villabrille, la vocación de la nuea política agraria de la Unión Europea, qu’entiende qu’una ganadería ecolóxica nun ye sólo la que cumple con unos estándares determinaos, sinón tamién la que sigue les prautiques que yá son sostenibles tradicionalmente nel so territoriu. Práuticamente tola ganadería asturiana estensiva y toa la de tierres altes cumple con esos criterios. Conclusión: la transición ye fácile, barata y rápida.