L’ Asturianu sal con nós

l sábadu 2 d’ochobre de 11h a 19h va cellebrase nel Muséu del Pueblu d’Asturies de Xixón el VIII Día de la Reciella, «una xornada d’ociu, deporte y actividaes pa tola familia que tienen en común l’asturianu como llingua vehicular», como define l’asociación que lu entama, Reciella Families Pol Asturianu. Dende va unos años, un cantar pon-y banda sonora a esti día tan especial y necesariu pa la cultura asturiana.

Yá participaron Skama la Rede con “Entaína“, David Varela con “N’asturianu, sumes“, Pop Piquiñín con “Espoxiga“, Alicia Álvarez con “Préstame pola vida“; y esti 2021 l’encargáu de facer el cantar son Xaime Martínez y La Familia Tradicional con “L’asturianu sal con nós“.

«Como teníemos la idea orixinal de que l’asturianu sal con nós (del confinamientu, pero tamién de casa en xeneral), pensemos en más coses que salen, faciendo por xunir dellos campos a priori contradictorios», comenta’l músicu y escritor uviedín alredor d’esti cantar «con una producción punk-pop» y un soníu propiu compuesto por él xunto a la so banda, La Familia Tradicional. El tema estrénase güei n’esclusiva musicasturiana.com -entidá collaboradora col Día de La Reciella xunto a otres asociaciones, empreses y instituciones públiques como l’Ayuntamientu de Xixón-, y va asoleyar esti vienres 17 en toles plataformes dixitales. El videuclip, realizáu por Pablo A. Quiroga Prendes y Juan Tizón, va salir nos próximos díes.

l 2 d’ochobre, de sábadu, vuelve’l Día de la Reciella. El Muséu del Pueblu d’Asturies, llueu d’un añu de parón obligáu, torna a acoyer esta xornada de celebración familiar n’asturianu dafechu, qu’esti añu va tener como banda sonora’l cantar ‘L’asturianu sal con nós’, con lletra de Xaime Martínez y Estela Álvarez Blanco.

“Agora tu, al salir de casa / pon fociquera / y llama to güela / pa glayar xuntes / esta canción: / cuando salimos, l’asturianu sal con nós”, diz l’estribillu de la canción qu’interpreta’l tamién poeta xunto cola so banda, La Familia Tradicional. Ye la primer vez que’l tema promocional del Día de la Reciella nun lu compón David Guardado, lletrista de ‘Entaína’, musicáu por Skama la Rede; de ‘N’asturianu sumes’, por David Varela; de ‘¡Espoxiga!’, por Pop Piquiñín; y de ‘¡Préstame pola vida!’, pol dúu Muga, que formen Alicia Varela y el propiu Guardado, y el Corín de Reciella nos años previos pa esta folixa qu’entama ‘Reciella. Families pol Asturianu’.

Cuatro cantares que yá son auténticos himnos pa les neñes y neños asturianos al que se suma agora ‘L’asturianu sal con nós’.