Publicado en Asturies.com, Música

‘El barquín’ d’Alicia Álvarez

‘El barquín’ del discu-llibru ‘Kikirikikí’ atrévese a salir a la mar nel videoclip nuevu d’Alicia Álvarez

La mar de Xixón, en concreto El Muelle, ye l’escenariu del videoclip de ‘El barquín’, cantar del discu-llibru ‘Kikirikikí’ d’Alicia Álvarez que yá va pela so segunda edición. La composición “ye un cantu a la llibertá que munches veces nun algamamos polos nuesos propios mieos”.

“Los mieos puen protexenos, pero tamién puen llimitanos; hai que vencelos pa que nun nos coarten”

Videoclip 'El barquín' d'Alicia Álvarez punta Liquerique

La mar de Xixón, en concreto El Muelle, ye l’escenariu del videoclip de ‘El barquín’, cantar del discu-llibru ‘Kikirikikí’ d’Alicia Álvarez que yá va pela so segunda edición. La composición “ye un cantu a la llibertá que munches veces nun algamamos polos nuesos propios mieos”.

“¡Ai, probitín barquín!” repite un tema que cuenta cola participación da David Varela, col acordión, y de Xana y Mael Guardado Álvarez, a los coros. Los cuatro apaecen nel videu xunto con otros munchos neños y neñes que baxen de Cimavilla y se dexen ver n’espacios como la rula antigua, la Cuesta’l Cholo o la punta Lequerique.

Dende ehí comprueben cómo’l barquín, que protagoniza la embarcación ‘Itsas Izar’, sal a la mar después de tiempu atracáu al imaxinar “mil peligros, como tantas neñes y neños na infancia”, pero que va alcontrar nesti cantar “la fuercia pa vencer los sos mieos y esfrutar por fin de la mar”. Una guapa pieza adiovisual, realizada por Cortexiphan, la primera del discu-llibru ‘Kikirikikí’, nel qu’Álvarez compón canciones “delicaes n’asturianu pa neñes y neños, que falen de los sentimientos, les emociones o los mieos a traviés de les historias d’animalinos, bichos y otros tienros personaxes”, y que ta acabante d’algamar la so segunda edición de la mano de La Fabriquina.

‘El barquín’ ye’l cantar escoyíu por Alicia Álvarez (Xixón, 1979) pa grabar un videoclip del so discu-llibru ‘Kikirikikí’ (La Fabriquina) col Muelle como escenariu. D’esta forma celebra la bona receición d’esta obra que fala de los sentimientos, les emociones o los mieos, como ye’l casu de la canción que protagoniza esta pieza audiovisual.

‘Kikirikikí’ yá va pela so segunda edición, ¿esperaba tanto ésitu?

Afortunadamente hasta agora tolo que tamos faciendo dende La Fabriquina ta teniendo bonísima acoyida, pero a min cuéstame velo en términos de esitu porque supongo qu’esa pallabra téngola asociada a coses comerciales y esti proyectu ye un proyectu de música y edición independiente, lo qu’implica munchu trabayu y malapenes ferramientes pa competir colos grandes llanzamientos o propuestes respaldaes por munches perres. Asina que l’ésitu nesti casu nun ye tanto vender más exemplares –anque eso tamién nos allegre munchu– como llograr con eses poques ferramientes llegar a la xente y que-yos guste’l llibru-discu. Pa min más qu’un ésitu ye munchu méritu y amor polo que faigo.

¿Qué tien d’especial esti discu-llibru?

Son varies coses. D’un llau, la música, que ye un pop mui tienru y delicáu. Son canciones con muncha emoción, d’eses que presta cantar toos xuntos. Llueu ta la edición, que ye cuidadísima, recordando a esos llibros que yo lleía de guaḥa. Llibros pequeños, d’estilu clásicu, onde los animalinos o la naturaleza yeren los protagonistes y sirvíen pa falar de daqué que ye universal: los mieos, los sentimientos o les emociones de la reciella.

Pa celebralo asoleyen un videoclip del cantar ‘El barquín’.

Esti cantar ye mui especial porque de dalguna manera desarrolla esa canción coles que toos medramos y que yo mesma-y canté muncho a los mios neños, ésa del “barquito chiquito que tenía miedo a navegar”, pero nesti tema falo de los porqués, que munches veces alcuéntrense na nuesa imaxinación. La mente ye dalgo maraviyoso que pue facenos imaxinar coses mui guapes, pero tamién coses que nos dan mieu. Los neños tienen que saber qu’esos mieos puen protexernos pero tamién puen llimitanos, asina que munches veces hai que vencelos pa que nun coarten la nuesa llibertá.

¿Cómo resultó’l rodaxe?

Foi un día guapísimu. De restallu. Tuvimos que cancelalu un par de veces pol mal tiempu porque yo quería ún d’esos díes esplendorosos de branu en Xixón. Rodámoslo nel Muelle (Puertu Deportivu) con Cortexiphan Porducciones y una montonera d’amigos con guaḥes. Pasámoslo bomba. Amás, yo crecí nel Muelle, siempre viví ellí, asina que foi un poco un viaxe sentimental pelos llugares que marcaron la mio infancia.

El cantar tien un mensaxe importante pa pequeños y non tan pequeños.

Ye que’l mieu nun ye propiu de los neños, anque dacuando se nos quiera facer creer que la propia maduración quítatelu. Mui al revés, hai xente que se fai más miedosa col tiempu. La verdá ye que ye una emoción mui complexa, polo que comentaba enantes, protexete n’escesu llimítate, asina qu’hai que filar fino con ello.

¿Vamos poder sentir pronto ‘El barquín’ y los restantes temes de ‘Kikirikikí’ en direuto?

Sí, ya tamos zarrando feches pa esti branu. De mano esti 18 de xunu taremos en Cabranes y en xunetu n’Uviéu. Les nueves feches y horarios diremos anunciándolos per redes sociales.

Otra manera, una persona tan activa como vusté, ¿en qué ta trabayando agora?

Toi preparando’l proyectu nuevu de La Fabriquina, qu’esperamos tea llistu pa finales d’añu y del que nun quiero avanzar nada porque préstame qu’heba sorpresa. Tamos poniendo munchu trabayu nello y espero que guste tanto como’l restu del nuesu catálogu.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *