Pepón

N’asturianu presta más – “Pepón”

Estaya de publicaciones n’asturianu, dedicaes a la nuesa cultura y tradiciones. Cola collaboración de Xuan Miyar
IMG_D3F5DE-E7AD47-49C375-526748-17118F-621146.jpg

“Pepón”

Yá cásique nun se ve nada, les lluces de los focos del camín xunto a casa yá quedaren lloñe, equí nun allumen nada, Elvira llama´l perru cola voz baxa, acabante oílu goler pel suelu y depués d´un ruidu raru tres el matu pon l´antena, xube´l brazu comu si mandare callar al silenciu y nun siente nada. Cola boca pequena llama al Rin sele. Rin, Rin, el Rin nada. Pela caleya escura anda de contino hasta llegar cerquina d´una casa, nel Xin. Tien el focu encesu, alguarda un pocu, per un istante paez-y que se mueve daqué, comu una roceana solombra so l´horru, peru nun ye quien acolumbrar nada. Rin, Rin… torna tres una última güeyada… cavilga, el Rin tornó sólu. Col pasu aceleráu anda´l camín de güelta pa so casa.

-.¿Verínme allegame a esa casa?. De repente siente correr tres de sí, -.¿Ú tabes Rin?, afalágalu, nesto´l perru da la güelta a tou meter, Rin, Rin, Rin… síguelu y llámalu camín enriba hasta que s´atopa de sópitu con Pepe, acompañáu del Rin. Qué sustu lleveren los dos.

Pepe, según-y cuenta a Elvira, vien de dar una güelta de perhí y escureció-y.

-Hai Pepe, has de tener curiáu, que ta to pá sólu y teníes que echa-y un gabitu col ganáu. Ensin parar, Pepe baxa la cabeza y a zancada llarga baxa pa so casa ensin dicir más nada. Pepe llega a casa y tien tiempu de mas p´aidar a so pá, pa cenar y metese na cama y cavilgar, ensin dicise nada, mudos los dos, mírense de regüeyu, comu siempres.

Pepe ta envizcáu en dir a ver a la rapaza de la casa´l Xin, agazapáu tres les sebies, tolos díes que pue, l´atapecer, xube al rodiu la casa escondiellándose y, al traviés de les ventanes mira la mocina afatáu, de cómu l´acariñen, cómu-y falen, naguando, cómu ye´l tratu d´una familia en casa, pa él desconocíu. Aguanta tol tiempu que tien, espera con ansiedá. Subíu a la talamera l´horru, hasta que Lena xube pal cuartu d´alantre, malpenes pue ver nada, cola lluz de la bombilla de venti y la cortina d´un llau de la ventana echada, aldovina cómu se quita la ropa, cariciada y rescamplando pela lluz marillentada. Comu un ser anxelical con ropa blanco, vela averase pa zarrar la ventana. Ablucáu, torna na escuridá pa la so casa pel camín de les desventures, el mesmu de les emociones.

Cola mano metía nel bolsu baxa garrando la navaya y un poqueñín más pa baxu, para, p´afilala.

Ta sollerte Elvira, el perru lladró cuando pasó Pepón ensin gorgutar delantre la so casa. Güei Pepón tornó un pocu más tardi, velu pasar, baxando la cabeza, con disimulu.

Llega a casa enantes que so padre, ésti llega enfocicáu y pinpiáu comu tantes veces y entá, ta tou ensin facer, depués de porfiar enforma, dexen a mediu facer les coses y al ganáu, muertu fame, namás con un pocu herba seco. Vanse pa la cama con un pocu pan y una mazana y una taza lleche.

A Pepón faise´l día llargu enantes d´atapecer, depués de facer el manguán tol día escalforiándose y cavilgando cómu entamala. So padre foi pal chigre cuantayá. Garra´l cordel que tien preparáu y tira pal camín del Xin, con procuru, al pasar pela casa d´Elvira, col enfotu de que nun s´entere´l Rin. Quesiquiés, el Rin ta llistu, col vezu de dir con él, a mediu camín yá diben xuntos, gárralu Pepón y amárralu n´un cabornu de castañu d´al llau´l camín, el Rin queda lladrando y lloriqueando y pocu a poqueñín, va royendo´l cordelucu ruín.

Mira pa dientro la casa peles ventanes ensin perder un rispiu de lo de so cuando llega´l perru lladrando y galloleru de tar yá con Pepón, ésti ponse mentecatu y escuérrelu pa baxu, col envís de safase dél. Dende dientro la casa sienten dalgo, sal Mel, el padre de Lena, fuera casa cola cachaba, -¿Quién anda perende?.

Pepón xixila tres el pegoyu l´horru, alguarda un pocu, -Esta nueche tampocu.

Torna gachu… dende la escuridá llancen-y un madreñazu.

Cuerre, baxa pel camín escuru cola tristura del tiempu perdíu. Con dello del camín andáu, siéntase nel cabornu. Rescamplen les estrelles y la lluna a piques d´apaecer tres d´aquelles ñubes prietes. Siente la soledá nel so mundiu de les almes solitaries y tan disgraciaes, a quién fala, a quién quier, a quién llora… y a él, ¿Quién lu siente?. Ensin dexar de mirar la lluna relluciente quier semar llárimes de rabia y desesperanza peles caleyes perdíes del mundiu de les inxusticies. No fondero de la so mirada ta la lluna, mira´l cielu onde un día-y dixeron que taba so madre, fae tiempu que sabe que non, nunca nun vio a so padre rezar mirando a esi cielu, que-y paez el de les esculpes tramposes, nin siquiere rezar, el so rezu ye a la botella de vino, dacuando-y falta, la so manera de…

Ehí tan les llárimes soses de los güeyos secos, nel rapaz que nun deprendió a querer, nin dexase querer, el rapaz tan escosu de sentimientos. Echáu enriba´l cabornu gastando´l tiempu na soledá de la so trinchera, col animalín qu-a él, más casu-y fai y más lu quier.

Al amanecerín anda alloriáu, cola tristura n´alforxa pa so casa, ensin que naide se decate que nun ta, nin s´esmuela dél.

A media mañana llámalu so pá, -.Pepe, Pepe, llevántate folganzán. Depués de un cachu baxa, diz-y so pá que vaya char un gabitu a Mel el del Xin, que trae un xatu pal camión y nun anda. Va Pepe al so alcuentru a emburriar el xatu, da pena velu de ruín, enñérase de les pates d´atrás, ensin dexar de posar la mirada en Lena y tar, tan a la vera d´ella. Llegaren a la carretera y xúbenlu al camión. Nun ganó nin les gracies. Apartáu pa un llau nun pierde detalle, cobren el xatu y Mel guarda les perres y tornen pal Xin ensin dici-y nada, nin siquiera una triste mirada,

Al otru día l´atapecer, Pepón entamó, comu davezu dir al Xin, yá cásique-y pasó la desazón, callandino, al pasar por casa Elvira amarra´l perru con la cadena na caseta y darréu, enfila´l camín de la so llocura. Llega a la casa, tan toes les lluces encendíes: embaxu, los cuartos, el foco, na cuadra, que ta zarrada a cal y cantu. Escuca y queda guardáu, nun pue ver nada, piensa qu´igual va parir una vaca. Apáguense delles lluces de casa, hasta Lena, perxixilada, foi echase na cama, lo primero que fizo foi zarrar la ventana. Siente un golpe na cuadra. Faciendo un exerciciu de puxu sal de la solombra y fai por mirar pa dientro a ver qué pasa, con un güeyu mira per la resquiebra na puerta d´entrada, ellí ta Mel, engarráu con una piedruca pa metela nun furacu na paré. Aguanta mirando un pocu. Mel garra moñica y tapa les xuntes al rodiu, arralla con ciñu´l muriu cola fesoria, onde metió la piedra.

Pepe pescanciólo tou y espera, apártase y cavilga tres el pegollu. Depués del llabor fechu Mel entra na casa. Depués d´alguardar un buen cachu apáguense toles lluces y a resultes d´ello, de xuru que toos tan dormiendo.

Ta seguru de la so fuercia xabaz ensin tener razón y que dalgún día s´alcordarán dél. Enfila´l camín atristayáu pa so casa, al pasar pel regatu la pozona, cásique a palpu p´alcontrar l´agua, llava les manes.

Nesta nueche cálida y despeyada, que-y da tastu a la rabia y al desesperu. Va montáu nun cabornu comu si fuere n´un caballu aláu mirando´l so cielu, xúrase qu-enxamás caleyará pela nueche, sedrá pel día, pa rise, anque namás seya un día, pa ver les cares de los que tienen enfotu nel furacu secretu y descubren esi día, que ye´l furacu vacíu, del esfuerzu y l´aforru.

XUAN MIYAR

Cabornu


 

IMG_F00A4A-CB033D-A02CFA-3B28DF-5CEB37-D5168D.jpg

Andaba dende va tiempu cola testa gacha, dir pel día pa echase nel cabornu yera un de los momentos más afayaizos pa cavilgar de la so vida a la solombra, arrodiáu de castañales, humeros, carbayos y matos, mirando´l cielu pelos furaquinos ente árboles y ñubes, mirar los rayinos del sol qu`entren p´allumar la so mente confusa y entrugándose, ¿quién soi?. Equí, soboriando l´agriu la nada y reprimía la rabia, ta sólu, naguando pel rayín d´esperanza y faciendo l´esfuerciu d´escaecer la realidá de los sos vientos revueltos, col espinazu dobláu y los silencios espiertos.

El ñublu faise zarráu como davezu, el llombu moyáu pol mofu d´esi cabornu mediu tapáu cuantayá d´escayos, cola foz separtaos.

Zarro los güeyos y aliendo. Un día más pa garrar fuercia guardando´l secretu comu caprichu de neñu, alzo la testa ensin mirar el suelu, desenterrando´l suañu y dalgún recuerdu.

Oyí pasinos, entra´l mio pá pel estregal, antaino a separtar el montón de tarucos, la torre qu´entamé facer tien doce pisos, en caún tien un tarucu prietu que foi quien dir xuntando y separtando pa que mio madre nun los meta na cocina, mio pá anda ensin mirar pal suelu cola zapica lleche, pisa ún y zarapica, tuvo a piques de cayer, garróse al marcu la puerte, la que nun salvó foi la zapica; da la güelta, mírame de males y mete-y una patada a la torre de tarucos y a min una morrada, garróme de raspión, cásique la safo, pero quedome la cara colorada.

-Ya te dixi que nun xuegues en mediu l´estregal, poniendo cara querer comeme, póneste a un llau y, lleva´l montón de tarucos pal fornicu.

Ensin rechistar entamo a recoyer despacín, dígo-y a mio madre, mientres friega´l suelu emporcáu, que nun me los queme; pá foi a buscar otra zapica lleche.

Enantes cenar, ma dizme qu´estudie´l catecismo, cola lluz apocada, asemeyada a la mio gana. Llega pá dafechu enfocicáu, diz-y a mio madre que me tien bien folgáu, yá va siendo hora de comencipiar a facer dalgún mandáu. Mio ma mírame candial de regüeyu y mio pá mírame, entá cabreáu, con ceñu.

Abro los güeyos, entamo dir pa casa depués d´un día duru de trabayu. Remembro a mio madre, cuántu la eché y echo de menos y tamién a mio pá, qu´ocupó´l so espaciu con trabayu, vinu y desvelu…

Caleyo tornando a casa despaciquín col enfotu d´arrodiame de la mio realidá; ando pela vera´l ríu y paso xunto a la pozona la presa´l molín, güei escaecía comu la canal y estrozada peles corrientes, sentéme un poqueñín a remembrar la maxa d´aquél día cásique l´atapecer, día de povisa, d´angazu y sudu, pa esfrutar la soledá de bañase en porriques como tenía´l vezu, a estes hores… ¿quién me va ver?, cola corriente selequino y l´agua fresquino esfruto mirando´l claru l´agua, de sópitu siento comu un ruidín, dacátome que dalguién ta perende y xixila dende´l matu a la vera, miro bien al rodiu, nun foi quien ver quién yera, esmolíu toi y seguru que yera ella, fágome un piñu y asomo namás la cabeza, depués d´un tiempu d´espera voi salir del agua, vístome y xubo al Xin con procuru pela caleya, con un nome grabáu na mente, Lena; la neña, pa min estirada, que siempres m´aforró na escuela la mirada.

Siéntese afortunáu de llegar a casa cola sorrisa puesta, la muyer tan afayadiza alguardándolu y faciendo la cena, los dos fíos naguando que llegare a so casa pa xugar a los xuegos que-yos foi deprendiendo, tan agudos, tan guapos, tan distintos…

Los díes d´ochobre yá son más curtios, atapez primero, tien d´entretenelos cola lluz que s´escosa del día, pola gracia que-y dan los sos ñeños.

T´afitáu n´alcordanza, l´horru, la cuadra, les ventanes tán pequeñes, árboles vieyos qu´acuriosen el rodiu y sobro tou, los llugares pa remembrar, dende fuera casa.

Cola lluz probe del focu encesu fai casu pa xugar a la maya, tien munchu de facer, poro fai una posa pa xugar con ellos, escuéndese nesos sitios que yá conocen, pero nagüen por pasar un tiempín col so pá, ye la escuridá la que-y da´l tastu al xuegu, dando xiblíos seles y facer llamaos dende distintos sitios, camudando los llugares onde escondese, tres los pegoyos, tres la escalera l´horru, tres los lloreos… alienda altu, a veces berra, per momentos mete-yos mieu, ellos ponen la oreya y atienden, saben que ye´l xuegu de les emociones fuertes y ensin separtase munchu de la casa pisen sele, un sustu a les veces ye los que-yos fai sintíse inseguros, el sustu del mieu y nun por perder, sinón pola emoción del suspense.

Una voz femenín llama pa la cena, Pepón da´l xuegu per acabáu, satisfechu y cansáu.

-Luis, Pepín a cenar, salíi yá, llega Luis saliendo de tres la casa percontentu de que nun lu alcontraron, Pepín azorrona, espera qu´entren toos y cuando nun lu pueden ver, como un afogáu sal del so escondite, del so requexu secretu.

Sentaos al rodiu la mesa Pepón mira la muyer y a los sos fíos, ruempe les cadenes del so recuerdu, la vida camudó enforma, tien la familia que suañó de neñu, nun pierde´l tiempu nos sos recuerdos mirando a los neños, que se piquen a pataes per baxu la mesa, – Vaes dir pal cuartu a pensar y ensin cenar, diz-yos so ma.

Ye hora dir pa la cama, duérmese otru día más esfrutando lo que tien na casa y alcordándose de sos padres, n´especial de so ma, cuántu lu curió, cuántu-y tapó, qué tiempos de color prietu ensin remediu, onde se paró la so neñez cola cayida de la pasera vieya, nun tenía que ser ella quién la subiera… piensa y na escuridá, mira pa enriba, el que t´ehí que me lo diga, – ¿Por qué me dexasti ensin ella?.

Paróse´l mundiu aquel día traicioneru y llegó la señardá metía na lluz caún de los díes qu´alborecía, él nun sabía cómu francer les cadenes del so encarcelamientu, nin suañando, quitaba la galga de la so desdicha y de la so rabia.

– Pepe llevántate, dixo so pá.

– Llama, llama, güei nun me llevanto por que nun me sal de la gana, llama, glaya más altu, glaya, que nun siento nada.

-Pepe llevántate, hai daqué de facer, mientres pegaba col preséu nel tables del techu´l llar, xustu baxu la so cama.

Faciendo un exerciciu testerón métese baxu´l mugrientu cobertor, mientres so pá sigue aporroneando per baxu, nel pisu´l so cuartu.

Vo echa-y un pulsiu, – Vas xubir a espertame… cavilga fechu un ñudu.

 

Una nueche más d´hestories cásique perdíes p´alcontrar el sueñu, ente otres munches tan candiales, con tantes nueches coles sos llunes pasaren.

Güei llevántase patexando fuerte pela vida torgada dende bien neñu, agora mozu y padre yá entiende la mala ostia y´l xeniu de so pá, siempres sumíu na soledá de les caleyes escures, ensin equilibríu, sintiéndose culpable de les paseres ferruñoses y de la so galbana, siempres metía nel alma.

Alcuérdome d´esi día tristón no que l´orbayu nun dexaba facer nada.

-Abúltame raru, mio pá entá nun se llevantó. Yá tenía delles coses feches y el nuberu amenazaba enforma, yera más qu´orbayu; – Voi tener que dir a llamalu…

Xubo y ximiélgolu, nun retruca al mio intentu, paez que ta durmíu… o faise que nun me siente…

La nueche pasada fo al chigre como tantes veces y yo, depués de caleyar al Xin, como tantos atapeceres, pa la cama.

Porfiamos enforma, hebo de facelo tou sólu, díxome qu´ónde taba, azorronando y mudu nun-y dixi nada, de xuru que yá lo sabía, Elvira nun calla nada. Tenía razón, dende va tiempu llargar callandino ocupaba tola mio intención, dir a ver y saber a la mocina yera´l vezu y yera´l Rin quien da l´avisu de mio pasu a Elvira, pela caleya´l Xin.

XUAN MIYAR


Tiempos duros de soledá ya inseguranza, coles lluces apagaes nes edaes moces tarreciendo´l futuru y a los mieos escuros.

No más fonderu yera un home buenu, no más fonderu. Güei les sos alcordances yeren pa los padres, cola casería vacía, alloriáu y tan sólu.

Cola so mente revolvín invádelu´l mal humor, la humanidá que quier ganar, entá perdía. Pallabres mudes pente la solombra de les caleyes patexaes folgando a escures. Güei sospira y alienda, entá de pena. Nun tien quien-y mande nada, él solu s´inventa´l so trabayu dafechu despreciáu, hasta´l día siniestru, agora deprendiendo y amosando xeres asentaes.

Mira a los llaos buscando la complicidá escaecía, nun alcuentra enfotu, namás sebies arramascaes, comu les sos alcondances, tan tristes y silencioses.

Los codos nes rodielles y les manes nes vidayes, acabante mirar pal cielu, per eses cais dreches tien d´andar el duende… y cavilga – Danme ganes de llorar, teo de glayar l´altu la lleva…

Llámame, llámame, vas xubir… Comu´l día que nun baxé y xubisti a espertame. Esti día tampocu nun retruqué a los tos glayíos, los glayios que sentí, glayíos d´ausiliu y desesperu. Pá, enxamás entendí´l to sen de dame´l cariñu. Qué culpa teo yo de nun querer más que a mio ma, cavilgo pa min, que nun te queríes namás qu´a to y namás qu´al vinu, pal olvidu. Crucio la portiella cola maxa prohibía, l´otru llau del regatu nun saben que dalguién nagua per blincar el charcu. Sinón creen en min. ¿Teo de creer yo? y voi facelo, voi creyer.

Nun hai espaciu nin pa dir al Xin peles atapeceres, malpenes tien tiempu pa les sos xeres, masque na so mente, agora más fuerte, nun escaeza a la mocina deseada y nagua que llegare´l día de compartir el botín, xube al desván a mirar la rasera, debaxu la teya tien les perres na fardela.

Elvira la vecina, dalguna vegada tien de pidi-y daqué, hai qu´abonar el güertu pequeñu y pidi-y un carrín de cuchu. Comu otres veces Pepón echa-y un gabitu, agora Elvira ye más consentidora y xenerosa, da-y pena de velu trabayar munchu y sólu, dexa que lu acompañe´l Rin.

Perende apaez Lena, baxando la cabeza, colorada, enfila pa Pepón, avezáu a que nun-y de la cara, ta estrañáu, cola boca pequeña camienta a ver cuando puede echa-yos un gabitu, el padre ta malu y élla nun ye quien, nun d´abastu.

Pepón fai alcordances d´aquéllos tiempos, de fiestes y d´esfoyaces, cuando pasaba delantre d´ella los padres ponínse a tapala, mientres ella, torciendo la cabeza ensin desimulu, ponía´l culu. Hai que ver cuántes vueltes da´l mundu…

y agora Lena, vergoñosa, mírame de frente, delles vegaes camiento dalgo y bien qu´atiende…

Pa güei yá enforma cavilgué. Voi a xugar colos ñeños y dalgo de facer.

Enfila pa casa más serenu.

– Pá, cuéntamos otra vez el cuentu del mozu que garró les perres nel furaquín na cuadra…

– Pa otru día, faise tardi y to madre tará iguando la cena…

Entamen tornar pa casa, baxen pela caleyina contentos, los ñeños esfrutando y xugando col so pá depués de llegar de trabayar. Güei tocó dir ver les xates que duermen nel prau y llimpia-yos la poza l´agua. Caleyen, Luis a les veces paez más candial, anda a la vera de so padre, Pepín, más enriedosu anda a carreres, a veces p´alantre, otres p´atras.

Mirai´l paxarín… ¿Qué tien?, diz Luis. Ye´l paxarín que lo sabe tou y dízmelo a min, el que me lo cuenta na oreya. ¿Ónde vas paxarín? Entrúga-y Pepón. Home si, va contestate, entruga, entruga… va vagate, va falete… Diz Pepín fartu rir. Entós ¿Porqué pensaes que m´entero de tou?. Por qu´entrugues munchu y nun ye a los páxaros. Diz Luis. Enteréme d´una cosa, ¿Nun tuviestes l´otru día na cueva los calieros?. ¿Quien te lo dixo? …Peru nun entramos eh, mandé-y entrar a Pepín y nun foi quien dar un pasu pa dientro, nun s´atrevió, yo asomé un pocu la cabeza pa ver y taba escuru, vieno tres de min Pepín a emburriame y enfadéme con él. ¿Pá, tu entrasti dalguna vez?. Non, díxome´l mio güelu qu´ellí vivía l´home del sacu y cuntóme toles fechoríes que facía… ¿Qué facía? Dixo Pepín. Munches coses, curiaba a los neños que yeren malos, pa llevalos, espertábalos pela nueche, metía-yos mieu peles caleyes, escorríalos y a los que teníen navaya, nun los dexaba usala… Correi, vamos, correi qu´atapez.

Asoma la lluna tres el cordal y pela so manzorga ta mercuriu, malpenes se ven agora les estrelles, toos clisen la vista nel cielu, los ñeños tovía pensatibles, con un pocu de mieu, Pepón llévalos agarraos caún per un llau, miren pa enriba, callen, los tres en silenciu. Pepón siguió mirando´l cielu y alcuérdase cuando fizo una promesa… Dar, lo que nun tevo, dar tou lo que tien, pensatible nes lluces prendíes, agora, nesi cielu.

– Mirái les estrelles, caúna tien el nome de un ñeñu, aldovinái cuála ye la vuestra.

Párense en secu, aculumbrando tou lo que pueden, nun son quien gorgutar pente la inmensidá de la ñaciente estrellada. Pa Pepón son ente toes, les que más rescamplen, mientres-yos garra les manes y pa éllos escoyer una nun ye cenciellu.

Pá, si escueyo una estrella pa mim, mañana voi saber cuála ye?. Diz Luis.

Pepón piénsalo un pocu enantes de contestar.

Mirái la lluna y de les brilloses, vuestres sedrán les que más s´averen.

 

Sentáu nel escanu depués de cenar mientres la muyer recueye la cacía, los ñeños yá se fueren pa la cama. Mírala, tán cuntaes casique toes les novedaes del día, agora esfrutando los suaños y aldericando. Cómo se mueve Lena, qué remangu tien, ensin quita-y un güeyu, ehí ta la mocina deseada. Guarda pa él toes les hestories tristes, agora colos sentimientos bien guardaos. Va tiempu que lo cree..

¿ N´acabante recoyer echamos una escoba?. Pepe, sabes qu´echo pilancos sumando, echamos un parchís anda… Val, asina cómote enantes dir pa la cama.

Una sorrisa cómplice y picardiosa percuerre-yos la cara.

Ma, ma.

Llámala un rapacín, posa´l botixu y xube pal cuartu los ñeños y cola voz apocada…

¿Qué quies Pepín?. Nun soi quien dormir, tate un pocu equí anda, teo mieu… Afalágalu, tóca-y la cara candial, vamos espertar a Luis, vamos tar en silenciu. Toi espiertu ma, nun quiero dormir, cuéntamos un cuentu. ¿Pues cuntamos el cuentu del mozu que garró les perres nun furacu?. Diz Luis. Val, n´acabante cuntalu a dormir… ¿val?. Diz la madre.

Yera naquellos tiempos, cuando un mozu que se llamaba Xosé y que tenía fama de malu, enredosu y retrucón, nun lu queríen munchu los vecinos, andaba tol día ensin facer nada, col gomeru nel bolsu tirando piedruques a los gatos y buscando perros p´amarra-yos una llata nel rau. Nun paraba en casa, nun tenía una peseta, nun-y daben nada, el so pá gastábalo tou en vinu y nun lu quería ayudar. Yera so madre, la única que s´esmolía por él. Yera un rapaz al que-y gustába muncho una mozuca, peru ella nun-y facía dengún casu, entós, él diba a vela ensin que naide lu viere, caleyando escondielláu, tolos díes que podía diba l´atapecer, peles caleyes pindies a la so casa y xixilábala dende afuera, peles ventanes con procuru, nun dase a ver, cuando toos de la familia taben dientro.

Un día de sópitu, él taba tres el pogollu del horru, ve al pá de la moza salir de casa y entrar nel corral y zarrase dientro, al mozu paeció-y mui raru, allégase con curiáu a la puerte´l corral y per una resquiebra ve al home meter dalgo nun furacu nel muriu, tres les vaques y tapalo cola mesma piedra. Alguarda un cachín y cuando´l paisanu sal y entra en casa y s´apagaron toes les lluces, cavilga… yá tán toos na cama. Entra nel corral a palpu y prende´l farol qu´hai na entrada, antainando, quita la piedra del muriu y garra lo qu´hai dientro, una saca con munches perres.

Nun sabía qué facer col dineru que garró, llevólo pa so casa ensin sabelo los sos padres, ellí lo guardó, a sabiendes qu´un día, taba seguru, diba casase cola moza y gastales pa ella.

Depués de munchu tiempu, mandaren-y dir trabayar a la casa la mocina y conociéronse meyor, anque´l padre de la moza nun la dexaba falar con él, entós comencipiaren a vese a escondíes. Xoxé vivía solú y fueren faciéndose amigos, depués de tiempu ella tamién quedó sóla na so casa, Xosé perarguyosu nun sabía qué facer pa da-y gustu y, entrugó-y…

¿Quies casate conmigo?. Vien tardasti en dicímelo Xosé…

Xuntaron toes les vaques que teníen ente los dos na cuadra más grande, que yera la d´ella.

Con cara de misteriu y amosando duldes, Xosé mírala a los güeyos…

Teo de dicite un secretu. Nun m´asustes Xosé, ¿qué ye?. Vamos dir a la mio casa. Ellí lo vas ver.

Caleyen agarraos de la mano selequín a casa.

Xosé xube pal desván pela pasera, entra a gates pa la rasera y quita la teya, namás atopa un ñeru ratones na fardela.

XUAN MIYAR

IMG_5CE0C5-FDB247-505FF4-775BBD-E4E564-B93ABC.jpg