LNE / Una aldega de 90 habitantes con casi un grafiti en cada casa: asina ye l’orixinal y desconocíu pueblu con vistes a un preciosu valle asturianu. L’artista Bastián Riak, con murales por toa España, esplega tol so talentu nesta localidá, dando protagonismu a los animales y a la naturaleza.
Tres murales en Canzana / @balvab/ C. Cuesta
- Bastián Riak: Instagram / galería LNE /
Ye una d’eses munches aldegues desconocíes d’Asturies que sospriende a quien la visita. Canzana, en Llaviana, ye’l pueblu de los grafitis. Casi en cada esquina hai un mural hiperrealista dedicáu a la naturaleza. Un caballu nun establu, un foín entrando nun gallineru, un búho, un trasgu… Toles obres les firma l’artista sierense Bastián Riak (en realidá, Bastián Prendes), que ye vecín de Llaviana y fixo grafitis por tola rexón y tamién fora d’ella.
Bastián Prendes (Uviéu, 1990) tamién ye Bastián Riak.
Canzana, famosa pol cabritu que preparen nun hotel, ye una aldega de tan solo 90 habitantes que ta allugada nun balcón con vistes al Valle del Nalón. El paisaxe dende ellí ye realmente impresionante. Pero lo que más sospriende al visitante d’esta diminuta localidá ye’l so arte. Bastián Riak tresformó parés, puertes y murios n’enormes grafitis nos que los animales y los personaxes de la mitoloxía asturiana tienen protagonismu y casi cobren vida. Ye’l casu d’un trasgu en bicicleta o un busgosu (una criatura que ye metá home y metá cabra) caminando por un monte.
Una de les últimes obres qu’enllenen *Canzana de color y allegría ye la de Nolo y Demetria, los protagonistes de la novela de Palacio Valdés «L’aldega perdida». Estos personaxes tienen dende va unos años les sos propies estatues en La Pola Llaviana, na plaza del Conceyu, dende onde se ve la efixe de Peña Mea. Dende anguaño tamién tán en Canzana, pero esta vegada, inmortalizaos nun mural, tamién mirando al totémicu monte llavianés.
