Turismu promociona la cultura sidrera na feria Ciderworld de Frankfurt para reforzar la proyección internacional d’Asturies. El Principáu amplía la so participación nel eventu ya incorpora acciones promocionales na ciudá alemana. Actualidá
Esta cita consolídase como un escaparate de referencia para amosar el potencial turísticu, cultural y gastronómicu de la comunidá en mercaos internacionales.
El Principáu reforzó la so presencia nesta edición, na que combinó la participación nesti foru con acciones específiques n’espacios estratéxicos de la ciudá alemana, coles mires d’asitiar Asturies como destín singular y competitivu, venceyáu a esperiencies auténtiques y a la so identidá cultural. Asina s’espublizaron conteníos audiovisuales na estación central, unu de los puntos de mayor tránsitu, para poner en valor la sidra asturiano y el ritual del escanciáu.
Unu de los principales elementos d’atracción foi la reconocencia de la cultura sidrera asturiana como patrimoniu cultural inmaterial de la humanidá pola UNESCO, un finxu que refuerza’l valor diferencial d’Asturies a nivel internacional. La distinción espertó un notable interés ente’l públicu asistente, xuntu con otros factores clave como la conectividá aérea directa ente Frankfurt y Asturies.
L’espaciu d’información turística del Principáu rexistró xuna elevada arribación de visitantes, lo que confirma’l creciente interés per Asturies como destín venceyáu a la naturaleza, la gastronomía y la cultura.
Toes estes iniciatives enmárquense nel plan de promoción de la cultura sidrera asturiana, impulsáu pol Gobiernu del Principáu, qu’anguaño cunta con un presupuestu de 850.000 euros pa consolidar la sidra como exa estratéxica de promoción turística y cultural, proxectando la imaxe d’Asturies nos principales mercaos europeos.
