- A les 6:30h. d’esti vienres alborecemos col cielu escampláu y delles iversiones térmiques, tando más fríu no fonderu los valles que’n los altos con unes temperatures variopintes, dende los 10ºC pela costa a los 0,4ºC de la Pola Somiedu no fonderu’l valle, rexistrándose nel puirtu Payares 2,8ºC.
- Güei la mañana va tar mui seliquina con escasa nubosidá, caleciendo’l sol según vayamos averándonos al mediudía. Yá pela tarde aumentará la nubosidá pa dexanos el cielu al oscurecer tapecíu con unes temperatures que van camudar poco o subirán llixeramente les másimes.
- Mañana sábadu vamos tener el cielu empuercáu de nubes medies y altes que solo van tener un ciertu deseldolque na fastera más surocidental ya cordelera, onde van dase precipitaciones febles en xeneral, nel restu sedrán poco probables con unes temperatures n’ascensu, siendo más bultable nes mínimes.
- El domingu vamos tener más nubosidá, amás l’aire ábrigu va dir coyendo fuercia, pa soplar con raches mui fuertes al finar el día en zones altes de montaña y valles averaos, onde seguirán con precipitaciones que sedrán más abondoses na cara sur de la cordelera y fastera surocidental d’Asturies. Les temperatures en moderáu ascensu, sobre too nel llitoral.
- El llunes seguiremos baxo la mesma situación con una borrasca atlántica nel llitoral de Galiza que mos dirá empobinando vientu ábrigu y dellos frentes de lluvia que solo afeutarán a la cara sur de la cordelera y surocidente asturianu, nel restu tendremos el cielu empuercáu de nubes medies y altes entemecies ente dellos claros o abancios con unes temperatures másimes perriba de los 20ºC.