Los diseñadores Marta López y Quino Martín celebren la ‘Amabilidá’, el mestizaje, los iconos locales y el trabayu artesanal na so propuesta. LNE/ Una esplosión de color testil abraza la piedra del edificiu consistorial. Figures que s’enxareyen en ritmos que van del boleru al jazz, gaiteros que remanecen como guardianes de la tradición y un «skyline» nocherniegu onde Santiso y la Catedral xixilen una escena d’allegría colectivo.
Esta visión vibrante de la plaza del Conceyu ye la qu’ufierta’l cartelu oficial de les fiestes de San Mateo 2026, una obra roblada pol estudiu Vientu del Norte, integráu por Marta López y Quino Marín.
Ellos son los guionistes d’esta narrativa visual que busca, amás de la emoción festiva, proxectar Uviéu como ciudá de la «Amabilidá», n’anguaño clave para llograr la Capitalidá Cultural. Asina, cola pieza titulada «Baillar la plaza», la pareya quixo qu’un espaciu alministrativu que dacuando se siente austeru» conviertese nun escenariu vivu d’allegría y comunidá». «Qu’el Conceyu nun sía una institución seria, sinón un personaxe más d’una folixa qu’arropa a tolos ciudadanos», resumen los artistes.
La exa vertebrador del diseñu ye’l conceutu de «Amabilidá», lema central de la candidatura d’Uviéu a la Capitalidá Cultural Europea de 2031. Marta López esplica que la intención foi tresformar la percepción de la ciudá, tratándola como un espaciu atopadizu.
«Uviéu siempres tuvo esa esencia de Vetusta, una ciudá recoyida y sele onde hai una calidá de vida que dexa andar poles cais», señala. So esta premisa, l’equipu decidió desaposiar del so contestu institucional al consistoriu «envolubrándolo» en texíu. Para los autores, el mundu testil representa la máxima espresión de lo atentu: «Cuando un neñu naz, envolubrase nun texíu. Quixímos tresformar l’amabilidá en daqué sólidu, convirtiendo’l Conceyu nun texíu atopadizo qu’arropa a la xente«.
Na escena central, el cartelu alude al mestizaxe cultural para amosar una realidá cosmopolita. Les pareyes que baillen en primer planu suxuren movimientos de tangu o boleru, reflexando una sociedá qu’integra diverses influencies culturales. «Ye un chisgo al mestizaxe y a la nueva actualidá de la ciudá, qu’acueye tou tipu de cultures, tantu llatines como d’otros llugares», esplica López. Esta diversidá convive cola identidá asturiana, representada poles gaites y el traxe tradicional. Según Quino Marín, autor de la ilustración, la presencia d’estos elementos ye «d’obligáu cumplimientu» debíu al fuerte resurdimientu que vive la música tradicional na rexón, integrada yá dafechu nel paisaxe festivo urbanu.
Otru aspeutu relevante del cartelu ye’l tratamientu de la redolada. La escena asitiase nun ambiente nocherniego onde los monumentos, como Santiso o la Catedral, apaecen nun segundu planu perfilaos por uno llume de romería. Los autores buscaron permediar la sobriedá arquitectónica cola allegría de les lluces de colores. Para entamar estos planos, Marín recurre a una metáfora musical al esplicar que la presencia del patrimoniu funciona como l’acompañamientu d’una banda. «Ye como cuando un guitarrista fai un solu; los demás preseos baxen el tonu para nun competir», señala’l ilustrador. D’esta miente, l’arquitectura apurre identidá y contestu ensin clisar el dinamismu de la escena principal.
La gastronomía tamién reclama’l so sitiu na composición por aciu referencies al «tapeo» típicu de San Mateo, con platos d’oricios y moxones. «Equí nun se concibe una folixa ensin papeo», recuerden los autores, que llamenten nun poder incluyir la sidra porque la normativa prohibe espresamente la representación d’alcohol n’elementos publicitarios institucionales. Amás, defenden la elección de les lluces de colores frente a les crítiques de quien les xulguen ayenes a la tradición local, reivindicando que’l coloríu de bombilles y banderines ye consustancial a les romeríes asturianes y fundamental para dotar a la plaza d’una atmósfera bailladera.
La obra tamién funciona como un homenaxe personal. El diseñu qu’anubre la fachada del Conceyu utiliza motivos d’estampáu testil al traviés de mosaicos o «patchwork», un chisgo directu a les madres de dambos artistes, Hortensia Prieto y Curra Márquez. Esta postrera foi una pionera reconocida nesti arte testil n’España según rellata Marín y la so influencia técnica treslládase agora al cartelu.
Na parte técnica, los artistes reivindiquen l’oficiu del diseñador frente a la irrupción de la Intelixencia Artificial. Tres la presentación del cartelu, surdieron voces en redes sociales que cuestionaben l’autoría humana del diseñu, una crítica que los autores atribúin al tracamundiu actual ente la ilustración dixital y los procesos algorítmicos. Por ello, dambos autores, cuantimás Marín, ilustrador editorial con trés décades d’esperiencia, defenden la naturaleza dixital, pero artesana, del so trabayu. Sorrayen l’esfuerzu de composición manual que rique una obra d’estes característiques, especialmente al tener qu’afaer los personaxes y elementos a ensame de formatos.
Frente a los patrones clónicos de la IA, Marín destaca’l control manual de cada focu de lluz y la disposición de cada figura nel llenzu, un procesu que nun puede ser retrucáu por un modelu de repetición. Esti compromisu cola creación manual ye parte del proyectu vital de los diseñadores, quien va años decidieron apostar per Asturies pa desenvolver la so carrera profesional buscando una redolada de cercanía y calidá de vida.
