MusicAsturiana

La dixitalización de los Anuarios de la Música Asturiana de 2001, 2002 y 2003 zarra l’actividá anual del AMCA

Nesti añu l’Archivu de la Música Contemporánea Asturiana fixo públicos dellos documentos importantes pa conocer el desarrollu d’esta escena musical.

Nel añu 2000 Discos L’Aguañaz creaba l’Anuariu de la Música Asturiana, una publicación dirixida por Xune Elipe que dende va más de dos décades recueye l’actualidá de la escena sonora del país y reflexona alredor d’ella. Agora yá tán na Hemeroteca pa lleer online y descargar llibremente los volúmenes del Anuariu de la Música Asturiana correspondientes a los años 2001, 2002 y 2003 (que se xunten a los del periodu 2012-2020 yá publicaos nel AMCA). Cola publicación d’esti conteníu, l’AMCA pon el ramu a los materiales asoleyaos en 2021, mentes que yá trabaya nos próximos conteníos que van ver la lluz a lo llargo’l 2022.

L’Archivu de la Música Contemporánea Asturiana (AMCA) nacía nel presente añu col enfotu d’investigar, catalogar y divulgar la música d’espresión asturiana actual. El periodu temporal fundamental del so llabor ye’l que va dende l’apaición del movimientu conocíu como Surdimientu, en 1974 (cola creación de l’asociación Conceyu Bable), hasta anguaño. Nesti sen, preténdese estudiar y reflexonar sobre los movimientos y escenes sonores qu’apaecen a lo llargo de les últimes cinco décades, como les del Nuevu Canciu Astur, el folk celta/atlánticu, el Rock Astur, la tonada renovada, la folktrónica o electro-trad, el post-folk, etc. Pa ello cuenta con un conxuntu de materiales diversu (cartelería, grabaciones, programes de mano, maquetes, cartafueyos, revistes, audiovisuales, semeyes…) y perinteresante (con bien de conteníos inéditos y/o esclusivos) que van, pasu ente pasu, dándose a conocer.

Nestos primeros meses de vida l’AMCA asoleyó dellos documentos significativos pal conocimientu de la escena sonora del país nes últimes décades. Asina’l primer material fechu públicu foi una grabación -inédita hasta esi momentu- del actu-conciertu que se desarrolló nel Teatru Campoamor pa conmemorar el trenta aniversariu de la creación de Conceyu Bable nel añu 2004. A ésti siguieron la grabación de la I Nueche Celta de Corao (1983) y del cartafueyu de la segunda (un material imprescindible pa conocer el fenómenu de les llamaes nueches celtes); rescatáronse pieces audiovisuales como una entrevista al grupu Asturcón (principios de los 80) o la primer entrevista que’l músicu bretón Alan Stivell concedió na so primer visita a Asturies (1980); publicóse íntegra la entrevista que l’ex director del Festival Intercélticu de Lorient, Lisardo Lombardía, fixera pa la serie documental D’ayeri a güei (TPA); y dixitalizáronse los dos númberos publicaos del fancín Al Son (1990), asina como los materiales que diben componer el terceru y que nunca llegó a publicase.

La intención del AMCA ye siguir dando a conocer materiales a lo llargo del 2022. Pel momentu anúnciase la dixitalización de la primer maqueta (1987) del grupu Dixebra, por cuenta del so trenta y cinco aniversariu nel 2022 y la grabación de la música del pabellón d’Asturies na Espo’92 del compositor Fernando Largo.

// Calca equí pa lleer na Hemeroteca los númberos del Anuariu de la Música Asturiana //