Con cara de llista, dulzura nos güeyos y perenne sorrisa, atiende diariamente a les sos veceres, munches d’elles yá son amigues, pa convertir l’arte de vistise en daqué prestosu, nel que’l tiempu pasa adulces porque les veceres precisen tiempu pa escoyer, ver y probar y probar hasta atopar lo fayadizo. A eso convida Stella Fonte García, a la que les palabres -y salen a golfaraes, anque, eso sí, siempre certeres y espresando lo que quieren dicir. Una virtú pocu valorada, pero bien interesante.
Nació n’Uviéu en 1987, anque paez que tien dalgún añu menos. Estudió nes Teresianes y la so mocedá de cháchares pasóla ente’l Tribeca «y echando’l duru nel Mangaráu». Eso sí, «nun yera ligona; tranquila, siempre nun segundu planu».
Acabó’l colexu y, siempre cola moda marcada a fueu na so mente, foise a Madrid a estudiar nel Institutu Européu de Diseñu y «cuando acabé fixi ADE na Complutense por un tratu col mio padre pa que me dexara estudiar moda».
Ye fía de Manuel, que trabaya pa la familia Cosmen n’ALSA, y d’Isabel, médicu. Tien dos hermanes, Cristina y Carlota. «Yo soi la del mediu», esto ye, según los espertos en vida familiar, la que se queda a medies en tou porque la mayor ye la mayor y la pequeña ye la mimada. O siquier eso dicen.
Nel 2021 casóse con Javier «con un vistíu de boda que fixi yo mesma», y tien dos fíos, Lola y Jaime. A ella vé-yla namorada porque-y rellumen entá los güeyos cuando apaez Jaime.
En total, pasóse nueve años en Madrid y, en trabayando un añu nel Grupu Décimes, decidió que yá taba bien de malvivir na capital y que quería volver a casa, a Uviéu, al terruñu. «Vi qu’aquello nun daba pa más y vini. El mio padre quedó maciu cuando lu cunté, notélu al traviés del teléfonu». Yera l’añu 2014.
Quería moda y decidió que valía más cabeza de mure que cola de lleón. «Vengo y métome na Asociación de Moda d’Asturies (Adimo) con Teresa Laso y voi faciendo cosines nun pequeñu apartamentu que teníen los mios padres. Yera’l mio atelier».
Trabayó una temporada en San and Cocu, na cai González del Valle, «y yá busqué’l mio local pa Namuka
