Yá pueden acutase les entraes pal conciertu inaugural del XVIII Festival Internacional de la Mázcara Ibérica. L’Auditoriu d’Uviéu acueye’l 12 de xunu un conciertu de Felpeyu, de músicos portugueses y un homenaxe al vascu Kepa Junkera. Musicasturiana.com
Del 12 al 20 de xunu Asturies va acoyer per primer vez el Festival Internacional de la Mázcara Ibérica (FIMI). Cine, meses redondes, presentaciones, charres y conferencies, alcuentros, una esposición y el desfile internacional de la mázcara ibérica dan forma a una programación qu’arranca’l vienres que vien col conciertu inaugural nel que toquen Felpeyu; los músicos portugueses Miguel Carvalhinho (Viola Beiroa), Celina da Piedade y Idalina Gameiro y hai un homenaxe al trikitilari vascu Kepa Junkera. Va ser a les 19.30h na sala de cámara del Auditoriu d’Uviéu y les entraes gratuites yá pueden acutase n’Internet.
El XVIII Festival Internacional de la Mázcara Ibérica (FIMI), tien un valor especialmente significativu, pela primer vez dende la so creación nel 2006, el festival sal de Portugal pa celebrase n’Asturies. Un finxu que reconoz un percorríu compartíu per años, nel que numberosos colectivos asturianos participaron vivamente, contribuyendo a consolidar el FIMI como un espaciu d’alcuentru, intercambiu y promoción internacional de les tradiciones.
Una de les claves d’esta edición ye’l so calter descentralizáu. El FIMI va espardise per dellos conceyos y espacios culturales, sobre manera naquellos territorios onde les mazcaraes siguen vives, conectando tradición, investigación y creación nun mesmu programa. D’esta manera Uviéu, Ayande, Villaviciosa, Siero y Xixón acueyen les distintes actividaes d’un programa qu’entama’l 12 de xunu col mentáu conciertu inaugural.
Desfile históricu
El momentu central del festival va ser e lgran desfile internacional del 20 de xunu n’Uviéu, con cerca de 600 participantes y más de 30 grupos procedentes de tola Península Ibérica y d’otros países europeos. Asina ye como van participar formaciones d’Asturies, Galicia, Castiella, Lleón, Cantabria, Extremadura, Portugal, Bulgaria, Grecia y Rumanía, ente otros. Acullá de la so dimensión, el desfile va ser una espresión de la diversidá y vitalidá d’estes tradiciones, un espaciu d’alcuentru nel que manifestaciones de raigañu llocal bien fuerte dialoguen ente sí y conformen un patrimoniu cultural común.
La Conseyería de Cultura, Política Llingüística y Deporte impulsa y financia esta edición col oxetivu claru d’avanzar na protección y l’espardimientu del patrimoniu cultural inmaterial, reforciando’l papel d’Asturies como territoriu de referencia alredor de les mazcaraes tradicionales. Amás, el festival coincide con un momentu especialmente relevante, l’entamu del procesu pa la declaración como Bien d’Interés Cultural (BIC), de calter inmaterial, del conxuntu de les mazcaraes d’iviernu d’Asturies. Un pasu empobináu a garantizar la so protección y tresmisión, pero tamién a reconocer el so valor como parte esencial de la identidá colectiva.
18 años d’historia
El Festival Internacional de la Mázcara Ibérica nació en 2006, cuando un desfile na ciudá d’Oporto marcó l’arranque d’esta iniciativa. Nos años siguientes, el FIMI consolidóse en Lisboa con quince ediciones consecutives, hasta convertise nún de los eventos culturales más relevantes de la Península Ibérica y atraer a miles de visitantes y participantes de dellos países.
Nos distintos años dende la creación del FIMI foron munchos los grupos asturianos que participaron activamente na so programación, apurriendo’l so trabayu y el so compromisu a un proyectu cultural compartíu. Colectivos como los Mazcaritos d’Uviéu, Os Reises de Tormaleo, Os Reises de Valledor o los Sidros, ente otros, viaxaron a Portugal pa formar parte del festival, amosando la riqueza de les mazcaraes del país y contribuyendo a estrechar unos llazos que se consolidaron colos años.
«Que’l festival se celebre agora n’Asturies ye un pasu coherente con esi percorríu y tamién una reconocencia a la implicación constante del texíu cultural asturianu. L’apueste del gobiernu d’Asturies, en collaboración cola organización del propiu festival, el Conceyu d’Uviéu y diverses entidaes culturales y académiques d’Asturies y Portugal, sofita’l llabor de los colectivos asturianos y refuerza’l compromisu institucional cola protección y la tresmisión d’un patrimoniu cultural inmaterial que pervive dende los nuesos antepasaos y forma parte esencial de la identidá colectiva asturiana», valoraron dende la Conseyería de Cultura.
Programa
• 12 de xunu. Conciertu inaugural del FIMI (Uviéu)
• 13 de xunu. Esposición sobre mazcaraes asturianes nel Palaciu del Conde de Toreno (Uviéu)
• 13 de xunu. Xornaes sobre mazcaraes (Valledor, Ayande)
• 14 de xunu. Cine y debate en Rozaes (Villaviciosa)
• 15 de xunu. Mesa redonda sobre les mazcaraes, el BIC y los festivales en Valdesoto (Siero)
• 16 de xunu. Presentaciones de llibros sobre mázcara ibérica (Uviéu)
• 17 de xunu. Conferencies y xornada sobre mazcaraes asturianes en Llaboral Ciudad de la Cultura (Xixón)
• 18 de xunu. Alcuentru académicu internacional sobre mazcaraes nel Edificiu Históricu de la Universidá d’Uviéu
• 19 de xunu. Charra sobre la tradición pictórica del carnaval en el Muséu de Belles Artes d’Asturies (Uviéu)
• 20 de xunu. Gran desfile internacional de la Máscara Ibérica y conciertu de clausura (Uviéu)
