La conocida como Llei de Ñetos xeró debate públicu. Los descendientes d’emigrantes amuésense desconcertaos pola postura de los partíos de la derecha y recuerden que n’otros países europeos tán más avanzaos nesta materia.
Roberto Cano Pereira atiende a TPA Noticies dende Buenos Aires. Ye bisnietu del catalán Miguel Serra Horta, qu’emigró p’América en 1880, con 14 años namás.
Serra Horta forxóse un porvenir n’Uruguái onde llegó a ser cónsul honorariu hasta la so muerte en 1949. Tuvo siete fíos y güei la so descendencia, más de 30 persones, tienen la nacionalidá española gracies a la Llei de Ñetos.
Roberto yá exerció’l so derechu a votu en delles cites electorales y nun entiende la polémica xenerada ente los partíos de la derecha.
L’afán por caltener los sos raigaños traxo a Roberto a España nuna decena de vegaes. La siguiente sedrá n’agostu cuando aconceyará col restu de los sos hermanos en Pineda de Mar, el pueblu del bisgüelu.
