Avilés acueye dende’l 26 de xunu ‘El Veranín d’ART Street’

La cai Palacio Valdés d’Avilés va acoyer dende’l 26 de xunu hasta’l 3 d’ochobre una nueva edición de ‘El Veranín d’ART Street’, una iniciativa cultural impulsada pola Asociación Cultural ART Street cola collaboración del Conceyu d’Avilés y Caxa Rural d’Asturies. El programa va ufiertar actividaes culturales pa tolos públicos, con propuestes de música, teatru y poesía que van convertir, nuevamente, esta céntrica vía nun espaciu d’alcuentru artísticu y cultural.

Unu de los momentos más destacaos d’esta edición va ser el Festival Mini, que se va celebrar el 15 d’agostu dende les 10:00 a les 23:00.

La xornada va incluyir conciertos, espectáculos de teatru y maxa, actividaes infantiles y un mercadín artísticu nel que creadores y artistes van poder amosar y vender directamente les sos obres al públicu.

La programación va desenvolvese hasta’l 3 d’ochobre con eventos culturales los xueves al mediudía y pela tarde a partir de les 20:30, conciertos los vienres y viéspores de festivu, y actuaciones musicales los sábados al mediodía.