Más de 19.000 escolares de 128 centros educativos ensayen l’eclís solar total que va cruciar Asturies el 12 d’agostu. l Principáu va celebrar el 29 d’abril el día del ximielgu solar, una xornada clave para preparar la observación del fenómenu astronómicu. Ficyt y la rede de Conceyos con Ciencia promueven concursos de fotografía para alcontrar el llugar dende’l que contemplar el tapecimientu del sol.
Como prólogu, el Gobiernu d’Asturies va celebrar el próximu miércoles, 29 d’abril, el día del ximielgu solar, nel que, a la hora a la que va tener llugar l’eclís branizu, l’astru va ocupar prácticamente la mesma posición nel cielu.
El día del ximielgu solar dexa comprobar dende cada allugamientu aspeutos clave como la visibilidá del horizonte o la posible presencia de torgues, lo que convierte la xornada n’una ferramienta útil para antemanar les condiciones reales del fenómenu.
Parte de les acciones impulsaes pol Principáu en redol al eclís tienen como focu la comunidá educativa. La Conseyería d’Educación promueve talleres y actividaes formatives para’l profesoráu, amás de poner a disposición de los centros materiales docentes para tolos niveles sobro’l fenómenu astronómicu.
Les actividaes previstes como prólogu al eclís inclúin charres divulgatives, esperimentos, trabayos interdisciplinares, talleres y propuestes creatives afeches a cada nivel educativu, coles mires de fomentar l’interés pola ciencia y la conocencia de la redolada.
Coles mesmes, alredor de mediu centenar de centros preve la participación de les families, y la mayoría contempla l’espardimientu de les actividaes al traviés de distintes canales de comunicación educativa, lo que va dexar amplificar l’algame de la iniciativa y estender la cultura científica a tola sociedá.
Nel marcu del ximielgu solar, dende la Conseyería de Ciencia, en collaboración cola Federación Asturiana de Conceyos (FACC), púnxose en marcha la campaña ¿Ónde me verás?, una iniciativa del programa Conceyos con Ciencia, que convida a la ciudadanía a fotografiar el 29 d’abril el llugar d’Asturies dende’l que-y gustaría contemplar l’eclís d’agostu.
La propuesta anima a identificar enclaves con valor paisaxísticu, emocional o simbólicu y a compartilos como posibles escenarios pa vivir el fenómenu del próximu agostu. El plazu de participación ta abiertu hasta’l 15 de mayu y el certame inclúi trés premios de 400, 200 y 100 euros.
Tamién nel ámbitu de la fotografía, la Fundación pal Fomentu de la Investigación Científica y la Tecnoloxía (Ficyt) punxo en marcha’l concursu Asturies y l’eclís solar 2026, con cuatro categoríes, ente elles, xuna dedicada al día del ximielgu solar y otra empobinada a estudiantes, con premios que van de 300 a 750 euros.
Estes acciones enmárquense na estratexa del Executivu autonómicu pa preparar Asturies énte l’eclís total de 2026, un eventu d’especial relevancia que va asitiar la comunidá como uno de los enclaves más destacaos d’España pa la so observación. La posición xeográfica del Principáu va dexar esfrutar d’una duración del fenómenu especialmente significativa, lo que refuerza’l so potencial como destín científicu y turísticu.
