Uviéu ente les capitales ensin abellugos climáticos frente al calor

El 70% de les capitales de provincia d’España nun tien abellugos climáticos, según l’informe «Ciudaes al rojo vivo» qu’acaba d’asoleyar Greenpeace.

Uviéu, denuncia la entidá ecoloxista, ye una d’eses ciudaes. Precisamente güei los vecinos de la contorna del Palaciu los Deportes salieron a la cai con sombrielles y paragües pa denunciar la falta de solombra nesta zona d’Uviéu.

Greenpeace acaba d’espublizar un informe nel que desvela que siete de cada diez capitales españoles, ente elles Uviéu, nun tien abellugos climáticos pal calor. Espacios públicos afayadizos pa protexese de les altes temperatures.

Ensin abellugos climáticos, dicen, nun momentu nel que’l branu que conocíemos nel norte yá nun esiste. Con foles de calor que n’Asturies, según el Ministeriu de Sanidá, provocaron cuasi 100 muertes dende’l mes de mayu.