Cultura destina más de 143.000 euros al funcionamientu y meyora de los museos y colecciones municipales. Les ayudes sofiten l’actividá cotidiana de trece equipamientos de titularidá local con una dotación de 75.000 euros. Una segunda llinia distribuye 68.148 euros ente once conceyos pa facer inversiones nos sos museos y colecciones museográfiques.
La Conseyería de Cultura, Política Llingüística y Deporte concedió nos últimos díes 143.148,34 euros destinaos a sofitar los museos y colecciones museográfiques de titularidá municipal. El financiamientu articúlase al traviés de dos llinies complementaries: 75.000 euros pa contribuyir al so funcionamientu diariu y otros 68.148,34 pa facer inversiones nestos espacios. Una cuantía movilizada pola conseyería pa sostener l’actividá d’esti espaciu y favorecer la so meyora en distintos conceyos.
Les ayudes destinaes al funcionamientu lleguen a trece entidaes locales de Bual, Navia, Grau, Cangas del Narcea, Somiedu, Cabranes, Santalla d’Ozcos, Quirós, Avilés, Tinéu, Grandas de Salime y Valdés, amás de la Fundación Municipal de Cultura, Educación y Universidá Popular de Xixón. Esta llinia dexa atender a lo llargo del 2026 los gastos vinculaos a l’actividá habitual de los museos y colecciones municipales.
A esti sofitu al día ente día de los centros súmase una segunda llinia destinada a financiar inversiones en museos y colecciones museográfiques municipales. La conseyería acaba de conceder 68.148,34 euros a once conceyos asturianos p’actuaciones que van tener que desenvolvese a lo llargo d’esti añu.
Nesti casu, les subvenciones lleguen a Avilés, Grau, Cabranes, Xixón, Santalla d’Ozcos, Grandas de Salime, Quirós, Somiedu, Carreño, Cangas del Narcea y Tinéu.
Les dos llinies dexen atender necesidaes distintes pero complementaries; per un llau, los gastos que faen posible tener abiertos y activos estos espacios a lo llargo del añu y, pel otru, les inversiones qu’ayuden a siguir ameyorándolos. Les ayudes concédense en réxime de concurrencia competitiva y les actuaciones financiaes correspuenden al exerciciu 2026.
Con estes ayudes, el Gobiernu d’Asturies amplía y afianza la so collaboración colos consistorios del Principáu pa sostener una rede de museos y colecciones vinculada estrechamente a los sos territorios y contribuyir asina a garantizar los derechos culturales de la ciudadanía. Son espacios que caltienen la memoria y el patrimoniu de los conceyos, avérenlos a vecinos y visitantes y caltienen vivu un patrimoniu cultural que forma parte de la identidá asturiana.
