♻️ La inversión de 1,40 millones d’euros, financiada con cargu a fondos MRR, dexa averar el reciclaxe de pequenos electrodomésticos, testiles y restos tóxicos a les cais de pueblos y ciudaes. Mi Oviedo
El Consorciu para la Xestión de Borrafes Sólides d’Asturies (COGERSA) punxo en marcha, en collaboración colos Conceyos, un nuevu serviciu de recoyida separada de borrafes especiales del llar (en concretu, de pequenos electrodomésticos, testiles y tóxicos), consistente en 72 ‘puntos llimpios’ de proximidá allugaos nel interior de diverses localidaes de 61 conceyos.
Esta actuación, que supunxo una inversión de 1,40 millones d’euros (IVA incluyíu), con financiamientu de fondos del Mecanismu de Recuperación y Resiliencia (MRR), vien completar la estratexa del Consorciu d’ameyorar l’accesibilidá de la ciudadanía a los servicios que faciliten el reciclaxe de toles fracciones de borrafes del llar.
En concretu, los equipos asitiaos por COGERSA tán destinaos al almacenamientu temporal de tubos fluorescentes, bombilles de baxu consumu y tipu LED, piles, bateríes, discos compactos (como CD y DVD), cartuchos de tinta y tóner, radiografíes, testiles (ropa y calzáu), aceite de cocina (dientro d’una botella de plásticu cerrada), pequenos electrodomésticos y aparatos d’informática o telefonía, fundamentalmente.
Los puntos llimpios’ de proximidá son módulos metálicos con distintos compartimientos internos para l’almacenamientu temporal de borrafes, diseñaos como moblame urbanu integrable na redolada y resistente a la intemperie. Empresten un serviciu bien útil para amenorgar los desplazamientos hasta los puntos llimpios atendíos por personal, que davezu s’alluguen nes contornes de les localidaes o en polígonos industriales.
Collaboración colos Conceyos para’l cumplimientu de la Llei 7/2022
Dende empiezos d’abril el Consorciu llevó a cabu la implantación progresiva de los puntos llimpios’ de proximidá nos allugamientos escoyíos polos Consistorios. La localización esacta de los equipos puede consultase nun mapa na web de COGERSA. Tópense nos conceyos d’Ayande, Ayer, Amieva, Balmonte, Bimenes, Boal, Cabrales, Cabranes, Candamo, Cangues d’Onís, Caravia, Castrillón, Castropol, Coaña, Colunga, Cuideiru, Degaña, El Franco, Xixón, Gozón, Grau, Grandas de Salime, Ibias, Eilao, Illas, Llangréu, Les Regueres, L.lena, Llanera, Llanes, Mieres, Morcín, Muros de Nalón, Navia, Onís, Uviéu, Parres, Peñamellera Alta, Peñamellera Baxa, Pezós, Pravia, Proaza, Quirós, Ribedeva, La Ribera, Riosa, Salas, San Martín d’Ozcos, Santiso d’Abres, Santalla d’Ozcos, Siero, Somiedu, Sotu’l Barcu, Tapia de Casariego, Taramundi, Teberga, Tinéu, Valdés, A Veiga, Vilanova d’Ozcos y Villaviciosa.
