La recuperación del #oso parde, hestoria d’un éxito colectivu nortes.me/2026/05/03/el-… vía @nortes_me por Ismael Juárez #Asturias
A principios de los ochenta, ver un osu n’Asturies yera casi un milagru, l’animal sobrevivía más en relatos heredaos que n’alcuentros reales.
A principios de los años ochenta, ver un osu n’Asturies yera casi un acontecimientu improbable. Para munches families ganaderes de conceyos como Somiedu, l’animal sobrevivía más en relatos heredaos que n’alcuentros reales. “Tábamos tol día nel monte curiando vaques o cabres y nun víes nin nicios, nin osos, nin buelgues nin nada”, recuerda Sofía Berdasco, fundadora de Somiedu Experience, empresa de turismu de naturaleza especializada en avistamiento de fauna. Nacida en 1982 n’una familia ganadera trashumante, creció n’una Asturies onde l’osu yera casi una guarda pantasma.
Cuatro décades dempués, la imaxe ye radicalmente distinta. Berdasco cunta que güei puede asomarse a la ventana de la so casa y ver una osa con críes na fastera d’enfrente. La escena resume xuna de les hestories de caltenimientu más esitoses d’España: la del osu pardu cantábricu, una especie que tuvo en cantu del colapsu y que güei vuelve espandise pol cordal.
Nos años noventa, la población cantábrica tocó mínimos históricos. Les estimaciones falaben d’apenes ente 50 y 70 exemplares partíos en dos núcleos aisllaos, oriental y occidental, con una situación xenética delicada y una mortalidá elevada por furtivismo.
Según datos de la Fundación Oso Pardo, el primer censu xenéticu integral realizáu nel cordal y espublizáu en 2020 alzó la cifra hasta unos 370 exemplares. Ese sigue siendo’l postreru gran datu consolidáu, a la espera d’una nueva actualización xenética prevista pa los próximos años.
L’indicador más utilizáu polos científicos pa midir la recuperación foi mientres años el númberu d’oses con críes. Según la mesma Fundación Oso Pardo, en 1994 apenes se detectaron trés oses con seis críes en tol cordal. En 2023 contabilizáronse yá más de cuarenta oses con críes añales, una cifra que reflexa hasta qué puntu la especie dexó tras l’abilsu.
Cuando matar un osu salía de baldre
Hubo un momentu en que la desapaición paecía plausible. “L’osu taba en peligru críticu d’estinción. Taba a puntu de dise del cordal Cantábricu, como se foi de los Pirineos”, resume Guillermo Palomero, presidente de la Fundación Oso Pardo. Mientres nos Pirineos hubo que reintroducir exemplares procedentes de Eslovenia para evitar la so desapaición total, nel cordal cantábricu inda quedaba una población abonda como para reaccionar a tiempu.
Palomero identifica trés factores decisivos nesa recuperación.
- El primeru foi combatir el furtivismo. A finales de los ochenta y principios de los noventa los osos morríen por disparu, llazos d’aceru y venenos.
- El segundu foi blindar l’hábitat por aciu la so inclusión na rede europea Natura 2000 y por aciu proyectos de restauración ambiental.
- El terceru, y quiciabes el más complexu, foi camudar la percepción social del animal.
La convivencia col osu, anque nun ta exenta de conflictos, resultó históricamente menos tirante que la del llobu en bona parte del cordal
“Antes había silenciu cómpliz cuando se mataba un osu”, esplica Palomero. “Había que consiguir aceptación social nel territoriu”.
Ende encaxa tamién la hestoria de Berdasco. La so familia, como tantes otres venceyaes a la ganadería, vía históricamente a los grandes carnívoros como una amenaza. Foi la so hermana, que trabayó nes primeres patrulles de caltenimientu del osu, quien introdució esi discursu ambiental dientro de casa. “Ye distintu cuando’l mensaxe llega dende daquién del territoriu”, esplica.
Del conflictu al negociu de ver osos.
La convivencia col osu, anque nun ta exenta de conflictos, resultó históricamente menos tirante que la del llobu en bona parte del cordal. Mientres esti postreru concentra bona parte del refugu de la ganadería estensiva, l’osu caltien una dieta mayoritariamente vexetal y provoca menos daños directos sobre la cabana ganadera. Un estudiu de la Universidá d’Uviéu sobro reclamaciones rexistraes ente 2009 y 2018 concluyó qu’el 60,2% de los daños atribuyíos al osu afectaben a truébanos, el 22,7% a frutales y el 12,9% al ganáu.
Osu muertu a llazu en Teberga.
L’animal, amás, terminó xenerando actividá económica en territorios marcaos pola despoblación. Un estudiu impulsáu pola Fundación Oso Pardo y l’Universidá d’Uviéu envaloró que’l turismu venceyáu al osu mueve en redol a 20 millones d’euros añales y sostien alredor de 350 empleos en conceyos del cordal. En conceyos como Somiedu, Degaña o Cangas, hoteles, cases rurales, guíes y empreses de naturaleza viven güei, en parte, d’un animal que va cuarenta años paecía condergáu.
Nos últimos años rexistráronse nuevos casos d’osos muertos por disparu o atrapaos en llazos
El riesgu de morrer d’ésitu Pero l’ésitu empieza a xenerar nueves tensiones. Berdasco sollerta d’un turismu ensin regulación abonda. Fala de coches bloquiando accesos a pueblos, fotógrafos intentando averase demasiáu y osos cada vez más avezaos a la presencia humana. “El problema nun ye qu’haya munchos osos. El problema ye que s’avecen a nós”, alvierte.
La esmolición tamién esiste dientro de la Fundación Oso Pardo. Pa Palomero, el gran retu yá nun ye evitar la estinción, sinón xestionar la convivencia nun cordal densamente humanizáu. “Esto nun ye Alaska”, resume. “Equí hai ganadería, apicultura, caza y cada vez más turismu. La clave agora ye faer compatible tou eso con una población d’osos que crez”.
La osa Molina. El furtivismo, amás, nun sumió del tou. Nos últimos años rexistráronse nuevos casos d’osos muertos por disparu o atrapaos en llazos, recordando que la recuperación sigue siendo fráxil.
La hestoria del osu pardu cantábricu demuestra que’l caltenimientu puede funcionar cuando alministraciones, científicos, ecoloxistes y población local remen na mesma dirección. Pero tamién recuerda que nengún ésitu natural ta garantizáu pa siempres.
