La conseyera de Cultura, Política Llingüística y Deporte, Vanessa Gutiérrez, asistió esta mañana nel Centru Deportivu de La Morgal a la III Xornada Muyer y Deporte, xunto cola directora xeneral d’Actividá Física y Deporte, Manuela Ena.
La iniciativa, que busca fomentar la práctica deportiva ente muyeres —especialmente mayores de 35 años—, convirtióse nun espaciu pa probar distintes disciplines, compartir esperiencies y crear redes ente participantes.
La conseyera destacó que se trata d’“una xornada mui necesaria” que, amás de promover estilos de vida saludables, ayuda a que munches muyeres vuelvan incorporar el deporte a la so vida.
De fechu, d’ediciones anteriores yá surdieron dellos grupos y equipos formaos por participantes que descubrieron equí nuevos deportes y siguieron practicándolos de manera habitual.
La xornada incluyó tamién una mesa redonda sobre bienestar y un reconocimientu al Club Voleibol La Calzada pol so 40 aniversariu, un club pioneru nel voleibol femenín asturianu que creó escuela y apostó dende los sos entamos pol deporte base y pola participación de les muyeres nel deporte. Un exemplu —destacó Gutiérrez— del papel que tien l’actividá física non solo na salú, sinón tamién na creación d’espacios de convivencia, disfrute y participación pa les muyeres.La esguilada y la pelota vasca son les dos novedaes d’anguaño, que se suman al voleibol, el baloncestu, los bolos, el rugby, l’h.oquei yerba, el deporte afechu y el tiru con arcu como disciplines a conocer y practicar poles participantes. Una forma de dar visibilidá al deporte practicáu por muyeres en distintos ámbitos, que sirve amás para crear una rede d’alcuentru ente deportistes y p’ufiertar un espaciu de convivencia.
