La Sala Inmersiva del Pozu Santa Bárbara va abrir les fines de selmana dende’l día 26. Dexa esperimentar una visita al interior d’una mina de carbón, con soníu ambiental, vibraciones y proyecciones calidable.
La Sala Inmersiva del Pozu Santa Bárbara en Mieres, iniciativa pionera n’Asturies que dexa esperimentar, ensin barreres físiques y de forma totalmente accesible, una visita al interior d’una mina de carbón, con soníu ambiental, vibraciones y proyecciones calidable, va abrir al públicu les fines de selmana a partir del próximu día 26.
Esta instalación formó parte mientres el branu de les visites empuestes al pozu de La Rebaldana y de los itinerarios del bus turísticu, iniciatives enmarcaes nel programa Esfruta Mieres, y agora podrá visitase de manera independiente los sábados y domingos de 11 a 14 hores.
La Sala Inmersiva ye una estructura modular, creada a partir d’un contenedor marítimu y qu’asemeya una xaula de mina, al traviés de la cual ufiértase una esperiencia única y afecha a tolos públicos: un viaxe al interior y a la hestoria del primer pozu mineru declaráu Bien d’Interés Cultural (BIC) nel nuesu país. Una iniciativa única n’Asturies y que complementa’l restu de promoción turística y divulgación del patrimoniu qu’esisten nes cuenques mineres y na comunidá.
Esti proyectu, que supunxo una inversión de casi 167.000 euros, foi executáu al traviés del Plan de Sostenibilidá Turística en Destín del Monte Central y financiao por fondos de la Unión Europea. «Una esperiencia única que s’enmarca nel apueste pola innovación y l’impulsu d’iniciatives singulares» que, dende l’equipu de gobiernu de Mieres (IX), llévase años desenvolviendo y que se materializa en propuestes novedoses y d’ésitu como Bocamina o la conversión del Pozu Santa Bárbara nun gran centru d’esperiencies artístiques».
La Sala Inmersiva del PZSB avanza, por tanto, nesta llínea de trabayu y dende el próximu sábadu podrá visitase de forma independiente. Los periodos previstos d’apertura van ser les fines de selmana hasta’l 6 d’avientu y dende el 20 de marzu hasta’l 26 de setiembre de 2027.
Amás, tamién va tar abierta nes siguientes feches festives: 12 d’ochobre, 2 de payares, 7 y 8 d’avientu, 25 y 26 de marzu, 16 d’agostu y 8 de setiembre.
