Fusión Asturias / Glendor Díaz Suárez, fotógrafu nocherniegu y de paisaxe. El mundu a la lluz de les estrelles
Llagu Ercina
Les imaxes del fotógrafu Glendor Díaz Suárez falen por sí mesmes y dicen tolo qu’esti artista de la cuenca del Nalón omite xeneralmente dende la so humildá. La espectacularidá de los sos cielos nocherniegos y l’apolmonante presencia de les estrelles príndennos irremediablemente, fáennos sentir pequeños énte un universu inmensu.
Dacuando la valía d’un artista paez tar soterrada entre cascotes con forma de razones, comparances o mala fortuna. Afortunadamente, nun son abondos pa escurecer l’habilidá de Glendor fine art, como robla l’artista asturianu natural de La Braña.
Ye de los pocos fotógrafos asturianos que retraten dende la nocturnidá y fáennos viaxar pola inmensidá de paisaxes a la lluz de les estrelles. La so pasión pola fotografía llevó-y a rincones onde la única fonte de lluz ye la qu’apurren nebuloses y constelaciones. Llugares como los desiertos del Sáhara y Atacama y rincones españoles y asturianos qu’inda se caltienen de la lluz artificial. Ende ye onde’l magu de la nueche puede faer la so maxa.
Glendor Díaz Suárez, fotógrafu asturianu
-¿Cómo te dio pola fotografía?
-Foi daqué progresivu, tou empezó cuando fixi la Primer Comunión y la mio madrina regalóme una cámara de semeyes, d’eses de carrete qu’había antes. Y ende foi cuando empezó a llamame l’atención. Faía semeyes a tou, anque la mayoría de los carretes non podía #revelar porque había que llevalos a un llaboratoriu a que te lo fixeren y costaba 2.000 pesetes.
Fueron pasando los años, cuando tenía once, merqué una cámara meyor y cuando cumplí los dieciocho merqué la mio primera réflex; una analóxica, de xacíu. Pasé al mundu dixital en 2002 y asina foi la mio evolución.
-De los tos tiempos d’infancia o mocedá, ¿qué imaxes enseñabes arguyosu a la to familia?
-Pos les d’equí, del mio pueblu. Soi de Tiuya, d’una aldega que se llama La Braña y diba faer semeyes al ríu y al monte que se ve dende delantre de la mio casa. Tamién-y faía semeyes al coche del mio padre, que-y tenía aburríu. Y de los viaxes d’estudios tengo semeyes de toos, de los compañeros, los profesores, los llugares a los que díbamos, del avión, del autobús…
Llevaba la cámara a toes partes; alcordanza que na comunión d’unu de los mios primos fixi más semeyes que la persona a la que contrataren.
-¿Cuándo decidisti emponer escontra la fotografía nocherniega y empezasti a afitate nes estrelles?
-Afayé la fotografía nocherniega de forma accidental. Siempres faía semeyes d’atapeceres y amaneceres, encantábame’l paisaxe y les semeyes de llarga esposición diurna. Y hubo una dómina, nel 2009, na que yo trabayaba nel puertu del Musel. Un día pela nueche dexé la cámara enriba d’un muriu qu’había ellí y al faelo calqué el botón por fuerza. La cámara empezó a funcionar y fixo una semeya d’ocho segundos; sosprendióme tolo qu’acababa de salir na imaxe cuando lo que yo vía delantre de mi taba tou escuru. Ende foi cuando decidí que quería faer esto y quixi aprender a faelo.
«Los fotógrafos como yo pasamos la vida buscando’l momentu xustu nel qu’hai que dir. Planiamos la hora esacta, ónde vas asitiar les trébedes, (…) si va haber o non lluna y, de sópitu, esi día llueve y sotrípate dos meses de planificación. Esto n’Asturies pasa munches vegaes»
-¿Fuisti autodidacta?
-Sí, pero d’aquella había bien poca información. YouTube taba empezando, nun ye como agora que la atopes perdayures. Buscaba nos llibros y tolos meses mercaba una revista que se llamaba Fotografía, de la qu’aprendí enforma. Depués, arriendes de un accidente de coche que sufrí en 2010 tuvi enforma tiempu llibre, paselo mal y la fotografía foi pa mi una bona salida. Punxi a estudiar la fotografía nocherniega más en serio, coles mesmes que la tecnoloxía tamién diba funcionando cada vegada meyor.
-Esi percance anició un pequenu caos na to vida, pero abrióte una puerta bien grande. Mirándolo con perspectiva ¿qué t’apurrió’l cambéu?
-Pos me dio ser lo que soi agora, un fotógrafu un poquitín conocíu nel mundu de la fotografía. Amás de ganar numberosos concursos internacionales y nacionales, en 2019 consiguí la medaya d’oru de la Lliga Nacional na categoría Nocherniegues. Y en 2023 volví ganala otra vegada.
Y si nun tuviera esi accidente, de xuru agora nun sería’l fotógrafu que soi. Siguiría más o menos cola vida que tenía antes y fadría cuatro semeyes cada fin de selmana. Ye verdá que me dexó dalguna remortina, pero hai qu’aprender a vivir con ello.
Petroglifos nel Valle del Encantu (Chile)
-Pudisti conocer llugares como l’observatoriu de Pangue, en Chile, o les dunes d’Ouzina nel Sáhara marroquín. ¿Quién te dixera que dibes percorrer mundu?
-Esactu. Dempués de la pandemia, hubo un pequeñu boom y fui a un montón de sitios, anque yo non vivu d’ello. En realidá, pa mi ye un hobby, pero faigo collaboraciones que me dan esos prestos. Páguenme’l viaxe y la comida, nun preciso más. L’añu pasáu tuvi diez díes en Chile, nel desiertu d’Atacama, daqué que nunca imaxinara.
-Llama l’atención la maxa de les tos fotografíes. Inclusive llugares d’Asturies bien conocíos paecen otros pela nueche o acompañaos de les estrelles.
-Claro, nun ye lo mesmo ver una sablera a les 3 de la tarde n’agostu qu’a les 3 de la mañana n’ochobre. Camuda la lluz, la cantidá de lluna qu’hai allumada o que nun haya lluna, que se vea la Vía Láctea o que nun se vea. Los fotógrafos como yo pasamos la vida buscando’l momentu xustu nel qu’hai que dir. Planiamos la hora esacta, onde vas asitiar les trébedes, hasta ónde va llegar l’agua de la marea nesi momentu, si va haber o non lluna… y, de sópitu, esi día llueve y sotrípate dos meses de planificación. Esto n’Asturies pasa munches vegaes.
Como exemplu lo del eclís que va haber el 12 d’agostu, yo yá sé ónde voi tar, dende qué hora hasta qué hora, lo que voi faer, téngolo tou preparáu, solo tengo qu’esperar a que llegue’l día. Va Haber que cruciar los deos, pero si ta borrinosu como güei, va haber que tirar Payares embaxo. Asina ye la vida equí, hai que faese a ello.
«La primer vegada que vi les Nubes de Magallanes colos mios propios güeyos, lloré. Pa daquién como yo que mira’l cielu #tou les nueches y que sabe ónde tán les estrelles, llegar a esi llugar y veles a güeyu ye brutal»
-Les semeyes de la Vía Láctea nel hemisferiu sur son impresionantes, ¿qué t’apurre esta nocturnidá?
-Al meyor a una persona que nun sía fotógrafu, nun lu da más, pero la primer vegada que vi les Nubes de Magallanes colos mios propios güeyos, lloré. Pa daquién como yo que mira’l cielu toes les nueches y que sabe ónde tán les estrelles, llegar a esi llugar y veles a güeyu ye brutal.
Gústame, encántame esto, el tar solo ende metanes la nada, con esa tranquilidá.
-¿Dalguna vegada tuvisti qu’arreglar dalgún problema pol fechu de dir en solitariu?
-Nunca me pasó nada, pero tengo una fobia bien grande ya irracional a los xabalíes, prefiero cruciame con un llobu que con un xabalín. Si oyo pasos detrás de mi, nun pienso si va ser un osu o un llobu, solo que por Dios nun sía un xabalín.
Otra manera, gústame esa paz, el tar solo ende na escuridá. Cuando tuvi nel Sáhara, el mio padre preguntábame si nun tenía mieu, pero siempres-y dicía: mira pá, tengo más mieu a dir pola cai Uría un día a les 3 de la tarde qu’equí a les 3 de la mañana porque equí toi solu.
-Tas de nueche nun país alloñáu so un cielu pimpanu… ¿En qué pienses? ¿Qué te fai sentir?
-Pos, dígote lo que me pasaba pela cabeza nel últimu viaxe, cuando caminaba solo poles Dunes d’Ouzina, nel Sáhara, porque los mios compañeros quedaren nel hotel: “¿Cómo pue ser que me llamaren a mi pa participar nesti proyectu? ¿De verdá soi tan bonu por que quieran cuntar conmigo pa faer esto?”. Ye lo que pensaba y nun me diba de la cabeza. Yera tan espectacular tou, tan inmensu: el cielu, el sable, los camellos al to llau dormiendo… realmente yera de película. Tengo una amiga que me diz que tengo’l síndrome del impostor, que tengo que creeme lo y curalo.
Dromedariu nel desiertu d’Ouzina (Marruecos).
-¿Qué nueche fotográfica llomaríes de la peor por dalguna circunstancia qu’esperimentares y, en contraposición, cuál ye foi la meyor?
-Pos nun tuvi nengún problema nes sesiones, la verdá ye que les esfruto enforma, pero sí tengo una esperiencia negativa, el peor día de la mio vida y que nun voi escaecer nunca. Taba n’Albacete, preparando una sesión en La Manchuela cuando esa nueche llamóme la muyer d’un amigu mio, un compañeru indixebrable, un hermanu pa mi, y comentóme que-y diera un ictus. Foi horrible porque la situación pintaba tan fea que yá non me diba a avagar velo y, ello ye qu’asina foi. Esa foi la peor nueche.
La meyor, cuando la mio novia vieno conmigo per primer vegada a una sesión fotográfica y enseñélu cómo faía les semeyes. Tábamos nes isles Cíes y ye un llugar fantásticu pa tar pela nueche.
-¿Esti tipu de fotografía rique de muncha técnica?
-Pos sí, tanto cuando faes la semeya, como n’edición y posproducción dempués en casa. Por casu, una imaxe bona de la Vía Láctea, una na que se ve con tantu detalle y color, en realidá nun ye una sola semeya. Yo faigo 20, 30, 40 o inclusive 60 semeyes al cielu, de 30 segundos de duración caúna, y depués con un programa llogro la información de toes, y la resultancia ye una semeya nueva na que salen tolos detalles del cielu. Tolo que’l güeyu humanu nun ve sale faciendo un procesu que ye risonderu pero llargu, porque nun ye a cencielles llegar y disparar. Asina ye cómo consigues que salgan toles nebuloses, los colores, les estrelles, tou como ye en realidá, non como lo vemos nós.
«En llugares como’l desiertu d’Atacama, nel qu’hai tanta ausencia de lluz nocherniego, puedes mirar al cielu y ver la Vía Láctea, pero nun lu ves con #el colores que consigue una cámara porque’l güeyu humanu pela nueche ve en blancu y negru»
-Hai constelaciones, como Orión, que se repiten les tos fotografíes. ¿Por dalguna razón n’especial?
-Dende abril hasta setiembre, el cielu preside la Vía Láctea, ente que pel hibiernu, #presidir la constelación de *Orión. Nun ye posible ver xuntos el centru galácticu y Orión, por eso pel branu la protagonista ye la Vía Láctea y pel hibiernu, el guerreru de *Orión, anque como fai fríu nesa dómina faigo menos semeyes. Tamién tengo dalguna de la sietestrellu, que m’encanta.
-¿De neñu yá mirabes les estrelles o ye daqué que llegó más tarde?
–Non, ye de siempre. Encantábame, siempres miraba al cielu. Recuerdo les nueches de branu nel pueblu de La Braña, nel qu’había bien poca contaminación llumínica. Toles nueches vía una nube nel cielu cola mesma forma, y güei sé qu’aquella nube que vía yera una nebulosa de la Vía Láctea na rexón del Cisne.
-¿Cómo te sentisti la primer vegada que visti la Vía Láctea al traviés de les tos fotografíes?
-Bien mal, la primera bien mal. Yo había vistu semeyes de la Vía Láctea de fotógrafos estranxeros, porque n’España naquella dómina bien pocos o casi nengún faíen semeyes a la Vía Láctea. Había unu en particular, Michael Shainblum, yo flipaba coles sos semeyes y dixi que tenía que faer lo mesmo qu’él. Asina que miré n’Internet cuando había lluna nueva y fui a Barrios de Lluna a faer la semeya, pero cuando depués vila pensé: ¡menuda mierda! Colé desesperáu pa casa. Eso foi en 2013, pero depués volví y fui ameyorando, tanto qu’en 2019 gané la medaya nacional de la Lliga Fotográfica.
Santo Cristina de L.lena.
-Non solo ganaste una vegada, repitisti en 2023.
-Sí, fui’l ganador na categoría de fotografíes Nocherniegues, foi la hostia.
-¿Empezasti a sentite un pocu más fotógrafu?
-Sí, pero asocedióme lo de siempre, pensaba ¿cómo toi yo equí enriba ente toos estos fotógrafos, col nivel que tienen? El restu de la xente siempres me dicía: “Pero si tu tas el primeru, tienes más nivel qu’ellos”.
Esti día escribióme una amiga, mandóme una semeya y escribióme: “Mira, yá te superé”. Y allegréme enforma, encántame que me superen porque quier dicir que tengo que siguir aprendiendo coses. Asina m’obliguen a avanzar más, a superame.
-Nel más absolutu silenciu d’una nueche estrellada ¿qué pensamientos t’invaden?
-Pos de lo más variopinto, dende pensamientos propios del síndrome del impostor hasta los díes que falten por que podamos cobrar o que colé de casa y nun punxi los garbanzos a remueyu. Y tamién otres cuestiones más trascendentales como pensar que la estrella que toi viendo ta a 5 millones d’años lluz. Y que, anque siga viendo la so lluz, al meyor esa estrella yá nun esiste.
«Recuerdo les nueches de branu nel pueblu de La Braña, nel qu’había bien poca contaminación llumínica. Toles nueches vía una nube nel cielu cola mesma forma, y güei sé qu’aquella nube que vía yera una nebulosa de la Vía Láctea na rexón del Cisne»
-Fuisti pasando por munches fases na to trayectoria fotográfica, ¿crees que na to evolución va haber daqué más potente que l’astrofotografía?
-Nun sabría qué dicir. Agora mesmu toi tan centráu nesto, gústame tantu y soi tan feliz faciéndolo… Cuando fui a Marruecos pensaba ¿qué tal saldríame si faigo semeyes a esta xente como faen otros fotógrafos?, pero creo que me da mieu salir de la mio zona de confort y tamién que yá fixi semeyes de too tipu: de productos, de conteníu social, de cai… más o menos di-y a tolos palos y, a la fin, la nueche ye lo que más me gusta.
-Nun momentu determináu, una situación accidental fixo que la to vida se reencaminase ¿de dalguna manera la vida ta dándote pistes pa la to definir la to trayectoria?
-Sí, ye posible, porque tolo que va asocediendo foi a base de casualidaes. Empecé na fotografía nocherniega por una casualidá, disparóseme la cámara, daqué que ye interesáu, y flipé. Y depués, cuando tuvi l’accidente, siguí na fotografía como una forma de salida.
Nel 2016 gané un concursu de fotografía que se llamaba Olympus Esquiza. Unu de los premios yera dir a les Isles Cíes una fin de selmana y cuando llegué ellí, l’anfitrión, Fernando Rei, un embaxador d’Olympus, yera’l guía que nos llevaba a los sitios. Fiximos bien amigos, a día de güei siguimos siéndolo, y ye el dueñu de la empresa audiovisual LuzLux qu’entama munchos de los viaxes a los que voi por pidimientu so. Ye otra de les casualidaes. Si nun me presentara a esi concursu, nun lo conocería.
-¿Al to fíu gústa-y tamién la fotografía o colo que fai’l so padre ye abondu?
-Nun-y gusta nada. Cuando taba estudiando díxi-y que, si aprobaba toes, mercába-y una cámara de semeyes, la qu’él quixera. La so contestación foi: «pá, mércala pa ti». Ello ye que nel so Instagram tien trés o cuatro semeyes namás.
-¿Tienes dalgún proyectu en mente?
-Tengo la esposición Mientres tu dormíes, que lleva dos años moviéndose per Asturies y, pel momento, nun tengo namás a la vista. Dende una productora animáronme a escribir un llibru y ufiertáronme la so ayuda, pero dixi que non, anque tampoco ye un non pa siempres, nunca se sabe. Dícenme que, coles mios semeyes, yá tengo un 80% del llibru aseguráu. Si dalgún día decido, nun sería una publicación técnica, más bien daqué en plan anecdóticu coles coses que me fueron pasando, daqué mediu cómicu.
Mientres tu dormíes, Castillo de Zafra (Guadalaxara).
La esposición fotográfica Mientres tu dormíes de Glendor Díaz amuesa un universu nocherniegu difícilmente imaxinable y apenes imperceptible pal güeyu humanu. Con una serie de 20 imaxes nocherniegues espectaculares de la Vía Láctea y los meyores cielos d’Asturies, d’España y de llugares como’l desiertu d’Atacama y el Sáhara, el fotógrafu asturianu fainos suañar despiertos y a lo grande.
«Tengo semeyes feches n’Allende, que tien la certificación Starlight –esplica l’artista–. Tamién de los Picos d’Europa pela nueche, de los Llagos de Cuadonga y de llugares como’l Castiellu de Zafra, en Guadalaxara, unu de los meyores cielos de tola península».
L’amuesa lleva dos años moviéndose per Asturies. Empezó nel CIFP Cislán, na Felguera, y a partir d’ende tuvo en distintos centros y en munchos equipamientos culturales. Agora mesmu ta na Casa de la Cultura de Tinéu, mientres el mes d’agostu va poder visitase nel Atenéu de Xixón y en septiembre va tar nes Escueles Doráu, en Sama de Llangréu.
