L’artista escueye los 20 cantares que más-y presten y fala d’arquitectura tradicional, programación cultural comunitaria y más coses.Un discu qu’enxamás canses de sentir.
Mediterráneo de Joan Manuel Serrat.
Si tuvieres que formar parte d’otru proyectu musical, ¿cuál sería?
De Bombón de la Ibense.
De los cantares que compusisti o interpretes, ¿cuál ye’l to preferíu?
“Valse”.
«Si fuere Conseyeru de Cultura, promovería la construcción de fornos y llares nos pueblos como llugares pa la programación cultural comunitaria»
¿Cuándo foi la primer vez que xubisti a un escenariu y que pasó enantes, durante y depués?
Pues yo creo que foi nun conciertu de la Escuela Municipal de Música d’Uviéu. Púnxime a sangrar pela nariz nel escenariu mientres tocaba la persona que diba enantes que yo. Un cuadru.
¿Qué ye lo más inxusto de ser artista?
El que nun se considere la intermitencia de la profesión.
Si fueres Conseyeru de Cultura, ¿qué son les primeres coses que fadríes?
Facer que se cumpla la Llei d’usu del asturianu y protexer el llar y el fornu como elementu indispensable de la cocina y la casa asturianes. Protexendo los que queden al mesmu nivel que los horros o los molinos, y promoviendo la construcción de fornos y llares comunitarios nos pueblos como llugares pa la programación cultural comunitaria.
«La mayoría de los cantares que siento son culposos pa dalguna xente. Encántame lo kitsch, pero yo creo que a naide-y sorprende esta confesión»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Ensin dulda, El Presi y Mariluz Cristóbal
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Uff… la mayoría de lo que siento ye culposo pa dalguna xente. Encántame lo kitsch, pero yo creo que a naide-y sorprende esta confesión. Agora toi a tope con “Virtual Diva” de Don Omar, por exemplu, o “Como la Flor” de Selena.
¿A qué personaxe públicu convidaríes a un conciertu tuyu, a pasar llueu pel backstage y pa qué?
A Yenesi, porque creo que pue ser una persona mui divertida y nos camerinos pásense munchos tiempos muertos.
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Hestoria universal de Paniceiros, de Xuan Bello.