LNE / Alexandra Lange, esperta n’infancia: «Coles pantalles piérdese la maña manual, hai neños que nun saben usar les tisories». L’autora estadounidense encamienta remocicar los patios escolares para fuxir del asfaltu y el plásticu, ya incorporar madera, agua, piedra y «materiales de verdá».
Cuando Alexandra Lange (EEXX, 1972) tuvo a los sos dos fíos, empezó a entrar na so casa una ábanu d’oxetos infantiles: xuguetes, cacía, ropa y muebles. Como crítica de diseñu y arquitectura, l’autora estadounidense nun pudo evitar estudialos y afayar la hestoria que s’escondía detrás de cada unu d’ellos. ‘El diseñu de la infancia’, llibru qu’agora edita n’España Capitán Swing, ye muncho más qu’una hestoria de xuguetes. Ye la demostración de que’l diseñu va de la mano de la pedagoxía. Xugar y manipoliar oxetos ye una actividá fundamental para’l neurodesarrollo de los más pequenos.
–En plena dixitalización, ¿sigui siendo bona idea regalar a un neñu un xuegu de construcción?
–Nun soi del tou antipantallas. Con Minecraft puede aprendese enforma, pero tocar oxetos reales te ufierta coses que non te brinda un dispositivu dixital. Dixebrar dos bloques de Legu esixe maña. Dellos profesores dicen que los sos alumnos nun saben remanar bien unes tisories, y eso debe a que nun tienen práctica retayando papel. Nesta dómina de pantalles, la maña manual ye un arte perdío, una llección perdida.
«Nesta dómina de pantalles, la maña manual ye una llección perdida, hai profesores que dicen que los sos alumnos nun saben remanar bien unes tisories»
–Igual qu’escribir a mano, ¿non?
–Sí. Nun falo de la lletra amestada, sinón, a cencielles, d’escribir a mano, que ye importante para memorizar. Nun fuimos conscientes de la importancia de faer daqué a mano hasta que dexemos de faelo.
«Nun soi del tou antipantallas, pero tocar oxetos reales te ufierta coses que non te brinda un dispositivu dixital»
–Critica los parques actuales, sobremanera los más modernos, y pide remocicalos con dos únicos elementos: caxes y sable. ¿Qué se mueve nel celebru d’un neñu cuando manipolia dambes coses?
–Cuando vamos a un parque y vemos qu’hai un equipamientu nuevu y orixinal, emponderamos al diseñador por crear daqué innovador. Pero nos parques que solo tienen palos, caxes y tierra, el ceador ye’l mesmu neñu. Nel so celebru actívase una idea: “Quiero xugar, ¿cómo activu tou esto para faelo? ¿Cómo faigo que sía risonderu colos mios amigos?”
Ye bien distintu lo qu’asocede nel so celebru cuando lu convidamos a formar parte del mundu adultu y dicímos-y: equí tienes un tobogán, puedes xubir y baxar les vegaes que quieras. Si dexes solo a un neñu con una pila de caxes va acabar reinventando esi tobogán, una esperiencia muncho más tresformadora qu’usar el tobogán yá fabricáu. Constrúyise, rómpese, te caes y vuelves empezar. Ende tas desenvolviendo’l pensamientu creativu.
«Nun soi del tou antipantallas, pero tocar oxetos reales te ufierta coses que non te brinda un dispositivu dixital»
–Los adolescentes yá nun quieren saber nada de parques. ¿Qué faemos con ellos?
–Munchos siguiríen xugando nos parques si tuvieren fechos a la so midida ya incluyeren, por casu, tirolinas y rocódromos. Los más mayores nun quieren instalaciones de colores, que son para los pequeños. Pero, al igual qu’ellos, los de 15 o 16 años tamién podríen construyir coses. En llugar de caxes y arena, podríen tener madera, clavos y ferramientes, y disponer d’un tutor de l’actividá. Delles ciudaes tienen un problema porque los chavales métense en pandilles, pero, si das-yos coses que faer, enríen la so enerxía asina y nun rompiendo escaparates.
–Los patios de colexu son un campu de fútbol asfaltáu.
–Eses infraestructures precisen una reforma de diseñu, efectivamente, ya incorporar elementos senciellos, como forgaxes de madera y sable. Los de Nueva York tamién yeren pistes d’asfaltu y, adulces, nellos hanse empezáu a llantar árboles y habilitar parterres para disponer de güertos. Tamién s’añedieron estructures para dar solombra porque los colexos nun pueden quedase al marxe del calentamientu global. Tocar materiales de verdá ye importante a toles edaes. Si los neños solo espónense a escaleres manufacturaes que siempres tienen el mesmu altor, cuando s’atopen con un desnivel nun monte, nun van saber xubilo. Los patios precisen madera, agua, piedra y materiales de verdá en llugar d’asfaltu y plásticu.
«Munchos adolescentes siguiríen xugando nos parques si tuvieren fechos a la so midida ya incluyeren, por casu, tirolinas y rocódromos»
–Hai escueles infantiles qu’escarecen de patiu esterior y los neños permanecen tol día n’un aula.
–Paezme que son neños zarraos y, lóxicamente, nun me gusta. Cola cantidá de coses que pueden aprendese nel mundu esterior y lo muncho que precisamos la lluz del sol, ye tarrecible que pasen tantes hores mientres la so primer infancia so un techu.
–Les families tamién tenemos enforma que dicir. Usamos el móvil para entretener a los nuesos fíos yá teamos nun parque o nun restorán.
–Creo qu’esto ye una cai de doble sentíu. Esplico. Ye importante que los padres falen colos sos fíos y lleven xuguetes para ellos na mochila, pero tamién ye vital qu’el mesmu xuegu tea presente nesa cafetería. Los neños pequenos nun pueden tar sentaos tantu tiempu como los adultos, asina qu’una bona opción son los parques qu’inclúin un chigre para los adultos. Estos díes tuvi en Madrid Río y vi munches cafeteríes, pero nenguna ta na zona de xuegos infantiles. ¿Por qué nun poneles xuntes?
«Otru aspeutu llinda l’autonomía infantil ye la cantidá de tiempu que se pasa na escuela y l’énfasis nos exames y nel aprendizaxe de llibros de testu»
–Los coches y la velocidá son dos grandes enemigos de la infancia na cai. ¿Dalgunu más?
—Colos neños y neñes hai munchos mieos infundaos, pero esti ye real. N’EEXX siempres falamos con envidia de les cais y los coches d’Europa, más pequenos que los nuesos. La víctima d’un atropellu a 25 km/h tien más posibilidaes de sobrevivir qu’una atropellada a 50 km/h. Con más cais piatonales, los neños seríen más autónomos ya independientes.
Otru aspeutu urbanu que llinda l’autonomía infantil ye la cantidá de tiempu que se pasa na escuela y l’énfasis nos exames y nel aprendizaxe de llibros de testu. Los padres esmolécense pol futuru de los sos fíos y los neños tienen cada vez más actividaes académiques y nun dan oportunidá al aprendizaxe al traviés del xuegu.
«Munchos neños siguen una especie d’horariu de trabayu; yo nun querdría vivir asina, y creo qu’ellos tampoco»
–¿Los chavales tamién tienen axendes de ministros n’EEXX?
–Sí, sobremanera deportes entamaos como extraescolares. Bás ente, fútbol. Pero non llibre, sinón con un entrenador, horarios y entrenamientos. Lleguen a casa tarde y tienen que duchase, faer los deberes, cenar… y dormir. Ye un horariu de trabayu. Pero’l so trabayu ye la educación y el deporte. Yo nun querdría vivir asina. Los neños tampoco.
–¿Qué opina d’eses oficines nes que los emplegaos trabayen ensin horariu, pero tienen un futbolín y sillones de colores?
–Son diseños risonderos que despinten el proyectu real de la empresa: que la xente quédese más tiempu nel trabayu. Paez risonderu, pero nun lu ye. El trabayu ye trabayu, y el xuegu, xuegu.
