Musicasturiana.com / El Festival Intercélticu d’Avilés anuncia la programación completa de la so 29ª edición. La cita avilesina va tener como puntu clave l’homenaxe a los músicos Xuacu Amieva y Mariluz Cristóbal Caunedo.
La música tradicional asturiana va ocupar un llugar central na próxima edición del Festival Intercélticu d’Avilés, que se va celebrar del 20 al 26 de xunetu, consolidándose como unu de los principales escaparates del folk del país y del conxuntu del Arcu Atlánticu.
El cartel d’esti añu destaca pola fuerte presencia de formaciones asturianes, que van ser parte fundamental de la programación musical. Ente elles atópense grupos como Cuévano, Bandina Turcipié y la Bandina Los Muiles, que van llevar al escenariu pieces representatives del repertoriu tradicional, con protagonismu pa la gaita, la percusión y los ritmos populares. Tamién van participar la Banda de Gaites Esbardu y el Grupu Folclóricu Prau Llerón, xunto col Grupu Baille Esbardu, amosando la estrecha rellación ente música y danza dientro de la tradición asturiana.
Amás, la presencia d’intérpretes de referencia como la cantante de tonada Mariluz Cristóbal Caunedo refuerza’l pesu de la música vocal tradicional dientro del festival, poniendo en valor un xéneru fundamental del patrimoniu cultural asturianu. Nesi sen, destaca l’actu d’entrega de la cuarta edición de los Premios Gausón 2026, que se van entregar a Xuacu Amieva, Mariluz Cristobal Caunedo y al Ayuntamientu de Corvera.
Xunto a estes formaciones, el programa inclúi tamién la participación d’entidaes y colectivos culturales del país como la Lliga Celta d’Asturies, que contribúin a la difusión y defensa de la cultura tradicional, amestando música, danza y actividaes divulgatives. A ello han sumase toles actuaciones d’agrupaciones y bandes de tol Arcu Atlánticu. El festival, consideráu’l más importante d’esti tipu n’Asturies, combina la presencia internacional con una clara apuesta pola identidá musical propia, dando visibilidá a bandes de gaites, agrupaciones folclóriques y artistes que caltienen viva una tradición que sigue evolucionando ensin perder les sos raigaños.
Darréu, estos son los actos con presencia de la música asturiana:
- Martes, 21 de xunetu, a les 13:00 hores – Pasucais con Banda Gaites Esbardu dende la Plaza España hasta La Esposición
- Martes, 21 de xunetu, a les 14:00 hores – Bardos del Mundu Celta con Banda Gaites Esbardu en La Esposición
- Martes, 21 de xunetu, a les 19:00 hores – Pasucais de los grupos de baille dende la Plaza España hasta La Esposición
- Martes, 21 de xunetu, a les 20:00 hores – Esbilla de los grupos de baille con Prau Llerón y Esbardu en La Esposición
- Martes, 21 de xunetu, a les 22:00 hores – Taller de baille asturianu con Prau Llerón en La Esposición
- Miércoles, 22 de xunetu, a les 22:00 hores – Actuación de la Bandina Los Muiles en La Esposición
- Xueves, 23 de xunetu, a les 22:00 hores – Actuación de la Bandina Turcipié en La Esposición
- Vienres, 24 de xunetu, a les 12:30 hores – Entrega de los IV Premios Gausón 2026 a Mariluz Cristobal Caunedo, Xuacu Amieva y Ayuntamientu de Corvera nel Palaciu de Valdecarzana
- Vienres, 24 de xunetu, a les 22:15 hores – Actuaciones de la banda Cuévano y Mariluz Cristóbal Caunedo
- Sábadu, 25 de xunetu, a les 13:00 hores – Pasucais cola participación de la Banda Gaites de Corvera d’Asturies nel Anfiteatru Parque Europa de Corvera d’Asturies
- Domingu, 26 de xunetu, a les 18:30 hores – El gran desfile de países celtes dende la Plaza España hasta La Esposición
- Domingu, 26 de xunetu, a les 19:00 hores – Andecha Intercéltica cola participación d’Esbardu
