Publicado en Sin categoría

Tiempu n’Asturies: domingu 25

  • Alborecemos con escasa nubosidá, sicasí hai dellos intervalos de nubes altes nel ocidente asturianu con unes temperatures que tan alrodiu de los 10-15ºC, rexistrándose nel puirtu Payares 8,7ºC.
  • Güei va dir n’aumentu la nubosidá alta pa dexanos el cielu empuercáu délla pela tarde con unes temperatures en moderáu ascensu con másimes que sobrepasarán los 20ºC en munches zones d’Asturies, amás l’aire gallegu-baxu dirá n’aumentu y pue dexar dalgo de foehn al pasu pelos cordales.

  • Mañana llunes va ser un día más llimpiu col cielu más escampláu con unes temperatures que van caltenese mui suaves, sicasí na costa puen baxar llixeramente por mor del vientu nordés y les brises costeres, nel restu sedrá sele ya variable.
  • El martes dirá rápidamente n’aumentu la nubosidá baxa que mos va empobinar orbayos ya orpines durante la tarde con unes temperatures másimes que van descender bultablemente nel interior asturianu y más sele nel llitoral.
  • El miérecoles alboreceremos igual, con borrinos y nublines que dexarán escapar dalgo d’orpín nes primeres hores del día, pa dir remitiendo y desapareciendo durante la mañana con unes temperatures que van camudar poco, calteniéndose un ambiente fresco pero nun fríu.
  • El xueves vamos tener nubes ya claros o abancios con unes temperatures mínimes en descensu ya unes másimes que suben llixeramente, ascensu que sedrá moderáu de cara al vienres onde tendremos un cielu empuercáu por nubes altes.
Paez que’l sábadu vuelve l’orpín con abondosa nubosidá baxa pa meyorar el domingu pero esto yá lu diremos viendo.

 

Autor:

Maestra de Llingua Asturiana Colexu Carmen Ruiz-Tilve - Uviéu