Publicado en Sin categoría

Estáu del tiempu n’Asturies

  • Alborecemos col cielu cubiertu ya con unes temperatures que tan alrodiu de los 18ºC, rexistrándose nel puirtu Payares 15,2ºC.
  • Güei vamos tener el cielu nuboso durante tol día, siendo la nubosidá más abondosa al final onde nun se descarta dalgo d’orpín con unes temperatures que camudarán poco calteniéndose un ambiente suave y afayaizu.

  • Mañana miércoles tendremos nubes pela mañana pero con tendencia a dir dixebrándose a partir del mediudía pa dexanos una tarde escamplada y soleyera con unes temperatures en moderáu ascensu, algamándose los 25ºC en tol interior asturianu.
  • El xueves dirá n’aumentu la nubosidá con nubes de desendolque vertical que puen dexar dalguna gotera o xarabatín de calter tormentosu al atapecer, amás les temperatures anicien un descensu xeneralizáu.
  • El vienres tendremos nubosidá baxa en xeneral pero les precipitaciones nun surdirán hasta finar el día con unes temperatures que siguen en descensu.
  • Yá nel riscar del sábadu los xarabatos dirán xeneralizándose ya intensificándose , siendo persistentes y de calter moderáu, situación que pue estendese durante tol día y parte del domingu, pero esto yá lu diremos viendo.

 

Autor:

Maestra de Llingua Asturiana Colexu Carmen Ruiz-Tilve - Uviéu