musicasturiana.com
Noticia / Esti premiu ye pa tola escena musical n’asturianu, porque ensin el vuestru llabor musicasturiana.com nun tendría xacíu 
Tamién ye pa toles persones que collaboráis dando aliendu a la redacción d’esti mediu de comunicación y pa tola xente que siguís, lleéis, mercáis y sentís música nesta web 
MILENTA GRACIES! Tamién a El Comercio (Diario de Asturias) por esti reconocimientu tan prestosu pa poder danos voz y visibilizar los soníos d’esta tierra. Xicu Ariza
El so director, Xicu Ariza, dedicó esti premiu a tola escena musical n’asturiana nun discursu que reivindicó’l potencial de la cultura y llingües propies.
Esti mediudía celebróse la entrega premios de la XXVII edición a la Mejor Web de Asturias qu’entama’l diariu xixonés El Comercio. Musicasturiana.com yera una de les 25 nominaes a p’algamar el premiu y, finalmente, foi distinguida como la Mejor web de ocio y tiempo libre d’Asturies. El director d’esti espaciu, Xicu Ariza, recibió’l gallardón que dedicó «a tola escena musical asturiana pol sofitu a esti proyectu» y «a tola mocedá que tuvo y tien qu’emigrar d’Asturies pa trabayar nel ámbitu de les industries culturales y creatives», nun discursu que reivindicó’l potencial de la llingua y la cultura asturiana pal desarrollu económicu d’Asturies.
Musicasturiana.com ye una iniciativa qu‘entamó a rumiase en 2016, nació en 2017 como tienda online y distribuidora dixital, y remocicóse en xunu de 2021 p’ampliar la so xera a mediu de comunicación. Nesti tiempu foi ameyorando la so propuesta y conteníos, ente los qu’hai noticies, entrevistes, reportaxes, cróniques y otros artículos rellacionaos cola música n’asturianu y gallego-asturianu. Tamién destaca la so axenda d’eventos, los servicios qu’ufre a axentes musicales -como la distribución dixital, qu’alministra un catálogu de más de 500 referencies-, y la dinamización que fai de la escena a traviés d’iniciatives como Amosando, Semando Fest, Sienti o la creación de playlists en Spotify. Les sos redes sociales -que tien más de 21.000 siguidores ente les distintes plataformes-, son tamién un altavoz fundamental de los conteníos que recueye la web.
Tou esti llabor nun sería posible ensin el sofitu de la materia prima cola que trabaya, la escena musical n’asturianu y gallego-asturianu, y ensin el trabayu desendolcáu poles y polos collaboradores del mediu de comunicación, a quien Ariza tamién quier agradecer el so llabor. Na so intervención, el periodista y xestor cultural tamién fizo mención a Mecigaya Creativa SL, la empresa qu’alministra Musicasturiana.com amás de Puru Remangu, que tamién foi finalista nesta XXVII edición d’estos premios entamaos por El Comercio col sofitu del Principáu d’Asturies, Gijón Impulsa y Abanca. La marca de ropa taba nominada dientro de la estaya Mejor web e-commerce, que finalmente ganó Siroko, proyectu vencedor tamién del premiu cimeru a la meyor web d’Asturies.
Esti foi’l discursu de Xicu Ariza
«Munches gracies a El Comercio por esti premiu. Siempre presta’l reconocimientu, pero presta más tovía si un mediu de comunicación distingue a un proyectu que tien una parte de mediu de comunicación, y a una persona que ye llicenciada en Periodismu.
Musicasturiana.com nació a finales de 2017, cuando Enar y yo tábemos emigraos en Madrid, ella pa poder trabayar nuna gran axencia de publicidá y yo pa facelo nuna discográfica. Musicasturiana yera’l mio hobby llaboral y güei ye, xunto con Puru Remangu, el mio trabayu y el mi sustentu económicu.
Cuéntovos esto pa sorrayar dos coses: La primera ye que quiero dedicar esti premiu a tola mocedá que tuvo y tien qu’emigrar d’Asturies pa poder vivir de la so profesión, sobre manera a aquella que quier trabayar nel ámbitu de les industries culturales y creatives. La segunda ye que si güei vivo otra vez na ciudá onde viví hasta los 18 años, en Xixón, ye gracies a trabayar cola cultura y cola llingua asturiana.
Digo esto, aprovechando esti foru, porque los medios de comunicación sois creadores d’opinión y equí hai xente venceyao a los poderes políticos y económicos. Parezme mui importante valorar a la cultura y a la llingua asturiana non namás como un entretenimientu, como un reconocimientu a la identidá propia, o como un derechu cultural; sinón tamién como una oportunidá económica pal desarrollu d’Asturies.
Les industries culturales y creatives son un motor económicu en munchos territorios y Asturies tien una mina por esplotar nesti sen. Por eso pido que se tome conciencia d’ello, de la importancia de la cultura y la creativa pa crear puestos de trabayu y, sobre manera, del potencial de la cultura y la llingua asturiana pa ello. Porque la nuestra llingua y la nuestra identidá nun tien competencia nel mundu, porque ye únicamente nuestra. Si en Galicia, Andalucía o’l País Vascu supieron ver esto y funciona, ¿por qué nun va ser posible n’Asturies? Asina que quiero pidir equí que se piense nesto, que se valore, que se reconoza y que se valten prexuicios y el rechazu al nuestru idioma.
Nel casu de la empresa que tenemos Enar y yo, Mecigaya Creativa SL, l’asturianu y la cultura asturiana paguen güei cuatro sueldos de persones d’Asturies. Los nuestros, que podemos vivir otra vez equí y non en Madrid o Bilbao, y los d’otres dos persones moces, Ángela y Marina, que yá nun tuvieron qu’emigrar pa poder trabayar nel ámbitu de la creatividá.
Asina que despídome otra vez dando les gracies a El Comercio y, como non, yá qu’esti premiu ye pa Musicasturiana.com, quiero dar les gracies a tola escena musical asturiana pol sofitu a esti proyectu. Tamos viviendo un gran momentu dientro de la creación musical n’asturianu y los medios de comunicación tenemos que tar ehí pa da-y visibilidá y emburriar pol soníu y la cultura d’esta tierra».
