Asturies va tener un portal únicu para axuntar tola programación cultural de la rexón.
La nueva estratexa cultural inclúi más actividaes nos conceyos y un plan de fomentu de la llectura. Asturies va poner en marcha un portal únicu que va axuntar la programación y les iniciatives culturales desenvueltes na comunidá para ameyorar el so espardimientu y accesibilidá, según anunció la conseyera de Cultura, Política Llingüística y Deporte, Vanessa Gutiérrez, al detallar les midíes del so departamentu incluyíes nel alderique d’orientación política.
La estratexa cultural inclúi tamién un plan de internacionalización para reforzar la presencia de ceadores y empreses asturianes en feries, festivales y mercaos nacionales ya internacionales, según un programa de residencies artístiques nel Faru de Tapia para impulsar la creación contemporanea
Gutiérrez destacó la estensión de l’actividá cultural por tol territoriu al traviés de programes como Asturies, Cultura en Rede y la Xira Didáctica, que superen les 1.200 actividaes añales en collaboración cola práctica totalidá de los conceyos, amás del desenvolvimientu de redes de museos etnográficos, normalización llingüística y teatros y auditorios
La conseyera anunció coles mesmes la ellaboración d’un Plan d’Actuación Bibliotecaria y de Fomentu de la Llectura, con especial atención a la infancia, la mocedá, les persones con mayores dificultaes d’accesu y la creación nes llingües propies, coles mires de garantizar la igualdá d’oportunidaes culturales con independencia del llugar de residencia
En materia deportivo, el Principáu va destinar en 2027 un total de 4,8 millones d’euros a federaciones, clubes y deportistes d’altu nivel, amás de financiar eventos deportivos con 350.000 euros y alzar hasta 400.000 euros les ayudes para ameyorar instalaciones municipales en conceyos de menos de 10.000 habitantes, informa Efe.
