As Figueiras prepárase pa celebrar en mes y mediu la botadura del barcu más grande construyíu na ría del Eo. Tien 120 metros d’eslora y más de 40 metros d’altu. Va emplegase pa trabayos n’alta mar, como instalación de cables submarinos o sofitu a parques eólicos.
7.000 tonelaes va pesar l’enorme barcu cuando concluya la so construcción. Dánse-y estos díes los últimos retoques pa poder botalu y siguir los trabayos atracáu nes instalaciones de Gondán, n’As Figueiras.
Foi diseñáu al milímetru, nun foi posible nin facelu un metru más llargu. Inclusive delles partes van tener que montase en Xixón pa que puea pasar per baxo la Ponte los Santos.
Va dir l’añu que vien a los mares del norte d’Europa pa trabayos n’alta mar, de sofitu a plataformes petrolíferes o eóliques. A bordu va tener capacidá pa 180 persones, pero en cubierta puen instalase módulos pa que duerman hasta 600 trabayadores.
Gondán sigue colos sos trabayos d’ampliación, escavando’l cantil p’ameyorar la so eficiencia a la hora de construir, explica Álvaro Platero, director d’Astilleros Gondán.
La idea ye que les obres d’ampliación puean tar concluyíes a final d’añu.
