La protección de los menores frente a los riesgos de les redes sociales ocupa cada vegada más espaciu nel debate políticu. España prepara una llei que plantega llendar l’accesu a delles plataformes a los menores de 16 años, mientres la evidencia científica alvierte de que’l problema ye más difícil.
Falamos con Joaquín González Cabrera, investigador asturianu que participó nel informe fechu pal Congresu y que sirvió de sofitu al desendolcu d’esta llei.
L’informe señala que la vulnerabilidá de los menores nun depende namás del tiempu que pasen conectaos, sinón tamién de cómo usen les plataformes y de les sos circunstancies personales y psicosociales. Un usu superior a dos hores diaries pue medrar la esposición a riesgos, sobre manera ente los menores de 11 a 15 años, pero los espertos alvierten de que’l tiempu d’usu nun lo esplica too: tamién hai que tener en cuenta’l contestu y lo que se considera un usu problemáticu de la tecnoloxía.
Reclamen amás que la protección nun dependa namás de les families: tamién les plataformes tienen qu’inxerir mecanismos de seguridá dende’l so diseñu.
Un debate que yá llegó al ámbitu políticu y xudicial. Meta, matriz de Facebook y Instagram, pagará más de 16.000 millones de dólares nos Estaos Xuníos por crear adicción ente los menores y llendará l’usu de les sos redes ente les y los más mozos.
Una responsabilidá que, según l’informe, tien que treslladase tamién al diseñu pa garantizar una mayor protección de los menores.
