Güei ye’l Día d’Europa. El 9 de mayu de 1950 roblóse la Declaración Schuman, cinco años dempués del fin de la Segunda Guerra Mundial.
Nesa fecha, el ministru francés d’Asuntos Esteriores centró’l so discursu en promover la paz y la unidá y propunxo la creación d’una Comunidá Europea del Carbón y del Aceru, formada per seis países y abierta a más. Queríase que l’interés económicu común contribuyera a la paz y la solidaridá.
España incorporóse a lo que yá yera la Comunidá Económica Europea (CEE) en 1986. Fai 40 años. Un finxu que llanzó’l país hacia la modernidá.
En 2002, empezó a circular l’euru. En cuatro décades, España recibió más de 185.000 millones d’euros de la Xunión pa financiar infraestructures, empléu, anovación y desarrollu rexonal con destinos tan reconocibles como les ayudes a la PAC, los fondos Feder y los Next Generation.
Y güei, con 27 países miembros, Europa enfréntase a retos importantes. El contestu xeopolíticu obliga a revisar cuestiones como la defensa y la seguridá europees. Con asuntos como la meyora de la competitividá o la transición ecolóxica na axenda, la Xunión tien d’actuar pa solucionar el problema del accesu a la vivienda y la desinformación.
El Conceyu de Xixón entama una programación especial pol Día d’Europa
Por mor del Día d’Europa, a les 12:00 na Plaza Mayor de Xixón púdose escuchar l’himnu européu, el reconocíu himnu de l’allegría pa conmemora la paz y la unidá n’Europa.
La fachada de la casa consistorial lluz güei la bandera de la Xunión Europea. De nueche, amás, va allumar d’azul pa celebrar esta xornada.
En collaboración col Mercáu Ecolóxicu y Artesanu, desenvolvióse un taller d’ellaboración de banderes d’Europa con testil reutilizao de tela vaquero. Tamién s’ufiertó una actuación musical al cargu d’un dúu.
De cara a mañana, ta prevista una nueva actividá nesti mesmu espaciu. Un gran puzle d’Europa nel que los neños van tener que coyer la pieza correspondiente de cada país y asitiala nel mapa.
Les persones a les que preguntamos coinciden en qu’Europa ye fundamental nel ámbitu económicu y lexislativu.
