Mediaoreya (IG)estrénase en directo esti vienres na Taberna El Cuévano de La Pola Siero. A les 21.30h y con entrada llibre actúa esta banda formada polos músicos mozos Irene Vioque, Celia Nieto, Julio Rodríguez y Pablo Fernández. Musicasturiana.com
La música tradicional asturiana va vivir esti vienres 17 de xunetu una cita mui especial. Mediaoreya, la formación formada por Irene Vioque (Xara) al vigulín, Celia Nieto (Corquiéu, Entós, Draque, La Ciudá nel Mar) al vigulín, Julio Rodríguez (Llan de Cubel, Draque, Loína) al vigulín y Pablo Fernández (Alienda, Rellume) a la guitarra, va ufrir el so primer conciertu, un estrenu que supón l’entamu d’ún de los proyectos nuevos más novedosos de la escena asturiana.
La cita va celebrase a les 21:30 hores na Taberna El Cuévano, en La Pola Siero, dientro de la programación qu’entama esti llocal coincidiendo coles fiestes d’El Carmín y va suponer la primer oportunidá pa esfrutar en vivo d’una propuesta que destaca pola so formación pocu habitual: trés vigulinos y guitarra.
Dende la so presentación, Mediaoreya llamó l’atención por apostar por una sonoridá diferente. Los sos integrantes desplicaron a MUSICASTURIANA.COM que la so intención yera aportar una propuesta nueva a la escena asturiana, combinando’l respetu pola tradición cola creación d’una identidá propia basada nel diálogu ente los trés vigulinos y la guitarra.
Con humor, el propiu grupu anunció’l so estrenu nes redes sociales escribiendo: «Casi nun tenemos temes, pero sí conciertos», una frase que reflexa l’espíritu cercanu y desenfadáu con qu’encara’l so primer pasu enriba l’escenariu esta banda unida pola amistá de los componentes, xente mozo mui destacao dientro de la nueva fornada de músicos folk asturianu. Esti vienres, n’El Cuévano, van amosalo.
