- Alborecemos col cielu cubiertu por estratos nel llitoral y fastera central, tando escampláu nel restu con unes temperatures que tan alrodiu de los 17ºC, rexistrándose nel puirtu Payares 13,4ºC.
- Güei van dir dixebrándose los estratos del alborecer pa quedar el cielu poco nuboso nes hores centrales del día. Yá pela tarde van dir surdiendo nubes de desendolque que puen dexar dalgún xarabatu de calter tormentosu na cordelera. Les temperatures van camudar poco y l’aire nordés pue soplar con raches moderaes en zones espuestes.
- Mañana miércoles tará’l cielu mui nuboso con nubes baxes nel llitoral y fastera central, desendolcándose nubes d’evolución que van dexanos xarabatos tormentosos xeneralizaos durante la tarde con unes temperatures másimes en descensu y col nordés que tiende a amenorgar.
- El xueves suben les temperatures y seguiremos con cierta inestabilidá que mos dexará dellos xarabatos tormentosos pela tarde, siendo más xeneralizaos y abondosos de cara al vienres pela tarde cuando baxen les temperatures.
- Paez que tantu’l sábadu como’l domingu va tar más estable con ascensu les temperatures y sol, sobre too de cara al domingu, pero esto yá lu diremos viendo.
