Publicado en Sin categoría

El tiempu n’Asturies

El Tiempu n’Asturies.A les 8:00h d’esti sábadu alborecemos lloviendo col cielu cubiertu pol borrín y la nublina ya con unes temperatures que tan alrodiu de los 12ºC, rexistrándose nel puirtu Payares 6,9ºC. Güei vamos tener el cielu mui nuboso, principalmente de nubes baxes que mos van dexar precipitaciones intermitentes a lu llargu del día con unes temperatures que van camudar poco, calteniéndose un ambiente suave en xeneral pero húmedu, amás l’aire sedrá sele ya variable.

  • Mañana domingu va dir coyendo fuercia l’aire ábrigu, a la vez que va dir barriendo los borrinos ya nublines d’estos díes con un ascensu de les temperatures. Esti día solo s’esperen precipitaciones pela mañana y principalmente na fastera ocidental ya cordelera quedando’l restu d’Asturies al abellugu d’esta ya inclusu abiréndose grandes claros o abancios na fastera central pela tarde.
  • El llunes, martes ya miércoles vamos tener una circulación atmosférica zonal mui marcada con vientu ábrigu que va soplar con muncha fuercia nes zones altes ya en puntos del llitoral, apurriéndonos nubosidá abondosa nel surocidente ya cordelera con delles precipitaciones nestes zones, siendo menos probables nel restu, onde les temperatures van subir bultablemente por mor del efeutu foehn que fae l’aire ábrigu al pasu polos cordales montañosos d’Asturies, amás va dexanos tamién mui mala mar.
  • A partir del xueves va dir baxando les temperatures cola llegada d’una masa d’aire más fría que mos va dexar un ambiente más ivernal, asina y too tendremos intervalos nubosos nel cielu entemecios ente dellos claros o abancios cola posibilidá de dalgún xarabatu ocasinal y testimonialmente dalgo de nieve nes zones más altes de la cordelera.

 

Autor:

Maestra de Llingua Asturiana Colexu Carmen Ruiz-Tilve - Uviéu