Cultura amplía la proteición de la toponimia asturiana pa preservar los nomes tradicionales d’elementos xeográficos. La Conseyería aprobó un nuevu decretu que permite recuperar y oficializar, per primer vegada, nomes tradicionales de sableres, ríos y otros espacios xeográficos. Actualidá
Cultura amplía la protección de la toponimia asturiana pa caltener los nomes tradicionales d’elementos xeográficos. El decretu nuevu va dexar recuperar y afitar, pela primer vez, denominaciones tradicionales de, por exemplu, playes, montes, ríos y caminos, qu’hasta agora quedaben fuera del procedimientu oficial. La norma afianza la protección de la toponimia como patrimoniu cultural inmaterial y facilita la so incorporación al Nomenclátor Xeográficu del Principáu.
La Conseyería de Cultura, Política Llingüística y Deporte amplía la protección de la toponimia asturiana con un decretu nuevu que dexa caltener y oficializar nomes tradicionales de la toponimia menor, una parte muncho más amplia del territoriu cola que se reforcia la protección d’esti patrimoniu llingüísticu y cultural de la comunidá autónoma.
La norma, publicada güei nel Boletín Oficial del Principáu d’Asturies (BOPA), va dexar estender pela primer vez la recuperación y fixación de topónimos tradicionales a espacios qu’hasta agora quedaben fuera del procedimientu oficial, como playes, montes, ríos, caminos, puertos, árees xeográfiques, espacios naturales protexíos o bienes patrimoniales de titularidá autonómica.
Hasta agora, el procedimientu d’oficialización de la toponimia incluyía namás parroquies y núcleos de población. El decretu nuevu sustituye a la norma vixente dende’l 2002 y actualiza un procedimientu qu’hasta agora resultaba insuficiente pa dar respuesta a la diversidá y riqueza del territoriu asturianu.
Esta ampliación va dexar caltener una parte esencial del patrimoniu cultural inmaterial d’Asturies. La toponimia tradicional constituye una espresión singular de la memoria colectiva y del vínculu históricu de la ciudadanía col territoriu, amás de desempeñar un papel fundamental nel caltenimientu y tresmisión del patrimoniu llingüísticu asturianu.
El decretu reforcia, amás, el papel de la Xunta Asesora de Toponimia del Principáu d’Asturies, órganu consultivu encargáu d’emitir los dictámenes técnicos previos a l’aprobación de les denominaciones oficiales, y establez un procedimientu más afayadizu pa encarar la complexidá de les distintes realidaes xeográfiques de la comunidá.
Desque s’oficialicen, los topónimos aprobaos van pasar a integrase nel Sistema Cartográficu del Principáu d’Asturies y van formar parte del so Nomenclátor Xeográficu oficial, cola correspondiente xeorreferenciación. Esto va facilitar que les alministraciones públiques, los servicios cartográficos y la ciudadanía puedan usalos de forma homoxénea.
