Marca «Puru Remangu»

Enar Areces, ceadora del proyectu cultural y creativo

El proyectu, qu’empezó como una marca de camisetes y otros productos con mensaxes feministes, foi creciendo hasta convertise nun mediu pa impulsar hestories de muyeres

N’asturianu, ‘remangu’ significa determinación, fuerza, poderíu. Y eso ye precisamente lo que-y sobra a Enar Areces, ceadora del proyectu cultural y creativo Puru Remangu, que trabaya sobro la identidá asturiana y el feminismu. Empezó como xuna marca de camisetes y otros productos con mensaxes feministes en llingua asturiana que foi creciendo adulces hasta convertise nun mediu pa impulsar iniciatives que cunten les hestories d’eses muyeres que s’enfrenten a la vida con arroxu. Les que lo fixeron nel pasáu abriendo camín pa les siguientes xeneraciones y les que lo lleven a cabu agora gracies a les predecesores. Con esfuerzu y ensin rindise nel camín.

«Xuna muyer que tenía remangu era xuna muyer que llimpiaba perbién, qu’atendía la casa, que fregaba y barría con muncho arte. Y nós, dende Puru Remangu, queremos da-y xuna vuelta por que acomuñase con ser lo que tu quieras ser, con que si tienes remangu tienes muncha fuerza», esplica Enar Areces a elDiario.es al traviés de videollamá. «Ye más que xuna marca de ropa, ye xuna seña d’identidá», afirma.

Detrás del proyectu tán ella, que s’encarga de la parte creativa, y la so pareya Xicu, que ye l’encargáu de llevar la parte más alministrativa. Dempués d’unos once años fora de la so tierra, volvieron un mes primero qu’empezara la pandemia y asitiáronse en Xixón. «Cuando inda taba en Madrid llancé xuna preventa de camisetes, pero entós daquella nun tenía nin web. Amás, yo trabayaba nuna percancia de publicidá munches hores al día y tampoco tenía la enerxía pa crear una marca. Sabía faelo porque ye’l mio trabayu, pero solo diba faciendo un post en redes sociales cada dos meses y vendía dalguna camiseta», comenta Areces.

El llibru Güeli (güela n’asturianu), que salió les pasaes navidaes

Anguaño, tienen más de 15.000 siguidores n´Instagram y de les vientes saquen dineru pa vivir y pa faer coses como’l llibru Güeli (güela n’asturianu), que salió les pasaes navidaes. Empezó como una acción en dicha plataforma sol lema #30diesconremangu, na que los siguidores podíen mandar una semeya de la so güela con un testu n’asturianu que cuntara la so biografía.

Les 35 hestories que recibieron arrexuntaronse nun volume autoeditáu del que s’imprimieron 500 copies, que s’acabaron en dos selmanes. La entrevistada rellata que: «Tuvimos que llamar a la imprenta porque precisábamos otres 500. Faltaba una selmana pa Nuechebona y teníamos que tener llibros sigo o sí. Y a finales de xineru fiximos otros 500, yá vamos pola tercer edición».

La maquetación corrió al cargu d´Enar Areces, pero con ella tamién taben Miguel Sánchez, que fixo la traducción al asturianu; Xicu, que s’encargó de la parte d’editar, de correxir y repasar por que nun hubiera erros y Marta Taboada, que foi l’autora de la portada. Ella tamién creó’l logo de Puru Remangu, que simboliza una ‘rapiega’ (foina). «Axuntamos nel pisu de Madrid pa merendar. Trabayábamos xuntes nuna percancia de publicidá, ella de directora d’arte y yo de copy. Precisaba la so ayuda porque yo nun sé ilustrar y quería daqué que tuviera que ver con Asturies y con fuerza. De sópitu asocedióme una rapiega: ye un animal del Norte y tien picardía, ye intelixente, poderosa. Y el primer bocetu que fixo foi’l que se quedó», comenta.

Dempués del llibru, vieno’l curtiu documental Emburriando (emburriando, embistiendo), sobre l’equipu de roller derby femenín La Güestia. «Quiero visibilizar el remangu n’otros ámbitos y paecióme que nel deporte queda perfectamente reflexáu con La Güestia, porque compartimos tolos valores que yo intento reflexar en Puru Remangu», declara Enar Areces. «Dempués de Güeli quería probar con otru formatu. Pensando nel tirón que tenemos en redes sociales, pensé que taría bien tener conteníu audiovisual porque hasta’l momentu nun fixéramos nada de vídeu. Mandé-yos un mensaxe diciéndo-yos que quería faer daqué con elles y foi bien, bien fácil trabayar xuntes. Elles pasáronme tou lo que queríen cuntar y fiximos xuntes el guion, con una organización que daba gustu. Nun sé si ye porque son muyeres, anque tengo la teoría de que con muyeres se trabaya muncho meyor», afirma riéndose.

En relación con estes obres culturales, matiza que-y paez bien importante «dexar claro que tola xente que collaboró nel llibru y nel documental grabando o faciendo semeyes cobró lo que-yos correspondía. Eso paguelo yo, porque hasta’l momentu nun tenemos nenguna subvención, nin ayudes de cultura y del dineru que sacamos podría llevame más al bolsu, pero paezme importante que paguemos a tola xente cola que trabayamos. Al igual que yo me considero profesional, los otros tamién lo son».

Apocayá tamién fixeron una collaboración cola ilustradora María Ortiz, nesta ocasión un trabayu de merchandising pa la Oficina de Turismu de Xixón. «Contactáronme porque queríen faer daqué con una marca local y queríen que fuéramos nós. Yo sabía lo que deseyaba reflexar pero nun sé faer de too, asina qu’al pie de María pensamos en personaxes y posibilidaes. Anque vivu en Xixón soi d’El Apurro, asina que tuvi que buscar hestories de la ciudá, porque había dalgunes que nun conocía. Aprobose y salió fai unes trés selmanes», diz.

Feminismu ástur más allá de les fronteres

Imaxe del curtiu documental Emburriando (embistiendo),
sobre l’equipu de roller derby femenín La Güestia

Apocayá más d’un mes, Ione Belarra, actual Secretaria Xeneral de Podemos y Ministra de Derechos Sociales y Axenda 2030, llamó l’atención de los medios al salir vistiendo una de les camisetes de Puru Remangu col lema: «Fañagüeta. Amasuela, raxa, peseta, castaña, páxara, clica, regaña, ñal». Toes sinónimos de vulva. Foi un regalu d’Alba González, asesora d’Igualdá nel Congresu, que la llevaba puesta nun actu al qu’allegaron n’Avilés.

Enar Areces esplica que: «Alba escribióme pa dicime que me diba a faer un pidíu na web que diba ser pal Ministeriu, porque a Ione Belarra gustába-y la camiseta. Nun pensé que diba dir más allá, que nun diba salir nenyures». La mesma Belarra punxo un post na so cuenta d´Instagram vistiéndola y esplicando la hestoria nun testu que termina con: «Asturianu&Feminista».

Ante la entruga de si considérense un referente del feminismu asturianu, Areces amuésase prudente: «Cuando me lo dicen dame muncho respetu. Porque los que tienen que ser referentes son los colectivos feministes. Un proyectu como Puru Remangu tamién, pero equí la voz cantante los colectivos feminista y social. El nuesu papel ye emburriar y tar ende, ser un poco la marca cómpliz». Entá asina, vienden munchos productos fora de la comunidá. «Casi diría que la metá vendese n’Asturies y la metá pa otros sitios. Son munchos asturianos que tán fuera pero otros, polos nomes y los apellíos, non. Hai munchos gallegos, xente de Llión o vascos».

Puru Remangu, cultura feminista

La tema de la llingua nun resulta un problema. «De primeres conocíasenos como un proyectu solu n’asturianu. Pero agora cada vez más, l’asturianu ye a cencielles normal, una llingua vehicular qu’utilizamos pa tresmitir esto y aquello», asegura. Gracies a esi llabor de normalización de la llingua ganó la edición XXXVI del Premiu Andrés Solar que concede la Xunta pola Defensa de la Llingua Asturiana (XDLA).

Na cabeza d´Enar Areces siempres se ta xestando dalguna idea. «Gustaríame siguir faciendo estos vídeos visibilizando el remangu como’l que fiximos col deporte, faer daqué con muyeres que vivan nos pueblos. Y de cara a Navidá hai otru proyectu colaborativu del qu’inda nun puedo cuntar nada, pero que tien que ver col sexu o más bien cola sexoloxía». Nel futuru tamién-y gustaría crear talleres, conciertos, festivales, montar coses pero haya más xente implicada. Siguir calteniendo la marca, pero cada vez faer más coses rellacionaes cola cultura y siempres rellacionáu cola identidá, les muyeres, el remangu. Esti paragües ye bien ampliu y caben munches coses».

 



«Emburriando» ye’l primer curtiu que Puru Remangu ficimos cola intención de visibilizar el remangu notra estaya de la vida, nesti casu el deporte femenín. Facémoslo cuntando la historia de La Güestia Roller Derby, el primer y únicu equipu de roller derby n’Asturies, coles que compartimos al 100% los sos valores.