La Conseyería d’Ordenación destaca que la tramitación de Llei LGTBI sigue adelantre gracies a la unanimidá de tolos partíos democráticos. El conseyeru Ovidio Zapico defende na Xunta Xeneral un testu que pretende enanchar derechos. “Esta llei nun vien dicir -y a naide cómo tien que vivir. Lo que vien dicir ye daqué muncho más senciellu: que naide tien derechu a imponer a otra persona cómo tien de vivir la so vida”, afirma.
Ovidio Zapico, defendió esti miércoles na Xunta Xeneral el proyectu de llei para la erradicación de la discriminación y la garantía real y efectivo de los derechos de les persones LGTBI y de les sos families, dempués de que la Cámara refugara la enmienda a la totalidá presentada por Vox, lo que va dexar que’l testu siga la so tramitación parlamentaria.
Mientres la so intervención nel plenu, Zapico sorrayó que la norma nun pretende estremar a la sociedá, sinón correxir una anomalía histórica. Nesti sentíu, destacó la relevancia del alderique al señalar que lo que ta en xuegu ye decidir si Asturies tien de dotase d’una llei que reconoza y protexa los derechos del colectivu LGTBI o si, otra manera, sigue siendo una de les poques comunidaes autónomes qu’entá escarecen d’ella.
El conseyeru foi contundente al defender la posición del Executivu autonómicu: “Llegó’l momentu de qu’Asturies cunte con esta llei”. Al so xuiciu, trátase de falar de derechos, “nin más nin menos”.
Frente a les crítiques de la oposición, Zapico aportunó en que’l proyectu nun impon nenguna forma de vida nin llinda les llibertaes individuales. Según esplicó, la llei llíndase a reconocer derechos a persones que mientres años tuvieron que soportar que se cuestionara la so propia realidá. Nesta llínea, defendió la plena integración del colectivu na vida social y llaboral de la comunidá y aseguró que resulta difícil entender que la reconocencia d’estos derechos pueda presentase como una amenaza para los de los demás.
El titular de Derechos Ciudadanos punxo tamién en valor el procesu d’ellaboración del testu, que calificó como “dialogáu, trabayáu y participáu” por el mesmu colectivu LGTBI, según por profesionales d’ámbitos como la sanidá, la educación y el derechu. Coles mesmes, sorrayó que la norma respeta tantu les competencies autonómiques como la lexislación estatal vixente.
Mientres la so vez de retruque, Zapico desmintió de manera atayante diverses acusaciones arramaes nos últimos meses sobro’l conteníu del proyectu. Calificó de “falsu” que la llei contemple la imposición de tratamientos a menores, qu’obligue a los profesionales sanitarios a actuar contra’l so criteriu o que suponga un ataque a les families. Amás, llamentó que s’intente convertir l’alderique nuna batalla cultural permanente” y reivindicó que les esmoliciones reales de la ciudadanía pasen por cuestiones como allegar a la escuela ensin sufrir acoso o poder avieyar con dignidá.
“Esta llei nun vien dicir -y a naide cómo tien que vivir. Lo que vien dicir ye daqué muncho más senciellu: que naide tien derechu a imponer a otra persona cómo tien de vivir la so vida”, sentenció.
El desenvolvimientu del alderique foi siguíu dende la tribuna d’invitaos por representantes de distintos colectivos LGTBI. En conociéndose la resultancia de la votación, los activistes celebraron con aplausos el refugu de la enmienda, que pretendía paralizar la tramitación de la norma.
Pa concluyir, el conseyeru reconoció qu’Asturies llega tarde a esti desenvolvimientu normativu, anque destacó que’l Parlamentu autonómicu entá ta a tiempu d’asitiase del llau del respetu y l’igualdá. Por ello, valoró la meyora de la llei como un pasu escontra una sociedá “más llibre, más igualitaria y, sobremanera, más decente”.
